ଶ୍ରୀନଗର: ଘାଟିରେ ଆତଙ୍କୀ ନିରୋଧୀ ଅପରେସନରେ ସୁରକ୍ଷା ବଳକୁ ବଡ ସଫଳତା ମିଳିଛି । ଆତଙ୍କୀକୁ ଗୁଳିରେ ନିପାତ କରୁଥିବା ସୁରକ୍ଷା ବଳ ହାତରେ 3 ଜଣ ଆତଙ୍କବାଦୀ ଧରା ପଡି ଗିରଫ ହୋଇଛନ୍ତି । ଏହି ଗିରଫ ଆତଙ୍କବାଦୀଙ୍କ ପାଖରୁ ବିପୁଳ ପରିମାଣର ମାରଣାସ୍ତ୍ର ମଧ୍ୟ ଜବତ ହୋଇଛି । ଦୁଇଟି ଭିନ୍ନ ଭିନ୍ନ ଅପରେସନରେ ଏହି ସଫଳତା ମିଳିଥିବା ସୁରକ୍ଷା ବଳ କହିଛି ।
ଅପରେସନ ସମ୍ପର୍କରେ ମିଳିଥିବା ସୂଚନା ଅନୁସାରେ, ଆତଙ୍କବାଦୀଙ୍କ ଉପସ୍ଥିତି ନେଇ ଇନପୁଟ ସୂଚନା ଆଧାରରେ ହାଦିପୁର ଓ କୂରଓ୍ବାରା ଅଞ୍ଚଳରେ ଏହି ଅଭିଯାନ ଆରମ୍ଭ କରିଥିଲା ସୁରକ୍ଷା ବାହିନୀ ଓ ସ୍ଥାନୀୟ ପୋଲିସର ମିଳିତ ଟିମ । ଏନକାଉଣ୍ଟର କରିବା ପରିବର୍ତ୍ତେ ଆତଙ୍କୀଙ୍କୁ ଜୀବନ୍ତ ଧରିବା ପାଇଁ ବିଭିନ୍ନ ସ୍ଥାନରେ ଗାଡି ଚେକିଂ କରିଥିଲେ ସୁରକ୍ଷା ବଳର ଯବାନ ।
ଏହି ରଣନୀତିରେ 3 ହାର୍ଡକୋର ଆତଙ୍କବାଦୀଙ୍କୁ ସୁରକ୍ଷା ବଳ ଗିରଫ କରିବାରେ ସଫଳ ହୋଇଛି । ସମସ୍ତଙ୍କୁ ପଚାର ଉଚରା କରି ଘାଟିରେ ଆତଙ୍କବାଦୀ କାର୍ଯ୍ୟକଳାପ ସମ୍ପର୍କିତ ତଥ୍ୟ ହାସଲ କରିବା ପାଇଁ ପ୍ରାୟାସ ଜାରି ରହିଛି । ଗିରଫ ଆତଙ୍କବାଦୀଙ୍କ ଠାରୁ ଏକାଧିକ ରାଇଫଲ, ଗ୍ରେନେଡ ଓ ଗୁଳିଗୋଳ ମଧ୍ୟ ଜବତ କରାଯାଇଛି । ଗିରଫ ଆତଙ୍କବାଦୀଙ୍କ ପରିଚୟ ସମ୍ପର୍କରେ କିଛି ସ୍ପଷ୍ଟ ସୂଚନା ମିଳିପାରନାହିଁ ।
ବ୍ୟୁରୋ ରିପୋର୍ଟ, ଇଟିଭି ଭାରତ
