ଚେନ୍ନାଇ: ତାମିଲନାଡୁର ସେଲମରେ ମର୍ମନ୍ତୁଦ ସଡକ ଦୁର୍ଘଟଣା । ଦୁଇ ବସ ମୁହାଁମୁହିଁ ଧକ୍କା ହେବା ଫଳରେ 40 ରୁ ଉର୍ଦ୍ଧ୍ବ ଯାତ୍ରୀ ଆହତ ହୋଇଛନ୍ତି । ଦୁର୍ଘଟଣାର ପୁରା ଚିତ୍ର ବସରେ ଲାଗିଥିବା ସିସିଟିଭି କ୍ୟାମେରାରେ କଏଦ ହୋଇଛି । ଗତକାଲି ସନ୍ଧ୍ୟାରେ ଏହି ଦୁର୍ଘଟଣା ଘଟିଛି । ଗୋଟିଏ ବସ ଇଦାପଦିରୁ ତୁରୁଚେନଗୋଡେ ଆସୁଥିବାବେଳେ ଅନ୍ୟ ବସଟି ବିପରୀତ ଦିଗରୁ ଆସୁଥିଲା । ଇଦାପଦି- ସଙ୍କାଗିରି ନିକଟରେ ଉଭୟ ବସ ଦ୍ରୁତଗତିରେ ମୁହାଁମୁହିଁ ଧକ୍କା ହୋଇଥିଲେ ।
ଦୁର୍ଘଟଣାର ସମ୍ପୂର୍ଣ୍ଣ ଚିତ୍ର ବସର ଡ୍ରାଇଭର କ୍ୟାବିନରେ ଲାଗିଥିବା ସିସିଟିଭି କ୍ଯାମେରାରେ କଏଦ ହୋଇଛି । ବସ ଦୁଇଟି ଦ୍ରୁତଗତିରେ ଥିବାବେଳେ ବସର ଡ୍ରାଇଭର ଓ ଅନ୍ୟ ଯାତ୍ରୀ ଛିଟିକି ପଡିଥିଲେ । ବସର ଡ୍ରାଇଭର କ୍ୟାବିନ ସମ୍ପର୍ଣ୍ଣ ଚୁରମାର ହୋଇଯାଇଛି । ଉଭୟ ବସର କର୍ମଚାରୀ, 40 ଛାତ୍ରଛାତ୍ରୀଙ୍କ ସହ ଅନ୍ୟ କିଛି ଯାତ୍ରୀ ଆହତ ହୋଇଛନ୍ତି ।
ଆହତଙ୍କୁ ଉଦ୍ଧାର କରି ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି । ସ୍ଥାନୀୟ କୋଙ୍ଗାପୁରମ ପୋଲିସ ଘଟଣାସ୍ଥଳରେ ପହଞ୍ଚି ଏକ ମାମଲା ରୁଜୁ କରିବା ସହ ତଦନ୍ତ ମଧ୍ୟ ଆରମ୍ଭ କରିଛି । ଦୁର୍ଘଟଣାଟି ଅତି ଭୟଙ୍କର ଥିବାବେଳେ ଆଶ୍ବସ୍ତିକର କଥା ଯେ, ଆହତ ଯାତ୍ରୀଙ୍କ ମଧ୍ୟରେ କେହି ଗୁରୁତର ନଥିବା ମଧ୍ୟ ଜଣାପଡିଛି ।
ବ୍ଯୁରୋ ରିପୋର୍ଟ, ଇଟିଭି ଭାରତ
