ନୂଆଦିଲ୍ଲୀ: ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧିଙ୍କ ହତ୍ୟା ମାମଲାରେ(Rajiv Gandhi Assassination case) ଦୋଷୀ ଏଜି ପେରାରିଭଲନ(AG Perarivalan) ଦୀର୍ଘ ୩୧ ବର୍ଷ ଜେଲ୍ରେ ରହିବାପରେ ବୁଧବାର ମୁକୁଳିଛି । ଜଷ୍ଟିସ୍ ଏଲ ନାଗେଶ୍ବର ରାଓଙ୍କ ନେତୃତାଧୀନ ଖଣ୍ଡପୀଠ ପେରାରିଭଲନକୁ ଜେଲ୍ରୁ ମୁକ୍ତ କରିବାକୁ ଧାରା ୧୪୨ର ସ୍ବତନ୍ତ୍ର କ୍ଷମତା ପ୍ରୟୋଗ କରିଛନ୍ତି । ପୂର୍ବରୁ ପେରାରିଭଲନକୁ ମୃତ୍ୟୁଦଣ୍ଡ ଓ ପରେ ତାକୁ ଆଜୀବନ କାରାଦଣ୍ଡରେ ପରିବର୍ତ୍ତନ କରାଯାଇଥିଲା । ତେବେ ୨୦୧୫ରୁ ପେରାରିଭଲନର କ୍ଷମା ଆବେଦନ ପଡିରହିଥିଲା ।
କ'ଣ ଏହି ଧାରା ୧୪୨ (Article 142) ?
- ସର୍ବୋଚ୍ଚ ନ୍ୟାୟାଳୟ ଭାରତୀୟ ସମ୍ବିଧାନର ଅନୁଚ୍ଛେଦ ୧୪୨ର ପ୍ରୟୋଗ କରିଛନ୍ତି, ଯାହାକି ନିଜର ଅଧିକାର କ୍ଷେତ୍ରର ପ୍ରୟୋଗ କରିବା ଓ କୌଣସି ମାମଲାରେ ପୂର୍ଣ୍ଣ ନ୍ୟାୟ କରିବାକୁ ସ୍ବତନ୍ତ୍ର ଆଦେଶ ଦେବାପାଇଁ ଶୀର୍ଷ ଅଦାଲତର କ୍ଷମତା ସହ ଜଡିତ । ଏହାପୂର୍ବରୁ ଏହାର ବ୍ୟବହାର ରାମ ଜନ୍ମଭୂମୀ-ବାବ୍ରି ମସଜିଦ୍ ମାମଲାରେ ହୋଇଥିଲା ।
କ'ଣ କହିଥିଲେ ସୁପ୍ରିମକୋର୍ଟ ?
- ଜଷ୍ଟିସ୍ ଏଲ ନାଗେଶ୍ବର ରାଓଙ୍କ ନେତୃତାଧୀନ ଖଣ୍ଡପୀଠ କହିଥିଲେ ଯେ, ମାମଲାରେ ସମସ୍ତ ସାତଜଣ ଦୋଷୀଙ୍କୁ ସମୟ ପୂର୍ବରୁ ମୁକ୍ତ କରିବାର ସୁପାରିଶ କରିଥିବା ତାମିଲନାଡୁ ରାଜ୍ୟ କ୍ୟାବିନେଟ୍ର ପରାମର୍ଶ ରାଜ୍ୟପାଳଙ୍କ ପାଇଁ ବାଧ୍ୟକାରୀ ଅଟେ ।
- ଶୀର୍ଷ ଅଦାଲତ ମଧ୍ୟ କେନ୍ଦ୍ରର ଏହି ଯୁକ୍ତିକୁ ଖାରଜ କରିଛନ୍ତି ଯେ, ରାଷ୍ଟ୍ରପତି ବିଶେଷ ଭାବେ ଆଇପିସିର ଧାରା ୩୦୨ ଅଧିନରେ କୌଣସି ମାମଲାରେ କ୍ଷମାଦେବାକୁ କ୍ଷମତା ରଖନ୍ତି, ଏହା ଅନୁଚ୍ଛେଦ ୧୬୧(ରାଜ୍ୟପାଳଙ୍କ କ୍ଷମା ଦେବାର ଶକ୍ତି)କୁ ବେକାର କରିଦେବ ।
