ଜୟପୁର: ଟ୍ରକକୁ ଧକ୍କା ଦେଲା କାର । ଗୋଟିଏ ପରିବାରର ୫ ମୃତ । ଏପରି ଏକ ଅଭାବନୀୟ ଘଟଣା ସାମ୍ନାକୁ ଆସିଛି ରାଜସ୍ଥାନର ସାଂଚୋର ଅଞ୍ଚଳରୁ । ସୂଚନାନୁସାରେ, ଜାଲୋର ଜିଲ୍ଲା ଦେଇ ଯାଇଥିବା ୬୮ ନମ୍ବର ଜାତୀୟ ରାଜପଥରେ ରବିବାର ସକାଳେ ଏହି ଦୁର୍ଘଟଣା ଘଟିଛି ।
ପୋଲିସର ସୂଚନାନୁସାରେ, ବାରମର ଜିଲ୍ଲାର ବାୱାତଲାଇ ଗାଁର ଏକ ପରିବାର ରବିବାର ସକାଳେ ଏକ କାର ସହିତ ଯୋଧପୁରରୁ ସାଂଚୋର ଆସୁଥିଲେ । ଏହି ସମୟରେ ଚିତଲୱାନା ପୋଲିସ ଷ୍ଟେସନ ଅଞ୍ଚଳର ଜାତୀୟ ରାଜପଥରେ ଏକ ଟ୍ରକ ସହ କାରଟି ମୁହାଁମୁହିଁ ଧକ୍କା ହୋଇଥିଲା । ଫଳରେ ଘଟଣାସ୍ଥଳରେ 2 ଜଣଙ୍କର ମୃତ୍ୟୁ ହୋଇଥିବାବେଳେ ଡାକ୍ତରଖାନାରେ ଚିକିତ୍ସା ସମୟରେ ତିନି ଜଣଙ୍କର ମୃତ୍ୟୁ ଘଟିଛି ।
ତେବେ ଦୁର୍ଘଟଣାର ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଥିବା ବେଳେ ସମସ୍ତ ମୃତକ ଗୋଟିଏ ପରିବାରର ବୋଲି ଜଣା ପଡ଼ିଛି ।
