ମହାରାଷ୍ଟ୍ର: ସୁଶାନ୍ତ ସିଂ ରାଜପୁତଙ୍କ ମୃ୍ତ୍ୟୁ ମାମଲାର ଅନୁସନ୍ଧାନ ସିବିଆଇ ଦ୍ବାରା ଜାରି ରହିଛି । ତେବେ ଏହାର ତଦନ୍ତ ସଂପର୍କରେ ସିବିଆଇ କୌଣସି ସୂଚନା କାହିଁକି ଦେଉନାହିଁ ବୋଲି ମହାରାଷ୍ଟ୍ର ପ୍ରଦେଶ କଂଗ୍ରେସ କମିଟି(ଏମପିସିସି) ପ୍ରଶ୍ନ ଉଠାଇଥିବା ସୂଚନା ମିଳିଛି ।
ବଲିଉଡ ଅଭିନେତା ସୁଶାନ୍ତ ସିଂଙ୍କ ମୃତ୍ୟୁ ଘଟଣାରେ ନୂଆଦିଲ୍ଲୀସ୍ଥିତ ଅଲ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ମେଡିକାଲ ସାଇନ୍ସ ପ୍ୟାନେଲ ରିପୋର୍ଟ ଅକ୍ଟୋବରରେ ସାର୍ବଜନୀନ କରିଥିଲା। କିନ୍ତୁ ଏହା ପରେ ଏହି ଘଟଣାରେ କୌଣସି ସୂଚନା ମିଳିନାହିଁ । ତେବେ ବିହାର ନିର୍ବାଚନ ଶେଷ ନହେବା ପର୍ଯ୍ୟନ୍ତ କେନ୍ଦ୍ରୀୟ ତଦନ୍ତକାରୀ ସଂସ୍ଥା ରାଜନୈତିକ ଚାପ ଯୋଗୁଁ କୌଣସି ସୂଚନା ଦେଉନାହାନ୍ତି ବୋଲି ଦଳ ପ୍ରଶ୍ନ କରିଛି।
ଦଳର ସାଧାରଣ ସଂପାଦକ ସଚିନ ସାୱନ୍ତ ସୋମବାର ଏ ସଂପର୍କରେ ଟ୍ବିଟ କରି କହିଛନ୍ତି , " ବିହାର ନିର୍ବାଚନ ପାଇଁ ସିବିଆଇ ଆଚରଣ ବିଧି ଅନୁସରଣ କରୁଛି କି ? ଦିଲ୍ଲୀ ଏମ୍ସ ହସ୍ପିଟାଲ ରିପୋର୍ଟ ଦାଖଲ କରିବା ପରେ ମଧ୍ୟ କୌଣସି କାର୍ଯ୍ୟାନୁଷ୍ଠାନ ଏବଂ ବିବୃତ୍ତି କାହିଁକି ଦିଆଯାଇ ନାହିଁ ? AIIMS ରିପୋର୍ଟକୁ ସାର୍ବଜନୀନ ହେବାର ଏକ ମାସ ବିତିଯାଇଛି । ତେବେ ବିହାର ନିର୍ବାଚନ ଶେଷ ନହେବା ପର୍ଯ୍ୟନ୍ତ ନରେନ୍ଦ୍ର ମୋଦିଙ୍କ ନେତୃତ୍ବାଧୀନ ସରକାର ସୂଚନାକୁ ସାର୍ବଜନୀନ କରିବାକୁ ମନା କରିଛନ୍ତି କି ?" ବୋଲି ସେ ପ୍ରଶ୍ନ କରିଛନ୍ତି ।
AIIMS ପ୍ୟାନେଲ ଦୁଇ ମାସରୁ ଅଧିକ ସମୟ ହେବ ରିପୋର୍ଟ ଦାଖଲ କରିଲାଣି, କିନ୍ତୁ ସିବିଆଇ ଏହି ଘଟଣାର ଅନୁସନ୍ଧାନର ସ୍ଥିତି ଉପରେ କୌଣସି ଗୋଟିଏ ଶବ୍ଦ ନ କରିବା ସଚିନ ସାୱନ୍ତଙ୍କୁ ଆଶ୍ଟର୍ଯ୍ୟନ୍ବିତ କରିଛି । ରାଜପୁତଙ୍କ ମୃତ୍ୟୁ ବିଷ କାରଣରୁ ହୋଇଥିବାର ସମ୍ଭାବନା ଅଛି ବୋଲି ଏମ୍ସ ପ୍ୟାନେଲ ରିପୋର୍ଟରେ ଦର୍ଶାଇଛି।
ବଲିଉଡ ଅଭିନେତା ସୁଶାନ୍ତ ସିଂ ରାଜପୁତ ଗତ ଜୁନ 14ରେ ମୁମ୍ବାଇର ବାନ୍ଦ୍ରାସ୍ଥିତ ଆପାର୍ଟମେଣ୍ଟରେ ମୃତ୍ୟୁବରଣ କରିଥିଲେ । ଅଭିନେତାଙ୍କ ଏଭଳି ହଠାତ୍ ମୃ୍ତ୍ୟୁର କାରଣ ସଂପର୍କରେ ଜାଣିବା ମାମଲାକୁ ମୁମ୍ବାଇ ପୋଲିସ ଅଗଷ୍ଟରେ ସୁପ୍ରିମକୋର୍ଟଙ୍କ ନିର୍ଦ୍ଦେଶକ୍ରମେ ସିବିଆଇକୁ ହସ୍ତାନ୍ତର କରିଥିଲା ।
