ଭୁବନେଶ୍ବର: ସାରା ଭାରତବର୍ଷରେ ସ୍ଵଦେଶୀ ସାମଗ୍ରୀର ବହୁଳ ବ୍ୟବହାର ତଥା ଭୋକାଲ ଫର୍ ଲୋକାଲକୁ ପ୍ରୋତ୍ସାହନ ଦେବା ପାଇଁ ଆଜାଦୀ କା ଅମୃତ ମହୋତ୍ସବ ଅନ୍ତର୍ଗତ ଦେଶରେ ଆୟୋଜନ ହେଉଥିବା 'ହୁନର ହାଟ' । ଆଗାମୀ ଦିନରେ ଦେଶରେ କାରିଗରଙ୍କ ଦ୍ଵାରା ଉତ୍ପାଦିତ ସ୍ଵଦେଶୀ ସାମଗ୍ରୀକୁ ବଡ ବ୍ୟବସାୟିକ ପେଣ୍ଠସ୍ଥଳୀରେ ପରିଣତ କରିବ ବୋଲି କହିଛନ୍ତି କେନ୍ଦ୍ର ଶିକ୍ଷା, ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ।
ଉତ୍ତରପ୍ରଦେଶ ରାମପୁର ଠାରେ 'ହୁନର ହାଟ' ର ଶୁଭାରମ୍ଭ କରିଛନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ଦେଶରେ କାରିଗରଙ୍କ ଦ୍ଵାରା ଉତ୍ପାଦିତ ସ୍ଵଦେଶୀ ସାମଗ୍ରୀକୁ ବଡ ବ୍ୟବସାୟିକ ପେଣ୍ଠସ୍ଥଳୀରେ ପରିଣତ କରିବ ବୋଲି କହିଛନ୍ତି କେନ୍ଦ୍ର ଶିକ୍ଷା , ଦକ୍ଷତା ବିକାଶ ଏବଂ ଉଦ୍ୟମିତା ମନ୍ତ୍ରୀ ଧର୍ମେନ୍ଦ୍ର ପ୍ରଧାନ । ସେ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମନ୍ କି ବାତ୍ କାର୍ଯ୍ୟକ୍ରମରେ ହୁନର ତଥା କଳାତ୍ମକ ଓ କାରିଗରୀ କାର୍ଯ୍ୟ ସହ ଯୋଡି ହୋଇଥିବା ଲୋକଙ୍କ ପାଇଁ ଗର୍ବ କରିବାକୁ ଆହ୍ବାନ କରିଛନ୍ତି । ଏହି ପରିପ୍ରେକ୍ଷୀରେ ସାରା ଦେଶରେ ହୁନର ହାଟର ଆୟୋଜନ କରାଯାଉଛି ।
ଏହି ମେଳା ମାଧ୍ୟମରେ ସମଗ୍ର ଭାରତ ବର୍ଷରେ ଶିଳ୍ପୀ, କାରିଗର ଓ ସେମାନଙ୍କ ଦ୍ଵାରା ପ୍ରସ୍ତୁତ ସ୍ଵଦେଶୀ ସାମଗ୍ରୀକୁ ଏକ ସାଙ୍ଗରେ ଅଣାଯାଇଛି । ଭୋକାଲ୍ ଫର୍ ଲୋକାଲକୁ ପ୍ରୋତ୍ସାହନ ଦେବା ଏବଂ ଆମର ସଭ୍ୟତା ଓ ସଂସ୍କୃତିରେ ସମସ୍ତଙ୍କୁ ଯୋଡ଼ିବା ପାଇଁ ଏହା ଏକ ଭଲ ପ୍ରୟାସ । ଦେଶର ପ୍ରତିଟି ଘରେ ଘରେ କାରିଗରୀ ଓ ହୁନର ଅଛି । କିନ୍ତୁ ଏହାକୁ ସମ୍ମାନ ଦେବା ସହ ଉତ୍କୃଷ୍ଟ ମାନର ସାମଗ୍ରୀ କିଭଳି ଉତ୍ପାଦନ ହୋଇପାରିବ ଏବଂ ଏହାକୁ ବଜାରରେ ଅଣାଯାଇ ଦେଶ ବିଦେଶରେ ମଧ୍ୟ ବିକ୍ରି କରାଯାଇପାରିବ ତାହା ଚ୍ୟାଲେଞ୍ଜ୍ ହୋଇଛି । ଏହି ପରିପ୍ରେକ୍ଷୀରେ ହୁନର ହାଟ୍ ଏହି ଚ୍ୟାଲେଞ୍ଜକୁ ସମାଧାନ କରିବା ଦିଗରେ ବଡ ଭୂମିକା ଗ୍ରହଣ କରିବ । ଦେଶର କୋଣ ଅନୁକୋଣର ଦକ୍ଷତାପୂର୍ଣ୍ଣ କାରିଗରଙ୍କୁ ବଜାର ଓ ରୋଜଗାର ସୁଯୋଗ ଯୋଗାଉଥିବା ‘ହୁନର ହାଟ’ ବିରଳ ଚମତ୍କାର ଦେଶୀ ହାତ ତିଆରି ସାମଗ୍ରୀର ଏକ ବିଶ୍ବସନୀୟ ବିପଣନ କେନ୍ଦ୍ର ବୋଲି ସେ କହିଛନ୍ତି ।
ପ୍ରଧାନ କହିଛନ୍ତି ଦୀର୍ଘ ୩୪ ବର୍ଷ ପରେ ପ୍ରଣୟନ ହୋଇଥିବା ନୂଆ ଜାତୀୟ ଶିକ୍ଷା ନୀତିରେ ମଧ୍ୟ ପାଠପଢା ସହ ରୋଜଗାରକୁ ପ୍ରାଥମିକତା ଦିଆଯାଇଛି । ଆଗାମୀ ଦିନରେ ରାଷ୍ଟ୍ରୀୟ ଶିକ୍ଷା ନୀତି ଶିଳ୍ପୀକାର ତଥା କାରିଗରୀଙ୍କୁ ଅଧିକ ରୋଜଗାର ସହ ଆତ୍ମସମ୍ମାନ ପ୍ରଦାନ କରିବ । ଅପରପକ୍ଷରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଉତରପ୍ରଦେଶ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥଙ୍କ ସରକାର ସମସ୍ତ ବର୍ଗ ବିଶେଷ ଭାବରେ ସଂଖ୍ୟାଲଘୁ ଲୋକଙ୍କ କଲ୍ୟାଣକୁ ଧ୍ୟାନ ଦେଇଛନ୍ତି । ଉତରପ୍ରଦେଶକୁ ଆତ୍ମନିର୍ଭର କରିବା ପାଇଁ କଲ୍ୟାଣକାରୀ ନୀତିଙ୍କୁ ଲୋକଙ୍କ ପାଖରେ ପହଁଚାଇବା ପାଇଁ ମୋଦି ସରକାର ସଂକଳ୍ପବଦ୍ଧ ।
ଉଲ୍ଲେଖଯୋଗ୍ୟ ରାମପୁରରେ ଆୟୋଜିତ 'ହୁନର ହାଟ'ରେ କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ ମୁଖତାର ଆବାସ ନକଭି ଏବଂ କେନ୍ଦ୍ର ରାଷ୍ଟ୍ର ସଂସଦୀୟ ବ୍ୟାପାର ଓ ସଂସ୍କୃତି ମନ୍ତ୍ରୀ ଅର୍ଜୁନ ରାମ ମେଘଣ୍ଟାଲ ସାମିଲ ହୋଇଥିଲେ । ଏହି ଅବସରରେ ଶ୍ରୀ ପ୍ରଧାନଙ୍କ କରକମଳରେ ଦେଶର ପ୍ରଥମ ବିଶ୍ଵକର୍ମା ବାଟିକା ଲଗାଯାଇଥିଲା । ବିଶ୍ଵକର୍ମା ବାଟିକା ଭଳି ଅଭିନବ ପଦକ୍ଷେପ ଦ୍ବାରା ଲୋକମାନେ ସ୍ଵଦେଶୀ କାରିଗରୀ ଏବଂ ଅନ୍ୟ ପରମ୍ପରାଗତ କାରିଗରଙ୍କ କୌଶଳକୁ ବୁଝିପାରିବେ ବୋଲି କେନ୍ଦ୍ରମନ୍ତ୍ରୀ ପ୍ରଧାନ ମତବ୍ୟକ୍ତ କରିଥିଲେ ।
ଭୁବନେଶ୍ବରରୁ ମନୋରଞ୍ଜନ ଶଙ୍ଖୁଆ, ଇଟିଭି ଭାରତ
