ଆଜି ଚଣ୍ଡିଗଡରେ କୃଷକ ସଂଗଠନର ଆନ୍ଦୋଳନ, ଟ୍ରାଇସିଟି ରୋଡ୍ ବନ୍ଦ କଲା ପୋଲିସ

ଆଜି ଚଣ୍ଡିଗଡ଼ରେ ୧୬ଟି କୃଷକ ସଂଗଠନର ଆନ୍ଦୋଳନ ଡାକରା । ପୋଲିସ ଓ କୃଷକ ମଧ୍ୟରେ ସଂଘର୍ଷ ଘଟି ଜଣେ ମୃତ । ଟ୍ରାଇସିଟି ରୋଡ୍ ବନ୍ଦ କଲା ପୋଲିସ । ଅଧିକ ପଢନ୍ତୁ

ଚଣ୍ଡିଗଡ: ପଞ୍ଜାବରେ ପୁଣିଥରେ କୃଷକମାନେ ରାଜରାସ୍ତାକୁ ଓହ୍ଲାଇଛନ୍ତି । ରାଜ୍ୟର ୧୬ଟି କୃଷକ ସଂଗଠନ ଆଜି(ମଙ୍ଗଳବାର) ଚଣ୍ଡିଗଡ଼ଠାରେ ବଡ଼ ଧରଣର ବିକ୍ଷୋଭ ପ୍ରଦର୍ଶନ ପାଇଁ ଡାକରା ଦେଇଛନ୍ତି । ଏଥିପାଇଁ କୃଷକମାନେ ଚଣ୍ଡିଗଡ ଆଡକୁ ଅଗ୍ରସର ହେଉଥିବା ବେଳେ ପୋଲିସ ବିଭିନ୍ନ ସ୍ଥାନରେ ସେମାନଙ୍କୁ ଅଟକାଇବାକୁ ଉଦ୍ୟମ କରୁଛି । ଗତକାଲି ସକାଳ ପରଠୁ ପୋଲିସ ଅନେକ କୃଷକଙ୍କୁ ଉଠାଇ ନେଇ ଅଟକ ରଖିଛି । ପୋଲିସର ଏଭଳି କାର୍ଯ୍ୟାନୁଷ୍ଠାନ ପରେ ପଞ୍ଜାବର ସମସ୍ତ ଟୋଲ୍‌ପ୍ଲାଜା ଓ ରାସ୍ତାଗୁଡିକୁ ବନ୍ଦ କରିଦେଇଛନ୍ତି କୃଷକ ସଂଗଠନ । ଏହାକୁ ନେଇ ସାଙ୍ଗରୁରଠାରେ ପୋଲିସ ଓ କୃଷକଙ୍କ ମଧ୍ୟରେ ସଂଘର୍ଷ ହୋଇଛି । ଏଥିରେ ଜଣ କୃଷକଙ୍କ ମୃତ୍ୟୁ ଘଟିଥିବା ସୂଚନା ମିଳିଛି । ଯାହାପରେ ପୁରା ରାଜ୍ୟରେ ସ୍ଥିତି ଉତ୍ତେଜନାପୂର୍ଣ୍ଣ ରହିଛି ।

ପଞ୍ଜାବର କୃଷକମାନେ ଆଜି ଚଣ୍ଡିଗଡ଼ରେ ବିକ୍ଷୋଭ ପ୍ରଦର୍ଶନ ପାଇଁ ପ୍ରସ୍ତୁତ ହେଉଛନ୍ତି । ପଞ୍ଜାବରେ ବନ୍ୟା କାରଣରୁ ବ୍ୟାପକ ଧନଜୀବନ କ୍ଷୟକ୍ଷତି ହୋଇଥିବା ବେଳେ ପୀଡ଼ିତଙ୍କୁ କ୍ଷତିପୂରଣ ଦାବିରେ ଏହି ଆନ୍ଦୋଳନ ଡାକରା ଦିଆଯାଇଛି । ଏହି ପରିପ୍ରେକ୍ଷୀରେ ପୂର୍ବରୁ କୃଷକ ସଂଗଠନ ଘୋଷଣା କରିଥିଲେ ଯେ, ଯଦି ପୋଲିସ ସେମାନଙ୍କୁ ଅଟକାଇବାକୁ ଚେଷ୍ଟା କରେ, ତାହେଲେ ସେମାନେ ଯେଉଁଠି ଥିବେ, ସେଇଠି ହିଁ ଧାରଣାରେ ବସିବେ । କୃଷକ ଆନ୍ଦୋଳନକକୁ ଦୃଷ୍ଟିରେ ରଖି ଚଣ୍ଡିଗଡ଼ ସହରରେ ୧୪୪ ଧାରା ଜାରି କରାଯାଇଛି । ସହରରେ କେଉଁଠି ମଧ୍ୟ ୫ରୁ ଅଧିକ ଲୋକ ଏକତ୍ରିତ ନହେବାକୁ କଡ଼ା ନିର୍ଦ୍ଦେଶ ଦେଇଯାଇଛି ।

ମିଡିଆ ରିପୋର୍ଟ ଅନୁସାରେ, କୃଷକଙ୍କୁ ଚଣ୍ଡିଗଡ଼ ଆସିବାରୁ ରୋକିବାକୁ ପୋଲିସ ପ୍ରଶାସନ ସହରକୁ ଟ୍ରାଇସିଟି ସହ ସଂଯୋଗ କରୁଥିବା ୨୭ଟି ପଏଣ୍ଟରେ ପାଖାପାଖି ୪୨୦୦ ଫୋର୍ସ ମୁତୟନ କରିଛି । ସମସ୍ତ ପ୍ରବେଶ ପଥକୁ ସିଲ୍ କରାଯାଇଛି । ତେବେ ଏହି କୃଷକ ସମ୍ମିଳନୀକୁ ରୋକିବାର ମୁଖ୍ୟ କାରଣ ହେଉଛି ସମ୍ମିଳନୀ ପାଇଁ ନିର୍ଦ୍ଧାରିତ ସ୍ଥାନ । ସେକ୍ଟର ୨୫ରେ କୃଷକଙ୍କ ସମ୍ମିଳନୀ ହେଉ ବୋଲି ଚଣ୍ଡିଗଡ ପ୍ରଶାସନ ଚାହୁଁଛନ୍ତି । କିନ୍ତୁ କୃଷକମାନେ ସେକ୍ଟର ୧୭ର ପରେଡ ଗ୍ରାଉଣ୍ଡରେ ଧାରଣା ପ୍ରଦର୍ଶନ ପାଇଁ ଅଡି ବସିଛନ୍ତି । ଏଥିରେ ଚଣ୍ଡିଗଡ଼ ପ୍ରଶାସନ ସହମତ ହେଉନଥିବା ବେଳେ ଉତ୍ତେଜନାପୂର୍ଣ୍ଣ ସ୍ଥିତି ସୃଷ୍ଟି ହୋଇଛି ।