ନୂଆଦିଲ୍ଲୀ: ବାଲେଶ୍ବର ଟ୍ରେନ ଦୁର୍ଘଟଣା ପରେ ବଢିନାହିଁ ଯାତ୍ରୀଙ୍କର ଟିକେଟ କ୍ୟାନସଲେସନ । କଂଗ୍ରେସ ପକ୍ଷରୁ କରାଯାଇଥିବା ଏହି ଦାବିକୁ ରେଳବାଇର ଟିକେଟ ବୁକିଂ ପ୍ରକ୍ରିୟା ପରିଚାଳନା କରୁଥିବା କ୍ୟାଟରିଂ ଓ ଟ୍ୟୁରିଜିମ କର୍ପୋରେସନ (IRCTC) ଖଣ୍ଡନ କରିବା ସହ ଏହାକୁ ଭୁଲ ତଥ୍ୟ ବୋଲି ଦର୍ଶାଇଛି । ଦୁର୍ଘଟଣା ପରେ ଦେଶବ୍ୟାପୀ ହଜାର ହଜାର ରେଳଯାତ୍ରୀ ସେମାନଙ୍କର ଟିକେଟ କ୍ୟାନସଲ କରିଥିବା କଂଗ୍ରେସ ଅଭିଯୋଗ କରିଥିଲା । IRCTC ଏକ ଟ୍ବିଟରେ କହିଛି, "ଏହି ତଥ୍ୟ ସମ୍ପୂର୍ଣ୍ଣ ଭୁଲ । କ୍ୟାନସଲେସନ ବଢିନାହିଁ । କ୍ୟାନସଲେସନ ହାର ହ୍ରାସ ପାଇଛି । ଚଳିତ ମାସ ପହିଲାରେ (1 ତାରିଖ) ରେ 7.7 ଲକ୍ଷ ଟିକେଟ କ୍ୟାନସଲେସନ ହୋଇଥିବା ବେଳେ 3 ତାରିଖରେ ଏହି ସଂଖ୍ୟା 7.5 ଲକ୍ଷକୁ ହ୍ରାସ ପାଇଛି ।’’
ବାଲେଶ୍ବର ଦୁର୍ଘଟଣା ପରେ ବିଭିନ୍ନ ସୂଚନା ପ୍ରକାଶ ପାଉଛି । କଂଗ୍ରେସର ବରିଷ୍ଠ ନେତା ତଥା ପୂର୍ବତନ ମନ୍ତ୍ରୀ ଭକ୍ତ ଚରଣ ଦାସ ଅଭିଯୋଗ କରିଥିଲେ ଯେ, ଦୁର୍ଘଟଣା ପରେ ରେଳଯାତ୍ରୀମାନେ ଭୟଭୀତ ହୋଇପଡିଛନ୍ତି । ସେମାନେ ଯାତ୍ରା କରିବା ପାଇଁ ସୁରକ୍ଷିତ ଅନୁଭବ କରୁନାହାନ୍ତି । ତେଣୁ ଦୁର୍ଘଟଣା ପରେ ବୁକ କରାଯାଇଥିବା ଟିକେଟର କ୍ଯାନସଲେସନ ବୃଦ୍ଧି ପାଇଛି । ଏହି ଖବର ଗଣମାଧ୍ୟମରେ ଚର୍ଚ୍ଚା ହେବା ପରେ IRCTC ତଥ୍ୟ ସହ ଉତ୍ତର ରଖି କଂଗ୍ରେସର ଅଭିଯୋଗକୁ ସମ୍ପୂର୍ଣ୍ଣ ଭୁଲ ବୋଲି କହିଛି ।
ଭକ୍ତ ଦାସ କହିଥିଲେ, ଏପରି ଏକ ଭୟଙ୍କର ଦୁର୍ଘଟଣା ପୂର୍ବରୁ କେବେ ହୋଇନଥିଲା । ଶହ ଶହ ଲୋକ ସେମାନଙ୍କ ଜୀବନ ହରାଇବା ସହ ହଜାରରୁ ଅଧିକ ଲୋକ ଆହତ ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି । ଏହି ଦୁର୍ଘଟଣା ସମସ୍ତଙ୍କୁ ଦୁଖଃ ଦେଇଛି । ରେଳଯାତ୍ରୀମାନେ ସେମାନଙ୍କ ଯାତ୍ରାକୁ ସୁରକ୍ଷିତ ମଣୁନାହାନ୍ତି । ଫଳରେ ହଜାର ହଜାର ରେଳଯାତ୍ରୀ ସେମାନଙ୍କ ଟିକେଟ କ୍ୟାନସଲ କରୁଛନ୍ତି ।
ଅନ୍ୟପଟେ ଦୁର୍ଘଟଣା ସ୍ଥଳରେ ପ୍ରାୟ 50 ଘଣ୍ଚାର ପୁନରୁର୍ଦ୍ଧାର କାର୍ଯ୍ୟ ଶେଷ ହେବା ପରେ ପୂର୍ବତଟ ରେଳପଥର ଏହି ହାଓ୍ବାଡା-ଚେନ୍ନାଇ ରୁଟରେ ରେଳ ଚଳାଚଳ ସ୍ବାଭାବିକ ହୋଇଛି । ଗତକାଲି ପ୍ରାୟ 30 ଯାତ୍ରୀବାହୀ ଟ୍ରେନ ସହ ଏକାଧିକ ମାଲଗାଡି ଯାତାୟତ କରିଛି । ପୁରୀ- ହାଓ୍ବଡା ବନ୍ଦେ ଭାରତ ଏକ୍ସପ୍ରେସ ମଧ୍ୟ ଚଳାଚଳ କରିଛି । ଆଜି କରମଣ୍ଡଳ ଏକ୍ସପ୍ରେସ ମଧ୍ୟ ଏହି ଦୁର୍ଘଟଣା ସ୍ଥଳ ଅତିକ୍ରମ କରିଛି । ମୁଖ୍ୟ ଲାଇନ (ଅପ-ଡାଉନ) କାର୍ଯ୍ୟ ଶେଷ ହୋଇଥିବା ବେଳେ ଏବେ ଲୁପ ଲାଇନ ମରାମତି କାର୍ଯ୍ୟ ଜାରି ରଖିଛି ରେଳବାଇ । ଅନ୍ୟପଟେ ସିବିଆଇ ମଧ୍ୟ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
