ନୂଆଦିଲ୍ଲୀ: ବଢୁଥିବା କୋଭିଡ ସଂକ୍ରମଣକୁ ଦୃଷ୍ଟିରେ ରଖି ଦିଲ୍ଲୀରେ କଟକଣାକୁ ବୃଦ୍ଧି କରାଯିବା ସହ Yellow alert ଜାରି କରାଯାଇଛି । ଗ୍ରେଡେଡ୍ ରେସପନ୍ସ ଆକ୍ସନ ପ୍ଲାନ(GRAP)ଅନୁସାରେ ସହରର ସମସ୍ତ ସର୍ବସାଧାରଣ ସ୍ଥାନ ପାଇଁ ଗାଇଡଲାଇନ ଜାରି କରିଯାଇଛି । ଏହି ନିର୍ଦ୍ଦେଶନାମା ଅନୁସାରେ, ଦିଲ୍ଲୀର ସମସ୍ତ ସ୍କୁଲ କଲେଜ ଓ ସମସ୍ତ ଶିକ୍ଷାନୁଷ୍ଠାନକୁ ଅନିର୍ଦ୍ଦିଷ୍ଟ କାଳ ପାଇଁ ବନ୍ଦ ଘୋଷଣା କରିଛନ୍ତି ଦିଲ୍ଲୀ ସରକାର ।
ଗାଇଡଲାଇନ ଅନୁସାରେ, ଆଜି ଠାରୁ ଦିଲ୍ଲୀରେ ରାତ୍ରିକାଳୀନ କର୍ଫ୍ୟୁ ଆରମ୍ଭ ହେବ । ରାତି ୧୦ ରୁ ସକାଳ ୫ ପର୍ଯ୍ୟନ୍ତ କର୍ଫ୍ୟୁ ବଳବତ୍ତର ରଖିବାକୁ ନିର୍ଦ୍ଦେଶ ଥିବା ବେଳେ ଅନ୍ୟ ସମସ୍ତ ସାଧାରଣ ସ୍ଥାନ ଓ ପ୍ରତିଷ୍ଠାନରେ ମଧ୍ଯ ଭିଡ ନିୟନ୍ତ୍ରଣ ତଥା ହ୍ରାସ କରିବାକୁ ନିର୍ଦ୍ଦେଶ ରହିଛି । ଦିଲ୍ଲୀ ମେଟ୍ରୋ ସେବା, ରେସ୍ତୋରାଁ, ବାର୍ ଗୁଡିକ ମାତ୍ର ୫୦ ପ୍ରତିଶତ କ୍ଷମତା ସହ ଚଳାଇବା ପାଇଁ ନିର୍ଦ୍ଦେଶାନାମାରେ କୁହାଯାଇଛି ।
ସେହିପରି ସିନେମା ହଲ୍, ସ୍ପା, ଜିମ୍, ମଲ୍ଟିପ୍ଲେକ୍ସ, ଅଡିଟୋରିୟମ୍ ଏବଂ ସ୍ପୋର୍ଟସ୍ କମ୍ପ୍ଲେକ୍ସକୁ ସମ୍ପୂର୍ଣ୍ଣ ବନ୍ଦ ରଖିବାକୁ ନିର୍ଦ୍ଦେଶ ରହିଛି । ଏହି ଗାଇଡଲାଇନ ତୁରନ୍ତ କର୍ଯ୍ୟକାରୀ କରିବା ପାଇଁ ମଧ୍ୟ ନିର୍ଦ୍ଦେଶ ଦେଇଛନ୍ତି ଦିଲ୍ଲୀ ସରକାର । ସେହିପରି ଏହି ନିୟମ ଅନିର୍ଦ୍ଦିଷ୍ଟ କାଳ ପାଇଁ ଲାଗୁ ହୋଇଥିବା ବେଳେ ସ୍ଥିତି ନିୟନ୍ତ୍ରଣକୁ ଆସିଲେ ପରବର୍ତ୍ତୀ ନିଷ୍ପତ୍ତି ନେଇ ପାରନ୍ତି ଦିଲ୍ଲୀ ସରକାର ।
ବ୍ୟୁରୋ ରିପୋର୍ଟ, ଇଟିଭି ଭାରତ
