ନୂଆଦିଲ୍ଲୀ: ଚାଷୀ ଆନ୍ଦୋଳନ ଆଳରେ ମୋଦି ସରକାରଙ୍କୁ ଟାର୍ଗେଟ କରିଆସୁଥିବା କଂଗ୍ରେସ ଏବେ ଭାରତର ବ୍ୟକ୍ତିବିଶେଷଙ୍କୁ ଅପମାନିତ କରିବାକୁ ପଛାଇନାହିଁ । ରବିବାର ପର୍ଯ୍ୟାବରଣ ସାମାଜିକ କର୍ମୀ ଗ୍ରେଟା ଥନବର୍ଗଙ୍କ ବୟାନର ସମର୍ଥନ କରି ଭାରତର ବଡ ବ୍ୟକ୍ତିତ୍ବଙ୍କୁ ସଂସଦରେ ଅପମାନିତ କରିଛି କଂଗ୍ରେସ । ଲୋକସଭାରେ କଂଗ୍ରେସ ନେତା ଅଧିର ରଞ୍ଜନ ଚୌଧୁରୀ ସୋମବାର ଅଭିଯୋଗ କରିଛନ୍ତି ଯେ ପୂର୍ବତନ ଭାରତୀୟ କ୍ରିକେଟର ସଚିନ ତେନ୍ଦୁଲକର ଏବଂ ବିଶିଷ୍ଟ ଗାୟିକା ଲତା ମଙ୍ଗେଶକରଙ୍କ ଭଳି ସେଲିବ୍ରିଟିମାନେ ଭ୍ରମିତ ହେଉଛନ୍ତି ।
ଆମେରିକାର ପପ ତାରକା ରିହାନା ଏବଂ ଜଳବାୟୁ କାର୍ଯ୍ୟକର୍ତ୍ତା ଗ୍ରେଟା ଥନବର୍ଗଙ୍କ ଟ୍ୱିଟର ବିରୋଧରେ ପରେ ସୋସିଆଲ ମିଡିଆରେ ବହୁ ଭାରତୀୟ ସେଲିବ୍ରିଟି ଦେଶର ଅଖଣ୍ଡତା ବଜାୟ ରଖିବାକୁ ଟ୍ବିଟ କରିଥିଲେ । ତେବେ ଏହାକୁ ନେଇ ଅଧିର ରଞ୍ଜନ କହିଛନ୍ତି, ସଚିନ ତେନ୍ଦୁଲକର ଏବଂ ଲତା ମଙ୍ଗେଶକରଙ୍କ ପରି ସେଲିବ୍ରିଟିମାନେ ଭ୍ରମିତ ହେଉଛନ୍ତି । ଆମ ଦେଶ ଏତେ ଦୁର୍ବଳ ଯେ ଚାଷୀଙ୍କ ସପକ୍ଷରେ କହିଥିବା ଜଣେ 18 ବର୍ଷୀୟ ଝିଅଙ୍କୁ ଶତ୍ରୁ ଭାବରେ ବିବେଚନା କରାଯାଉଛି ବୋଲି ଆଦୀର ଅଧିର ରଞ୍ଜନ ନିଜ ସମ୍ବୋଧନରେ କହିଛନ୍ତି ।
ସେପଟେ ଚାଷୀ ଆନ୍ଦୋଳନରେ ଅନ୍ତରାଷ୍ଟ୍ରୀୟ ସେଲିବ୍ରିଟିଙ୍କ ହସ୍ତକ୍ଷପ ବିରୋଧରେ ସଚିନ ତେନ୍ଦୁଲକର, ଲତା ମଙ୍ଗେସକର ଓ ଅକ୍ଷୟ କୁମାର ସମେତ ଅନେକ ବିଶିଷ୍ଟ ବ୍ୟକ୍ତିଙ୍କ ପକ୍ଷରୁ ଭାରତର ଅଖଣ୍ଡତା ସପକ୍ଷରେ ହୋଇଥିବା ଟ୍ବିଟ୍ର ଯାଞ୍ଚ କରିବାକୁ ଆଦେଶ ନେଇଛନ୍ତି ମହାରାଷ୍ଟ୍ର ସରକାର ।
ପୂର୍ବରୁ ଭାରତର ଆଭ୍ୟନ୍ତରୀଣ ମାମଲାରେ ମୁଣ୍ଡ ନପୁରାଇବାକୁ ବୈଦେଶିକ ମନ୍ତ୍ରଣାଳୟ ବିଦେଶୀ ସେଲିବ୍ରିଟିଙ୍କୁ ଚେତାବନୀ ଦେବା ସତ୍ତ୍ବେ ଭାରତ ଭିତରେ କଂଗ୍ରେସ ସେପରେ ସେଲିବ୍ରିଟିଙ୍କୁ ସମର୍ଥନ କରିବା ନିଶ୍ଚତ ଭାବରେ ଆଶ୍ଚର୍ଯ୍ୟର ବିଷୟ ବୋଲି କୁହାଯାଇପାରେ ।
