ଡେରାଡୁନ: ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ଆସନ୍ତା ବିଧାନସଭା ଉପନିର୍ବାଚନ ଚମ୍ପାୱତ ଆସନରୁ ଲଢିବେ । ଏନେଇ ବିଜେପି ପକ୍ଷରୁ ଘୋଷଣା କରିଯାଇଛି । ବିଜେପି କେନ୍ଦ୍ରୀୟ କମିଟି ନିର୍ବାଚନ ଲାଗି ପୁଷ୍କର ସିଂ ଧାମିଙ୍କ ନାମକୁ ଅନୁମୋଦନ କରିଛି।
ଗତ ବିଧାନସଭା ନିର୍ବାଚନରେ ଏହି ଆସନରୁ ବିଜେପି ପ୍ରାର୍ଥୀ କୈଳାସ ଗେହତୋରି ବିଜୟୀ ହୋଇଥିଲେ । ପରେ ଧାମିଙ୍କ ପାଇଁ ଏହି ଆସନ ଖାଲି କରିଥିଲେ କୈଳାସ । ନିକଟରେ ସଦ୍ୟ ସମାପ୍ତ ବିଧାନସଭା ନିର୍ବାଚନରେ ଖତିମା ଆସନରୁ ଲଢି ପରାସ୍ତ ହୋଇଥିଲେ ଧାମି । କଂଗ୍ରେସ ପ୍ରାର୍ଥୀ ଭୁବନ ଚନ୍ଦ୍ର କାପ୍ରିଙ୍କଠୁ ହାରିଥିଲେ । ନିର୍ବାଚନ ହାରିଥିଲେ ବି ବିଜେପି ଧାମିଙ୍କୁ ମୁଖ୍ୟମନ୍ତ୍ରୀ କରିଥିଲା । ସମୁଦାୟ 70ଟି ଆସନରୁ ବିଜେପି 47ଟି ଆସନ ହାତେଇଥିଲା । କଂଗ୍ରେସ 19ଟି ସିଟ ଜିତିଥିଲା ।
ସୋମବାର ନିର୍ବାଚନ ଆୟୋଗ ଓଡିଶା, କେରଳ ଓ ଉତ୍ତରାଖଣ୍ତ ଉପନିର୍ବାଚନ ପାଇଁ ସୂଚୀ ଘୋଷଣା କରିଥିଲେ । ଆସନ୍ତା ମେ 31ରେ ଏହି ଉତ୍ତରାଖଣ୍ଡ ଚମ୍ପାୱତ ଆସନରେ ମତଦାନ ହେବ ଏବଂ ଜୁନ 3ରେ ଭୋଟ ଗଣତି ହେବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
