ନୂଆଦିଲ୍ଲୀ: ବହୁ ପୁରାତନ ଅମଳର ଏକ ସୁଡଙ୍ଗ ଠାବ ହୋଇଛି । ଦିଲ୍ଲୀ ବିଧାନସଭାରୁ ଲାଲକିଲ୍ଲା ପର୍ଯ୍ୟନ୍ତ ଲମ୍ବିଛି ଏହି ସୁଡଙ୍ଗ । ବ୍ରିଟିଶ ଶାସନ ସମୟରେ ଏହି ଷୁଡଙ୍ଗ ତିଆରି ହୋଇଥିଲା । ବ୍ରିଟିଶମାନେ ଏହି ଷୁଡଙ୍ଗରେ ସ୍ବାଧୀନତା ସଂଗ୍ରାମୀମାନଙ୍କୁ ଫାଶୀ ଦେଉଥିବା କହିଛନ୍ତି ଦିଲ୍ଲୀ ବିଧାନସଭା ବାଚସ୍ପତି ରାମ ନିୱାସ ଗୋଏଲ । ବର୍ତ୍ତମାନ ଏହି ସ୍ଥାନ ସ୍ବାଧୀନତା ସଂଗ୍ରାମୀଙ୍କୁ ଶ୍ରଦ୍ଧାଞ୍ଜଳି ଦେବାପାଇଁ ବ୍ୟବହାର ହେବ ।
ନିୱାସ କହିଛନ୍ତି ଯେ, 'ସେ ଯେତେବେଳେ 1993ରେ ପ୍ରଥମ କରି ବିଧାୟକ ହୋଇଥିଲେ ସେତେବେଳେ ବିଧାନସଭାରୁ ଲାଲକିଲ୍ଲାକୁ ସଂଯୋଗ କରୁଥିବା ଏକ ସୁଡଙ୍ଗ ଅଛି ବୋଲି ଶୁଣିବାକୁ ପାଇଥିଲେ । ମାତ୍ର ସେତେବେଳେ ଏହାକୁ ନେଇ କୌଣସି ପ୍ରମାଣ ମିଳିପାରି ନ ଥିଲା । ବର୍ତ୍ତମାନ ଆମେ ସୁଡଙ୍ଗର ମୁହଁ ଦେଖିବାକୁ ପାଇଛୁ । କିନ୍ତୁ ସୁଡଙ୍ଗ ଖୋଳାଯାଇନାହିଁ । ରାସ୍ତା ନିର୍ମାଣ ଏବଂ ସ୍ବରେଜ ତିଆରି ସମୟରେ ସୁଡଙ୍ଗର ରାସ୍ତା ବନ୍ଦ ହୋଇଯାଇଛି ।'
ଏଥିସହ ଗୋଏଲ ମଧ୍ୟ କହିଛନ୍ତି ଯେ, 1912 କୋଲକାତାରୁ ଦିଲ୍ଲୀକୁ ରାଜଧାନୀ ସ୍ଥାନାନ୍ତରିତ ହେବାବେଳେ ଏହାକୁ କେନ୍ଦ୍ରୀୟ ବିଧାନସଭା ଭାବେ ବ୍ୟବହୃତ କରାଯାଉଥିଲା । ପରେ ୧୯୨୬ ମସିହାରେ ବର୍ତ୍ତମାନର ଦିଲ୍ଲୀ ବିଧାନସଭାକୁ ବ୍ରିଟିଶ ମାନେ କୋର୍ଟରେ ରୂପେ ବ୍ୟବହାର କରୁଥିଲେ ଏବଂ ଏହି ସୁଡଙ୍ଗ ଦେଇ ସ୍ବାଧିନତା ପାଇଁ ଲଢେଇ କରୁଥିବା ବୀର ସଂଗ୍ରାମୀ ଯୋଦ୍ଧାମାନଙ୍କୁ କୋର୍ଟରେ ହାଜର କରାଉଥିଲେ ।
ବ୍ରିଟିଶମାନେ ସେତେବେଳେ ସ୍ବାଧୀନତା ସଂଗ୍ରାମୀମାନଙ୍କୁ ଏହି ସୁଡଙ୍ଗ ଦେଇ କୋର୍ଟରେ ହାଜର କରିବା ସହ ଫାଶୀ ମଧ୍ୟ ଦେଉଥିଲେ । ଆମେ ସମସ୍ତେ ଏହି ଫାଶୀ ଗୃହ ବାବଦରେ ଜାଣିଥିଲୁ । ବର୍ତ୍ତମାନ ସ୍ବାଧୀନତାର 75 ବର୍ଷ ପରେ ଆମେ ଏହି ସୁଡଙ୍ଗକୁ ଖୋଲିବାକୁ ନିଷ୍ପତ୍ତି ନେଇଛୁ ଏବଂ ଏହା ସ୍ବାଧୀନତା ସଂଗ୍ରାମୀମାନଙ୍କୁ ଶ୍ରଦ୍ଧାଞ୍ଜଳି ଦେବା ପାଇଁ ବ୍ୟବହାର କରାଯିବ ।
ଆସନ୍ତା ବର୍ଷ ସ୍ବାଧୀନତା ଦିବସ ବେଳକୁ ଏହି ସୁଡଙ୍ଗ ପର୍ଯ୍ୟଟକଙ୍କ ପାଇଁ ମଧ୍ୟ ଖୋଲାଯାଇଥିବ । ଏଥିପାଇଁ କାମ ଆରମ୍ଭ ହୋଇଗଲାଣି । ଏହି ଐତିହ୍ୟ ସ୍ଥାନ ସ୍ବାଧୀନତା ସଂଗ୍ରାମୀଙ୍କ ଗାଥା ବଖାଣେ ବୋଲି ଦିଲ୍ଲୀ ବିଧାନସଭା ବାଚସ୍ପତି କହିଛନ୍ତି । ଏଥିସହ ଏହା ପର୍ଯ୍ୟଟନ କ୍ଷେତ୍ର ହେବା ପରେ ଦେଶବାସୀ ମଧ୍ୟ ଏହି ସ୍ଥାନକୁ ଦେଖି ଇତିହାସକୁ ମନେପକାଇ ପାରିବେ ବୋଲି ବାଚସ୍ପତି କହିଛନ୍ତି ।
@ANI