- ଦୀର୍ଘ ଦିନ ଧରି କାରାଗାରରେ ରହିବା ଓ ପାରୋଲରେ ବାହାରକୁ ଆସିବାବେଳେ ତାଙ୍କ ବିରୁଦ୍ଧରେ କୌଣସି ଅଭିଯୋଗର ଇତିହାସ ନଥିବାକୁ ଦୃଷ୍ଟିରେ ରଖି ସୁପ୍ରିମକୋର୍ଟ ମାର୍ଚ୍ଚ ୯ରେ ପେରାରିଭଲନକୁ ଜାମିନ ପ୍ରଦାନ କରିଥିଲେ ।
- ମଇ ୧୯୯୯ ରାୟରେ ଶୀର୍ଷ ଅଦାଲତ ୪ ଦୋଷୀ ପେରାରିଭଲନ, ମୁରୁଗାଁ, ସାନ୍ଥମ ଓ ନଳିନୀଙ୍କର ମୃତ୍ୟୁ ଦଣ୍ଡାଦେଶକୁ ସଂରକ୍ଷିତ ରଖିଥିଲେ ।
- ଫେବୃଆରୀ ୧୮, ୨୦୧୪ରେ ସୁପ୍ରିମକୋର୍ଟ କେନ୍ଦ୍ର ଦ୍ବାରା କ୍ଷମା ଯାଚିକା ଉପରେ ଶୁଣାଣି କରିବାକୁ ୧୧ ବର୍ଷ ବିଳମ୍ବ ଆଧାରରେ ଦୁଇ ଅନ୍ୟ କଏଦୀ ମୁରୁଗାଁ ଓ ସାନ୍ଥମଙ୍କ ସମେତ ପେରାରିଭଲନଙ୍କ ମୃତ୍ୟୁଦଣ୍ଡକୁ ଆଜୀବନ କାରାଦଣ୍ଡରେ ବଦଳାଇ ଦେଇଥିଲେ ।
କ'ଣ ଥିଲା ଏହି ଚର୍ଚ୍ଚିତ ଘଟଣା ?
- ବର୍ଷ ୧୯୯୧ ମଇ ୨୧ ରାତିରେ ପୂର୍ବତନ ପ୍ରଧାନମନ୍ତ୍ରୀ ରାଜୀବ ଗାନ୍ଧୀଙ୍କୁ ତାମିଲନାଡୁର ଶ୍ରୀପେରୁମ୍ବୁଦୁରରେ ଏକ ରାଜନୈତିକ ସଭାରେ ଜଣେ ମହିଳା ଆତ୍ମଘାତୀ ବିସ୍ଫୋରଣକାରୀ (Suicide Bomber) ଦ୍ବାରା ହତ୍ୟା କରାଯାଇଥିଲା । ଯାହାର ପରିଚୟ ଧନୁ ବୋଲି ପରେ ଜଣାପଡିଥିଲା ।
ତେବେ ସୁପ୍ରିମକୋର୍ଟର ଏହି ରାୟରେ କଂଗ୍ରେସ କ୍ଷୁବ୍ଧ ହେବା ସହ ଅସନ୍ତୋଷ ପ୍ରକାଶ କରିଛି । କଂଗ୍ରେସ ମୁଖପାତ୍ର ରଣଦୀପ ସୂର୍ଯ୍ୟେୱାଲା କହିଛନ୍ତି, "ସୁପ୍ରିମକୋର୍ଟଙ୍କ ନିଷ୍ପତ୍ତିରେ ଆମେ ଗଭୀର ଭାବେ ମର୍ମାହତ । ଯଦି ପୂର୍ବତନ ପ୍ରଧାନମନ୍ତ୍ରୀଙ୍କ ହତ୍ୟାକାରୀଙ୍କୁ ଏପରି ଭାବେ ଛାଡି ଦିଆଯାଉଛି ତେବେ ଦେଶରେ ଆଇନର ଅଖଣ୍ଡତାକୁ ସୁରକ୍ଷା କିଏ ଦେବ ।" ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ମଧ୍ୟ ସୂର୍ଯ୍ୟେୱାଲା ସମାଲୋଚନା କରିଛନ୍ତି ଓ କହିଛନ୍ତି, "ମୋଦି ନୀରବ ରହି ଏହାକୁ ସମର୍ଥନ କରୁଛନ୍ତି କି ? ତାଙ୍କ ସରକାରକୁ ଏହାର ଉତ୍ତର ଦେବାକୁ ପଡିବ ।"
ସଂଗ୍ରାମ କେଶୋରୀ ବେହେରା
