ପାଟନା: ଭାରୀତୟ ନୋଟ୍ରେ କାହାରା ଫଟୋ ରହିବା ଆବଶ୍ୟକ ତାହାକୁ ନେଇ ଏବେ ଏକ ଆଲୋଚନା ଆରମ୍ଭ ହୋଇଛି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ୍ ଭାରତୀୟ ନୋଟ୍ରେ ମହାତ୍ମା ଗାନ୍ଧୀଙ୍କ ସହ ଲକ୍ଷ୍ମୀ ଓ ଗଣେଶଙ୍କ ଫଟୋ ଲଗାଇବାକୁ ପ୍ରସ୍ତାବ ଦେଇଥିଲେ । ଏହାକୁ ନେଇ ସେ ପ୍ରଧାନମନ୍ତ୍ରୀଙ୍କୁ ଚିଠି ମଧ୍ୟ ଲେଖିଛନ୍ତି । ବର୍ତ୍ତମାନ ନୋଟ୍ରେ ଆର୍ଜେଡି ସୁପ୍ରିମୋ ଲାଲୁ ପ୍ରସାଦ ଯାଦବ ଓ ପୂର୍ବତନ ବିହାର ମୁଖ୍ୟମନ୍ତ୍ରୀ କର୍ପୂରୀ ଠାକୁରଙ୍କ ଫଟୋ ଲଗାଇବାକୁ ନିବେଦନ କରିଛନ୍ତି ଆର୍ଜେଡି ନେତା ଅରୁଣ କୁମାର (RJD Demand Lalu Photo On Indian Currency )।
ଅରୁଣ କୁମାର କହିଛନ୍ତି, "ଅରବିନ୍ଦ କେଜ୍ରିୱାଲ ଭାରତୀୟ ମୁଦ୍ରାକୁ ମଜଭୁତ କରିବା ପାଇଁ ନୋଟ୍ରେ ଲକ୍ଷ୍ମୀ ଓ ଗଣେଶଙ୍କ ଫଟୋ ଲଗାଇବାକୁ ନିବେଦନ କରିଛନ୍ତି । ଭାରତୀୟ ନୋଟ୍ରେ ଲାଲୁ ଯାଦବ ଓ କର୍ପୂରୀ ଠାକୁରଙ୍କ ଫଟୋ ଲଗାଇବାକୁ ଦାବି କରୁଛି । ଯାହାଫଳରେ ଭରତୀୟ ମୁଦ୍ରା ମଜଭୁତ ହୋଇପାରିବ । ରେଳମନ୍ତ୍ରୀ ଥିବା ବେଳେ ଲାଲୁ ପ୍ରସାଦ ଯାଦବ ସମସ୍ତ ସମସ୍ୟାର ସମାପ୍ତି କରିଥିଲେ । ଆଜି ରେଳ ବିଭାଗ ଲାଭରେ ଚାଲିଛି । ଏଥିପାଇଁ ଲାଲୁଙ୍କ ଫଟୋ ଭାରତୀୟ ମୁଦ୍ରାରେ ଲାଗିବା ଉଚିତ ମୁଁ ଭାବୁଛି ।"
ଏହା ବି ପଢ଼ନ୍ତୁ ନୋଟରେ ଲକ୍ଷ୍ମୀ ଓ ଗଣେଶଙ୍କ ଫଟୋ ପାଇଁ ମୋଦିଙ୍କୁ ଚିଠି ଲେଖିଲେ କେଜ୍ରିୱାଲ
ସେପଟେ ଏଭଳି ଦାବିକୁ ନେଇ ବିଜେପି କଟାକ୍ଷ କରିଛି । ବିଜେପି ନେତା ଅରବିନ୍ଦ ସିଂହ କହିଛନ୍ତି, "ଦଳ ପ୍ରତି ଆନୁଗତ୍ୟର ମଧ୍ୟ ଏକ ସୀମା ରହିଛି । ଯଦି ଲାଲୁଙ୍କ ଫଟୋରେ ରହିବା କଥା କୁହାଯାଉଛି, ତେବେ ତେଜସ୍ବୀ ଯାଦବଙ୍କ କଥା କାହିଁକି ଭୁଲି ଯାଉଛନ୍ତି । ମନ୍ଦିରରେ ଭଗବାନଙ୍କ ସ୍ଥାନ ରହିଛି । ସେହିଭଳି ଭାବରେ ନୋଟ୍ରେ କେବଳ ଜାତୀୟ ପିତାଙ୍କ ସ୍ଥାନ । ଯାହାକୁ ଯାହା ଦାବି କରିବାର କଥା କରନ୍ତୁ ।"
ନୋଟ୍ରେ ନୂଆ ଫଟୋ ଲଗାଇବା କଥା ପ୍ରଥମେ ଅରବିନ୍ଦ କେଜ୍ରିୱାଲ ଉଠାଇଛନ୍ତି । ନୋଟରେ ଗଣେଶ ଓ ଲକ୍ଷ୍ମୀଙ୍କ ଫଟୋ ଲଗାଇବା ପାଇଁ କେନ୍ଦ୍ର ସରକାରଙ୍କ ନିକଟରେ ଅପିଲ୍ କରିଛନ୍ତି । ଏହାଦ୍ବାରା ଦେଶକୁ ଭଗବାନଙ୍କ ଆଶୀର୍ବାଦ ମିଳିବ । ଲକ୍ଷ୍ମୀଙ୍କୁ ସମୃଦ୍ଧିର ଦେବୀ କୁହାଯାଏ । ସେପଟେ ଗଣେଶ ମଧ୍ୟ ସମସ୍ତ ବିଘ୍ନ ଦୂର କରିବେ । ଏହାଦ୍ବାରା ଅର୍ଥ ବ୍ୟବସ୍ଥା ସୁଧୁରି ପାରିବ ବୋଲି କହିଛନ୍ତି ଅରବିନ୍ଦ କେଜ୍ରିୱାଲ ।
ସେପଟେ ଏହି ଆଲୋଚନାରେ କଂଗ୍ରେସ ମଧ୍ୟ ନିଜ ଦାବି ରଖିବାକୁ ପଛାଇ ନାହିଁ । କଂଗ୍ରେସ ନେତା ମନୀଷ ତିୱାରୀ ସୋସିଆଲ ମିଡିଆରେ ଟ୍ବିଟ୍ କରି ଭାରତୀୟ ନୋଟ୍ରେ ବିଆର୍ ଆମ୍ବେଦକରଙ୍କ ଫୋଟ ଲଗାଇବାକୁ ଦାବି କରିଛନ୍ତି । ମହାତ୍ମା ଗାନ୍ଧୀଙ୍କ ସହ ଆମ୍ବେଦକରଙ୍କ ଫଟୋ ଲଗାଇବାକୁ ସେ ଦାବି କରିଛନ୍ତି । ସମ୍ବିଧାନ ପ୍ରଣେତା, ସମଦୃଷ୍ଟି ସମ୍ପନ୍ନ ବ୍ୟକ୍ତିଙ୍କ ଫଟୋ ରହିଲେ ଆଧୁନିକ ଭାରତର ପ୍ରତିଭା ଯୋଡ଼ି ହୋଇ ପାରିବ ବୋଲି ଯୁକ୍ତି ଦର୍ଶାଇଛନ୍ତି ମନୀଷ ତିୱାରୀ ।
