ଭାଗଲପୁର: ଟ୍ରେନରେ ଚୋରି କରିବା ପଡିଲା ମହଙ୍ଗା । ଯାତ୍ରୀଙ୍କ ଠାରୁ ଚୋରି କରି ଚୋର ହେଲା ହିନସ୍ତା । ଏଭଳି ଘଟଣା ଘଟିଛି ବିହାରର ଭାଗଲପୁରରେ । ଭାଗଲପୁରରେ ଟ୍ରେନରେ ଯାତ୍ରା କରିବା ସମୟରେ ଜଣେ ମହିଳା ଯାତ୍ରୀ ଫୋନରେ କଥା ହେଉଥିଲେ । ଏହାର ସୁଯୋଗ ନେଇ ଚୋର ଟି ଝରକା ଫାଙ୍କରେ ହାତ ଗଳାଇ ଉକ୍ତ ମହିଳାଙ୍କ ପର୍ସ କୁ ଚୋରି କରିବାକୁ ଉଦ୍ୟମ କରିଥିଲା । ମାତ୍ର ଦୁର୍ଭାଗ୍ୟ ବଶତଃ ଟ୍ରେନ ରେ ଯାତ୍ରା କରୁଥିବା ସହ ଯାତ୍ରୀ ମାନେ ଚୋରର ଦୁଇ ହାତକୁ ଧରି ପକାଇଥିଲେ । ଫଳରେ ଚୋର ଟି ଚଳନ୍ତା ଟ୍ରେନ ରେ ଦୀର୍ଘ ସମୟ ଧରି ଝୁଲି ରହିଥିଲା । ଏ ଘଟଣା ର ଭିଡିଓ ବିଭିନ୍ନ ସୋସିଆଲ ମିଡିଆ ରେ ଭାଇରାଲ ହୋଇଛି ।
ଏ ସମ୍ପର୍କରେ ଭାଗଲପୁର ରେଲୱେର ଆରପିଏଫ ଇନ୍ସପେକ୍ଟର ରଣଧୀର କୁମାର କହିଛନ୍ତି ଯେ, ଏଭଳି କୌଣସି ବି ଘଟଣା ମୋର ନଜରକୁ ଆସି ନାହିଁ । ଏହାର ଯାଞ୍ଚ ଚାଲିଛି । ଜିଆରପି ସହିତ ମଧ୍ୟ କଥାବାର୍ତ୍ତା ହୋଇଛି । ଏଭଳି ମାମଲା ସାମନାକୁ ଆସିଲେ ଗଣମାଧ୍ୟମକୁ ଜଣାଯିବ । ସେହିପରି ଏକ ବର୍ଷ ପୂର୍ବେ ଏଭଳି ଘଟଣା ସାମନାକୁ ଆସିଥିଲା । ଜଣେ ଚୋରକୁ ଏଭଳି ଭାବେ ଚୋରି କରୁଥିବା ଅବସ୍ଥାରେ ଦୀର୍ଘ ସମୟ ଧରି ଟ୍ରେନରେ ଝୁଲିଥିଲା । ସୂଚନା ଯୋଗ୍ୟ ଯେ ଭାଗଲପୁର- ଜମାଲପୁର - ପୀରପେନ୍ତି ରେଲୱେ ରୁଟରେ ଏଭଳି ଚୋରି ଘଟଣା ସାଧାରଣ ଅଟେ ।
ଏହା ମଧ୍ୟ ପଢନ୍ତୁ ... Watch: ଚୋରି କରି ଖସି ଯାଉଥିଲା, ଟ୍ରେନ ଝରକାରେ ଝୁଲି ରହିଲା ଚୋର
ପୂର୍ବରୁ ଟ୍ରେନରେ ଚୋରି କରି ଚୋର ଫସିବାର ଅନେକ ଭିଡିଓ ଭାଇରାଲ ହୋଇଛି । ବିହାରର କଟିହାର-ସମସ୍ତିପୁରକୁ ଯାଉଥିବା ଏକ ଯାତ୍ରୀବାହୀ ଟ୍ରେନରେ ଝରକାରେ ଚୋର ଝୁଲିବାର ଦୃଶ୍ୟ ଭାଇରାଲ ହୋଇଥିଲା । ଚଳନ୍ତା ଟ୍ରେନରେ ଚୋରର ଜୀବନ ବଞ୍ଚାଇବା ସହ ଯାତ୍ରୀ ମାନେ ଅନ୍ୟ ଏକ ଷ୍ଟେସନରେ ଟ୍ରେନ ଅଟକିବା ପରେ ଜିଆରପି ପୋଲିସକୁ ହସ୍ତାନ୍ତର କରିଥିଲେ। ଯୁବକ ଜଣଙ୍କ ଟ୍ରେନରୁ ଜଣେ ମହିଳାଙ୍କ ବ୍ୟାଗ ଓ ପର୍ସ ଛଡାଇ ନେଇ ଦୌଡିବାକୁ ଲାଗିଥିଲେ । ଏହାପରେ ଟ୍ରେନ ଝରକାରେ ଲାଗିଥିବା ଲୁହା ରଡରେ ଝୁଲି ଲୁଚିବାକୁ ଚେଷ୍ଟା କରିଥିଲା । କିନ୍ତୁ ହାତରେ ଯନ୍ତ୍ରଣା ହେବାରୁ ଯାତ୍ରୀ ମାନେ ତାଙ୍କୁ ଧରିପକାଇଥିଲେ ଏବଂ ପରବର୍ତ୍ତୀ ଷ୍ଟେସନ ବାଚ୍ଛଓ୍ବାରାରେ ଟ୍ରେନ ଅଟକିବାରୁ ଯୁବକଙ୍କୁ ପୋଲିସକୁ ହସ୍ତାନ୍ତର କରିଥିଲେ ।
ସେହିପରି ଅନ୍ୟ ଏକ ଭିଡିଓରେ ଚୋରି କରୁଥିବା ବେଳେ ଯାତ୍ରୀଙ୍କ ହାବୁଡ଼ରେ ପଡିଥିଲା । ଏଥିରେ ଚୋରଟି ଚଳନ୍ତା ଟ୍ରେନରେ ଝୁଲି ରହି ହାତ ନଛାଡିବା ପାଇଁ ଯାତ୍ରୀଙ୍କୁ ଆକୁଳ ନିବେଦନ କରୁଥିଲା । ଭାଇରାଲ ହେଉଥିବା ଭିଡିଓଟି ବିହାରର ବେଗୁସରାଇ ଅଞ୍ଚଳର ବୋଲି କୁହାଯାଇଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
