ଜୟପୁର: ରାଜସ୍ଥାନର ଟୋଙ୍କରେ ଗ୍ରାମବାସୀଙ୍କ ତାଲିବାନୀ ଶାସନ । ଅବିବାହିତ ଯୁବକ ଓ ଯୁବତୀ ଏକାଠି ରହିବାରୁ ତାଙ୍କ ପରିବାର ଲୋକଙ୍କୁ ନିର୍ଧୁମ ମାଡ଼ । ଏପରିକି ସେମାନଙ୍କୁ ଯୋତା ମାଳ ପିନ୍ଧାଇ, ଗରମ ଚିମୁଟାରେ ଚେଙ୍କ ଦେବା ସହ ଯୁବକଙ୍କ ନାକ କାଟିଦେଲେ । ରାଜସ୍ଥାନର ଟୋଙ୍କ ଜିଲ୍ଲା ଭୋପାଲାବରେ ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି । ଏହି ଘଟଣାରେ ଯୁବତୀଙ୍କ ପିତାମାତା ସମେତ 8 ଜଣଙ୍କ ବିରୋଧରେ ମାମଲା ରୁଜୁ ହୋଇଛି । ସେମାନଙ୍କ ମଧ୍ୟରୁ ପୋଲିସ 3 ଜଣଙ୍କୁ ଗିରଫ କରିଛି ।
ଏହି ଘଟଣାଟି ଗତ 7 ତାରିଖର ହୋଇଥିବା କୁହାଯାଉଛି । ଗତ ଦୁଇ ସପ୍ତାହ ପୂର୍ବରୁ ମାଲପୁରାର ଗ୍ରାମନିବାସୀ ନବରତ୍ନ ଲାଲଙ୍କ ଅବିବାହିତା ଝିଅ ଜଣେ ଯୁବକଙ୍କ ସହ ଫେରାର ହୋଇଯାଇଥିଲେ । ଏନେଇ ଗ୍ରାମରେ ମୋଗ୍ୟା ସମାଜର ବୈଠକ ହୋଇଥିଲା । ସଭାରେ ଉକ୍ତ ଯୁବକ ଏବଂ ତାଙ୍କ ଭଉଣୀ ମଧ୍ୟ ଉପସ୍ଥିତ ଥିଲେ । ଗ୍ରାମ ମୁଖିଆଙ୍କ ରାୟ ପରେ ଯୁବକଙ୍କୁ ଆର୍ଥିକ ଦଣ୍ଡାଦେଶ ଦିଆଗଲା । ଏହାପରେ ଉଭୟେ ଘରକୁ ଯିବାପାଇଁ ବସଷ୍ଟାଣ୍ଡ ଅଭିମୁଖେ ଯାଉଥିବା ସମୟରେ ଯୁବତୀଙ୍କ ସମ୍ପର୍କୀୟ ତାଙ୍କୁ ଅପହରଣ କରି ମାଡ଼ ମାରିଛନ୍ତି ।
ଭାଇ ଭଉଣୀଙ୍କୁ ରାତିସାରା ବାନ୍ଧି ତାଲିବାନୀ ନିର୍ଯାତନା ଦିଆଯାଇଛି । ଉଭୟଙ୍କୁ ଜୋତା ମାଳ ପିନ୍ଧାଇବା ସହ ଗରମ ଚେଙ୍କ ଦେଇ ଯୁବକଙ୍କ ନାକକୁ ଗଭୀର ଭାବେ କାଟି ଦିଆଯାଇଛି । ଏପରିକି ପରିସ୍ରା ମଧ୍ୟ ପିଆଇଥିବା ଲମ୍ବାହରିସିଂହ ଥାନାରେ ଅଭିଯୋଗ ହୋଇଛି । ଯାହାର ଭିଡ଼ିଓ ମଧ୍ୟ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି । ଏହି ଘଟଣାରେ ପୋଲିସ 8 ଜଣଙ୍କ ବିରୋଧରେ ମାମଲା ରୁଜୁ କରିଥିବାବେଳେ 3 ଜଣଙ୍କୁ ଗିରଫ କରିଛି ।
ଏହା ମଧ୍ୟ ପଢ଼ନ୍ତୁ: White bear in marwahi: ଛତିଶଗଡ ଜଙ୍ଗଲରେ ଧଳା ଭାଲୁ ! ଦେଖନ୍ତୁ ଭିଡିଓ
ଯୁବକଙ୍କ ଅଭିଯୋଗ ଅନୁଯାୟୀ, "ଯୁବତୀଙ୍କ ପରିବାର ଲୋକେ ସେମାନଙ୍କୁ ମାଲପୁରା କୋର୍ଟ ନେଇଥିଲେ । ଏଥିସହ ଘଟଣା ବିରୋଧରେ ମାମଲା ନ କରିବାକୁ ଧମକ ଦେଇଥିଲେ । ଯଦି ଏପରି କରନ୍ତି ତେବେ 5.51 ଲକ୍ଷ ଟଙ୍କା ଜରିମାନା ଦେବାକୁ ଜୋରଜବରଦସ୍ତ ଦସ୍ତଖତ କରାଇଛନ୍ତି ।" କୁହାଯାଉଛି ଯେ, ଦୁଇ ବର୍ଷ ପୂର୍ବେ ଯୁବକଙ୍କ ପ୍ରଥମ ପତ୍ନୀ ଚାଲି ଯାଇଛନ୍ତି । ତାଙ୍କର ଗୋଟିଏ ପୁଅ ଏବଂ ଝିଅ ମଧ୍ୟ ଅଛି ।
