ଶ୍ରୀନଗର: ଘାଟିରେ ଆତଙ୍କୀଙ୍କ ଟାର୍ଗେଟରେ ଅଣସ୍ଥାନୀୟ ବାସିନ୍ଦା । ଆଜି ଦୁଇ ଜଣ ଅଣ କାଶ୍ମୀର ଶ୍ରମିକଙ୍କୁ ଗୁଳମାଡ କରିଛନ୍ତି ଆତଙ୍କୀ । ଦୁଇ ଶ୍ରମିକ ଗୁରୁତର ଅବସ୍ଥାରେ ସ୍ଥାନୀୟ ହସ୍ପିଟାଲରେ ଭର୍ତ୍ତି ହୋଇଥିବାବେଳେ ସେମାନଙ୍କ ଚିକିତ୍ସା ଜାରି ରହିଛି । ଶ୍ରମିକ ଦୁଇଜଣ ପଞ୍ଜାବର ପଠାନକୋଟ ବାସିନ୍ଦା ସୁରିନ୍ଦର ସିଂ ଏବଂ ଧୀରଜ ଦତ୍ତ ପ୍ରାଥମିକ ତଦନ୍ତରୁ ସ୍ପଷ୍ଟ କରିଛି ପୋଲିସ ।
ଉଭୟ ଗତ କିଛି ତଳେ କାମ ଅନ୍ବେଷଣରେ କାଶ୍ମୀର ଆସିଥିବା ବେଳେ ପୁଲଓ୍ବାମାର ଏକ କୁକୁଡା ଫାର୍ମରେ ଶ୍ରମିକ ଭାବେ କାମ କରୁଥିଲେ । ଆଜି ସଂନ୍ଧ୍ୟାରେ ଉଭୟଙ୍କ ଉପରେ ଅଜଣା ଆତଙ୍କୀ ଗୁଳିମାଡ କରି ଫେରାର ହୋଇଯାଇଥିଲେ । ଜଣଙ୍କ ଛାତିରେ ଗୁଳି ଲାଗିଥିବା ବେଳେ ଅନ୍ୟ ଜଣଙ୍କ ଗୋଡରେ ଗୁଳି ଲାଗିଛି । ସ୍ଥାନୀୟ ବାସିନ୍ଦା ଉଭୟଙ୍କୁୁ ଉଦ୍ଧାର କରି ପୁଲଓ୍ବାମା ହସ୍ପିଟାଲରେ ଭର୍ତ୍ତି କରିଛନ୍ତି ।
ଖବର ପାଇ ପୋଲିସ ଓ ସୁରକ୍ଷାବଳ ଘଟଣାସ୍ଥଳରେ ପହଞ୍ଚିଛନ୍ତି । ଘଟଣାସ୍ଥଳକୁ ଘେରାବନ୍ଦୀ କରି ସର୍ଚ୍ଚ ଅପରେସନ ଆରମ୍ଭ ହୋଇଛି । ପୂର୍ବରୁ ମଧ୍ୟ ଘାଟିରେ ଆତଙ୍କୀ ଏକାଧିକ ଥର ସମାନ ଘଟଣାକୁ ରୂପ ଦେଇଛନ୍ତି । ନିକଟ ଅତୀତରେ ଏକାଧିକ ଅଣସ୍ଥାନୀୟଙ୍କ ସହ କିଛି ସାଧାରଣ ନାଗରିକଙ୍କୁ ମଧ୍ୟ ହତ୍ୟା କରିଥିଲେ ଆତଙ୍କୀ । ଏପରି ଘଟଣା ପରେ ଦିଲ୍ଲୀରେ ଉଦବେଗ ପ୍ରକାଶ ପାଇଥିବା ବେଳେ ଘାଟିରେ ସାମରିକ କାର୍ଯ୍ୟାନୁଷ୍ଠାନ ବୃଦ୍ଧି କରିଥିଲା କେନ୍ଦ୍ର ସରକାର । ତେବେ ପୁଣି କିଛି ଦିନର ବ୍ୟବଧାନ ପରେ ଆତଙ୍କୀଙ୍କ ଟାର୍ଗେଟକୁ ଆସିଛନ୍ତି ଅଣ ସ୍ଥାନୀୟ ।
ବ୍ୟୁରୋ ରିପୋର୍ଟ, ଇଟିଭି ଭାରତ
