ନୂଆଦିଲ୍ଲୀ: ନିର୍ବାଚନ ପୂର୍ବରୁ ଏଲପିଜି ଦର ଉପରେ ପୁଣି ଏକ ବଡ ନିଷ୍ପତ୍ତି ଗ୍ରହଣ କରିଛନ୍ତି କେନ୍ଦ୍ର ସରକାର । ଉଜ୍ଜଳା ଯୋଜନା ହିତାଧିକାରୀଙ୍କ ସବସିଡି ରାଶି ୩ ଶହ ଟଙ୍କାକୁ ବୃଦ୍ଧି କରାଯାଇଛି । ପୂର୍ବରୁ ଏହି ରାଶି ୨୦୦ ଟଙ୍କା ଥିଲା । କେନ୍ଦ୍ର କ୍ୟାବିନେଟ ବୈଠକରେ ଏହି ନଷ୍ପତ୍ତି ଗ୍ରହଣ କରଥିବା ଆଜି କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ସିଂ ଠାକୁର ପ୍ରେସମିଟରେ ସୂଚନା ଦେଇଛନ୍ତି । ପୂର୍ବରୁ ଏହି ସବସିଡି ରାଶି ସିଲିଣ୍ଡର ପିଚ୍ଛା ୨ଶହ ଟଙ୍କା ଥିବା ବେଳେ ଏବେ ଏହି ପରିମାଣ ୧୦୦ ଟଙ୍କା ବୃଦ୍ଧି ପାଇ ୩ ଶହରେ ପହଞ୍ଚିଛି । ପ୍ରଧାନମନ୍ତ୍ରୀ ଉଜ୍ଜଳା ଯୋଜନାର 9.6 କୋଟି ହିତାଧିକାରୀ ଏବେ ଏହାର ଲାଭାଂଶ ପାଇବାକୁ ଯାଉଛନ୍ତି ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ଅନୁଷ୍ଠିତ କ୍ୟାବିନେଟ ବୈଠକରେ ଏହି ନିଷ୍ପତ୍ତି ଗ୍ରହଣ କରାଯାଇଥିବା ସୂଚନା ଓ ପ୍ରସାରଣ ମନ୍ତ୍ରୀ ଅନୁରାଗ ଠାକୁର ସୂଚନା ଦେଇଛନ୍ତି । ଉଜ୍ଜଳା ହିତାଧିକାରୀମାନେ ବର୍ତ୍ତମାନ 14.2 କିଲୋଗ୍ରାମ ଏଲପିଜି ସିଲିଣ୍ଡର ପିଚ୍ଛା 703 ଟଙ୍କା ଦେଉଥିବା ବେଳେ ଏହାର ଖୋଲା ବଜାର ମୂଲ୍ୟ 903 ଟଙ୍କା ରହିଛି । କେନ୍ଦ୍ର କ୍ୟାବିନେଟର ଏହି ନିଷ୍ପତ୍ତି ପରେ ସେମାନେ ଏବେ 603 ଟଙ୍କା ମୂଲ୍ୟରେ ସିଲିଣ୍ଡର ପାଇପାରିବେ । ତେବେ ଏହା ପୂର୍ବରୁ କେନ୍ଦ୍ର ସରକାର ଗତମାସ (ଅଗଷ୍ଟ)ରେ ସମସ୍ତ ଗ୍ରାହକଙ୍କ ପାଇଁ ଏଲପିଜି ସିଲିଣ୍ଡର ମୂଲ୍ୟରେ ୨ଶହ ଟଙ୍କା ହ୍ରାସ କରିଥିଲେ ।
ଏହା ମଧ୍ୟ ପଢନ୍ତୁ:- Nobel Prize In Chemistry 2023: ୩ ରସାୟନ ବିଜ୍ଞାନୀ ପାଇବେ ନୋବେଲ ପୁରସ୍କାର
ତେବେ ପ୍ରଧାନମନ୍ତ୍ରୀ ଉଜ୍ଜଳା ଯୋଜନାରେ ଆର୍ଥିକ ବର୍ଷ 2023-24 ରୁ 2025-26, ଅର୍ଥାତ ଆସନ୍ତା ତିନି ବର୍ଷ ମଧ୍ୟରେ 75 ଲକ୍ଷ ନୂଆ ଏଲପିଜି ସଂଯୋଗୀକରଣ ସହ ଯୋଜନାର ମୋଟ ହିତାଧିକାରୀ ସଂଖ୍ୟା 10.35 କୋଟିରେ ପହଞ୍ଚାଇବା ନେଇ କେନ୍ଦ୍ର ସରକାର ଲକ୍ଷ୍ୟ ଧାର୍ଯ୍ୟ କରିଛନ୍ତି । ତେବେ ଅଗଷ୍ଟରେ ଏଲପିଜି ଦର ହ୍ରାସକୁ ନିଷ୍ପତ୍ତିକୁ ନିର୍ବାଚନ ସହ ଯୋଡି ବିରୋଧୀ ମୋଦି ସରକାରଙ୍କୁ ସମାଲୋଚନା କରଥିଲେ । ଏବେ ଚଳିତ ବର୍ଷ ଶେଷ ସୁଦ୍ଧା ୫ ରାଜ୍ୟର ବିଧାନସଭା ନିର୍ବାଚନ ଥିବା ବେଳେ ଆସନ୍ତା ବର୍ଷ ୨୦୨୪ ପ୍ରାରମ୍ଭରେ ସାଧାରଣ ନିର୍ବାଚନ ମଧ୍ୟ ରହିଛି । ମୋଦି ସରକାର ଦରଦାମ ଓ ମୁଦ୍ରାସ୍ଫିତିକୁ ନେଇ ବିରୋଧୀଙ୍କ ଟାର୍ଗେଟରେ ଥିବା ବେଳେ ଏହି ସବସିଡି ରାଶି ବୃଦ୍ଧି ନିଷ୍ପତ୍ତି ଗ୍ରହଣ କରିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
