ୱାଶିଂଟନ: କୋରୋନା ଯୁଦ୍ଧରେ ସାରା ବିଶ୍ୱ ଭାରତକୁ ସହାୟତା କରୁଥିବାବେଳେ ଏହି ତାଲିକାରେ ଏବେ ଯୋଡି ହୋଇଛି ଟ୍ୱିଟର । ଏ କଠିନ ସମୟରେ 15 ମିଲିୟନ ଆମେରିକୀୟ ଡଲାର ଦାନ କରିଛି ଟ୍ୱିଟର ।
ଏନେଇ ଆଜି(ମଙ୍ଗଳବାର) ଟ୍ୱିଟର ସିଇଓ ଜ୍ୟାକ୍ ପାଟ୍ରିକ ଡୋର୍ସେ କହିଛନ୍ତି ଯେ, ଏହି ଅର୍ଥ 3ଟି ବେସରକାରୀ ସଂସ୍ଥା କେୟାର, ଏଡ୍ ଇଣ୍ଡିଆ ଏବଂ ସେବା ଇଣ୍ଟରନ୍ୟାସନାଲ ୟୁଏସଏକୁ ଦାନ କରାଯାଇଛି । କେୟାରକୁ 10 ମିଲିୟନ୍ ଡଲାର ଦିଆଯାଇ ଥିବାବେଳେ ଏଡ୍ ଇଣ୍ଡିଆ ଏବଂ ସେବା ଇଣ୍ଟରନ୍ୟାସନାଲ ଆମେରିକା ପ୍ରତ୍ୟେକଙ୍କୁ 2.5 ମିଲିୟନ୍ ଡଲାର୍ ଦିଆଯାଇଛି । ସେବା ଇଣ୍ଟରନ୍ୟାସନାଲ ହେଉଛି ଏକ ହିନ୍ଦୁ ବିଶ୍ୱାସ ଆଧାରିତ, ମାନବିକତା, ଅଣଲାଭ ସେବା ସଙ୍ଗଠନ । ଏହି ଅନୁଦାନ କୋରୋନା ମୁକାବିଲା ଅଭିଯାନର ଏକ ଅଂଶ ଭାବରେ ଅକ୍ସିଜେନ କନସେନଟ୍ରେଟର, ଭେଣ୍ଟିଲେଟର, ବିପିଏପି(ବାଇଲେବଲ୍ ପଜିଟିଭ ଏୟାରୱେ ପ୍ରେସର) ଏବଂ ସିପିଏପି(କ୍ରମାଗତ ପଜିଟିଭ ଏୟାରୱେ ପ୍ରେସର) ମେସିନ୍ କ୍ରୟ କରିବାରେ ସହାୟତା କରିବ । ସେହିପରି ସରକାରୀ ଡାକ୍ତରଖାନା, କୋଭିଡ କେୟାର ସେଣ୍ଟର ଏବଂ ବିଭିନ୍ନ ଡାକ୍ତରଖାନାକୁ ଯନ୍ତ୍ରପାତି ବଣ୍ଟନ କରିବ ବୋଲି ଡୋର୍ସେ କହିଛନ୍ତି ।
ତେବେ ଡୋର୍ସେଙ୍କ ଏହି ଘୋଷଣା ପରେ ମାର୍କେଟିଂ ଏବଂ ଫଣ୍ଡ ଉନ୍ନୟନର ସେବା ଇଣ୍ଡରନ୍ୟାସନାଲ ଉପାଧ୍ୟକ୍ଷ ସନ୍ଦୀପ ଖଡକେକର ତାଙ୍କୁ ଧନ୍ୟବାଦ ଜଣାଇ କହିଛନ୍ତି ଯେ, 'ଏହାଦ୍ୱାରା ସେବା ତା'ର ମାନ୍ୟତା ପାଇଛି । ଆମେ ଏକ ସ୍ୱେଚ୍ଛାକୃତ ଅଣଲାଭ ସଙ୍ଗଠନ ଏବଂ ପବିତ୍ର ହିନ୍ଦୁ ଅନୁଗ୍ରହ, 'ସର୍ବେ ଭବନ୍ତୁ ସୁଖିନଃ' 'ସମସ୍ତେ ଖୁସିରେ ରୁହନ୍ତୁ' ଏହି ବାଖ୍ୟାକୁ ଅନୁସରଣ କରି ଆମେ ସମସ୍ତଙ୍କର ସେବା କରିବାରେ ବିଶ୍ୱାସ କରୁ ।'
ବ୍ୟୁରୋ ରିପୋର୍ଟ, ଇଟିଭି ଭାରତ
