ଜୟପୁର/ଲକ୍ଷ୍ନୌ: ତାମିଲନାଡୁ ମନ୍ତ୍ରୀ ଉଦୟାନିଧି ଷ୍ଟାଲିନଙ୍କ ବିବାଦୀୟ ସନାତନ ବିରୋଧୀ ମନ୍ତବ୍ୟକୁ ନେଇ କଡା ଭାଷାରେ ସମାଲୋଚନା କରିଛନ୍ତି ମଧ୍ୟପ୍ରଦେଶ ବାଗେଶ୍ବର ଧାମ ପ୍ରମୁଖ ଧିରେନ୍ଦ୍ର ଶାସ୍ତ୍ରୀ । ଏପରି ମନ୍ତବ୍ୟ ଦେଇଥିବା ବ୍ୟକ୍ତି ଜଣେ ମୂର୍ଖ ଓ ସେ ରାବଣର ବଂଜଶ । ସେମାନେ ସନାତନ ଧର୍ମକୁ ଶେଷ କରିବାକୁ ଚାହୁଁଛନ୍ତି ବୋଲି ମଧ୍ୟ କହିବାକୁ ପଛାଇନାହାନ୍ତି ଧିରେନ୍ଦ୍ର । ଯଦି କେହି ସନାତନ ଧର୍ମକୁ ଶେଷ କରିବା ପାଇଁ କେହି ପ୍ରୟାସ ଆରମ୍ଭ କରେ, ତେବେ ଏହା ବିରୋଧରେ ଭାରତର ପ୍ରତ୍ୟେକ ସନାତନୀ ରାସ୍ତାକୁ ଓହ୍ଲାଇବେ । ତେଣୁ ଏପରି ମନ୍ତବ୍ୟ ଦେଇଥିବା ବ୍ୟକ୍ତିଙ୍କ ବିରୋଧରେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ମଧ୍ଯ ଦାବି ସହ ସେ ଚେତାବନୀ ଦେଇଛନ୍ତି ।
ଆଜି ରାଜସ୍ଥାନ କୋଟାରେ ଏକ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ ଧିରେନ୍ଦ୍ର ଶାସ୍ତ୍ରୀ । ଏହି ପ୍ରସଙ୍ଗରେ ସେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ ବେଶ ଉତ୍ତେଜିତ ନଜର ଆସିଥିଲେ । ସନାତନ ଧର୍ମକୁ ଶେଷ କରିବା କଥା କେବଳ ରାବଣର ବଂଶଜ କହିପାରେ ବୋଲି କହିଥିଲେ । ଏହି ବ୍ୟକ୍ତିଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବା ଉଚିତ ବୋଲି କହିଥିଲେ ।
ସେହିପରି ଏହି ମନ୍ତବ୍ୟକୁ ନେଇ ସନ୍ଥ ସମାଜରେ ମଧ୍ୟ ପ୍ରବଳ ଅସନ୍ତୋଷ ପ୍ରକାଶ ପାଇଛି । ଅଯୋଧ୍ୟାର ଜଣେ ସନ୍ଥ ଜଗଦଗୁରୁ ପରମହଂସ ଆଚାର୍ଯ୍ୟ ସିଧା ଉଦୟାନିଧିଙ୍କୁ କଠୋର ଚେତାବନୀ ଦେଇଛନ୍ତି । ଏପରି ମନ୍ତବ୍ୟ ଦେଇଥିବା ଉଦୟାନିଧିଙ୍କ ମୁଣ୍ଡକାଟ କଲେ 10 କୋଟି ଟଙ୍କା ପ୍ରଦାନ କରାଯିବ ବୋଲି ଏହି ସନ୍ଥଜଣକ ଘୋଷଣା ମଧ୍ୟ କରିଛନ୍ତି । ଏପରିକି ସେ ଏହି ମନ୍ତବ୍ୟକୁ ବିରୋଧ କରି ଉଦୟାନିଧିଙ୍କର ଏକ ପୋଷ୍ଟରକୁ ଖଣ୍ଡାରେ କାଟିବା ମୁଦ୍ରାରେ ପ୍ରଦର୍ଶିତ କରିଥିଲେ । ଯଦି କେହି ଏପରି କରିବା ପାଇଁ ସାମ୍ନାକୁ ନଆସନ୍ତି, ତେବେ ସେ ନିଜେ ମଧ୍ୟ ଏପରି କରିବାକୁ ପଛାଇବେ ନାହିଁ ବୋଲି ସନ୍ଥଜଣକ କହିଥିଲେ । ଏହି ଘଟଣାରେ ସନ୍ଥ ଓ ସନ୍ୟାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇବାରେ ଲାଗିଛି । ସମସ୍ତେ କାର୍ଯ୍ୟାନୁଷ୍ଠାନ ଦାବି କରିଛନ୍ତି ।
ଏହା ମଧ୍ୟ ପଢନ୍ତୁ:-Remark on Sanatan Dharma: ମୁଜାଫରପୁର କୋର୍ଟରେ ଉଦୟାନିଧିଙ୍କ ବିରୋଧରେ ମାମଲା
ଅନ୍ୟପଟେ ଏହି ମନ୍ତବ୍ୟ ପାଇଁ ଉଦୟାନିଧି ଷ୍ଟାଲିନଙ୍କ ବିରୋଧରେ ବିହାର ମୁଜାଫରପୁର କୋର୍ଟରେ ଏକ ମାମଲା ଦାଏର କରାଯାଇଛି । ମୁଜାଫରପୁରର ସୁଧୀର କୁମାର ଓଝା ନାମକ ଜଣେ ଆଇନଜୀବୀ ଉଦୟାନିଧିଙ୍କ ବିରୋଧରେ ମୁଜାଫରପୁର ସିଭିଲ କୋର୍ଟରେ ଏହି ଆବେଦନ ଦାଖଲ କରିଛନ୍ତି । ଉଦୟାନିଧି ସନାତନ ଧର୍ମ ସମ୍ପର୍କରେ ଦେଇଥିବା ବିବାଦୀୟ ତଥା ଅପମାନଜନକ ମନ୍ତବ୍ୟ ସମଗ୍ର ଦେଶର ହିନ୍ଦୁ ଧର୍ମାବଲମ୍ବୀଙ୍କ ଧାର୍ମିକ ଭାବନାକୁ କଠୋର ଆଘାତ କରିଥିବା ଅଭିଯୋଗକାରୀ ଆବେଦନରେ ଉଲ୍ଲେଖ କରିଛନ୍ତି । ତମାମ ବିରୋଧ ଓ ରାଜନୈତିକ ବୟାନବାଜୀ ମଧ୍ୟରେ ଏବେ ଉଦୟାନିଧି ଷ୍ଟାଲିନଙ୍କବି ରୋଧରେ କଣ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି ତାକୁ ଅପେକ୍ଷା ।
ବ୍ୟୁରୋ ରିପୋର୍ଟ, ଇଟିଭି ଭାରତ
