ନୂଆଦିଲ୍ଲୀ: ଫିଲ୍ମ ନିର୍ମାତା ଲୀନା ମନିମେକାଲାଇଙ୍କ ବିବାଦୀୟ କାଳୀଙ୍କ ପୋଷ୍ଟରକୁ ନେଇ ସାରା ଦେଶରେ ବିବାଦ ଓ ରାଜନୀତି ଜୋର ଧରିଥିବା ବେଳେ ଏହି ଫୋଟର ଟ୍ବିଟକୁ ହଟାଇ ଦେଇଛି ଟ୍ବିଟର । ଚଳିତ ମାସ ଜୁଲାଇ 2 ତାରିଖରେ ଲିନା କରିଥିବା ଏହି ବିବାଦୀୟ ଫିଲ୍ମ ପୋଷ୍ଟରର ଟ୍ବିଟକୁ ମାଇକ୍ରୋ ବ୍ଲଗିଂ ସାଇଟ ହଟାଇ ଦେଇଛି । ଏହି ବିବାଦୀୟ ପୋଷ୍ଟରରେ ଦେବୀ କାଳୀ ସିଗାରେଟ ଟାଣୁଥିବାର ଭଙ୍ଗୀ ସ୍ଥାନ ପାଇଥିଲା । ଯାହାକୁ ନେଇ ସାରା ଦେଶରେ ପ୍ରତିକ୍ରିୟା ପ୍ରକାଶ ପାଇବାରେ ଲାଗିଛି ।
ମନିମେକାଲାଇ ସେୟାର ହୋଇଥିବା ପୋଷ୍ଟରରେ ମା' କାଳୀଙ୍କ ହାତରେ ଖଣ୍ଡା ଆଉ ତ୍ରୀଶୂଳ ରହିଥିବା ବେଳେ ଆଉ ଏକ ହାତରେ ସିଗାରେଟ୍ ରହିଛି । ଆଉ ଗୋଟିଏ ହାତରେ ଏଲ୍ଜିବିଟି ପତାକା ମଧ୍ୟ ଥିବା ଦେଖିବାକୁ ମିଳିଛି । ଏଭଳି କିଛି ଦୃଶ୍ୟ ଦେଖିବାକୁ ମିଳିବା ପରେ ପୋଷ୍ଟରକୁ ନେଇ ବିବାଦ ଆରମ୍ଭ ହୋଇଥିଲା । ଫିଲ୍ମ ମେକର୍ସଙ୍କୁ ଗିରଫ କରିବା ପାଇଁ ଦାବି ମଧ୍ୟ ଉଠିଥିଲା । ସୋସିଆଲ ମିଡିଆରେ ୟୁଜର୍ସ ଫିଲ୍ମର ଏହି ପୋଷ୍ଟରକୁ ନିଜର ଅସନ୍ତୋଷ ପ୍ରକାଶ କରିବା ସହ କାର୍ଯ୍ୟାନୁଷ୍ଠାନ ମଧ୍ୟ ଦାବି କରିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
