ନୂଆଦିଲ୍ଲୀ: ଆଞ୍ଚଳିକ ଦଳ ଗୁଡିକ 2024 ଲୋକସଭା ନିର୍ବାଚନରେ ବିଜେପି ବିରୋଧରେ ଏକାଠି ଲଢିବା ପାଇଁ ଏକ ମୋର୍ଚ୍ଚାର ଆବଶ୍ୟକତା ରହିଛି ବୋଲି ଶିରୋମଣି ଅକାଳି ଦଳ ମୁଖ୍ୟ ସୁଖବୀର ସିଂ ବାଦଲ କହିଛନ୍ତି । ଦେଶର ସମସ୍ତ ଆଞ୍ଚଳିକ ଦଳ ଏକତ୍ର ହେବାର ଆବଶ୍ୟକତା ରହିଛି । ସେହିପରି ବିଜେପି ସହିତ ଅକାଳୀ ଦଳର ସମ୍ପର୍କ ଶେଷ ହୋଇଯାଇଛି ବୋଲି ସୁଖବୀର କହିଛନ୍ତି ।
ଏହାସହ ସେ ଆହୁରି କହିଛନ୍ତି କି, ଅକାଳୀ ଦଳ କୃଷକଙ୍କ ଦଳ ଓ ସେମାନଙ୍କ ସମସ୍ୟା ହିଁ ଦଳର ମୂଳମନ୍ତ୍ର । ଯାହା ବି ହେଉ ଆମେ ଏହି ନୂତନ କଳା କୃଷକ ଆଇନକୁ ପଞ୍ଜାବରେ ଲାଗୁ କରିବା ପାଇଁ ଦେବୁ ନାହିଁ । ଏହା କୃଷକଙ୍କ ହିତରେ ନାହିଁ । ଏହା ବିରୋଧରେ ଆମେ ଲଢେଇ ଜାରି ରଖିବୁ । ଗତବର୍ଷ ଏହି ବିଲକୁ ବିରୋଧ କରି କେନ୍ଦ୍ରମନ୍ତ୍ରୀ ହରସିମରତ କୌର ଇସ୍ତଫା ଦେଇଥିଲେ । ଏହା ସହ ନୂତନ କୃଷି ଆଇନକୁ ବିରୋଧ କରି ଏନଡିଏରୁ ଓହରି ଥିବା ଶିରୋମଣି ଅକାଳି ଦଳ ।
ପଞ୍ଜାବରେ ଆଗାମୀ ବିଧାନସଭା ନିର୍ବାଚନକୁ ନଜରରେ ରଖି ନିଜର ରାଜନୈତିକ ରଣନୀତି ପ୍ରସ୍ତୁତ କରୁଛି । ଦୀର୍ଘ ବର୍ଷ ଧରି ବିଜେପି ସହିତ ମେଣ୍ଟ ସରକାର କରିଥିବା ଅକାଳି ଦଳ ଶେଷରେ ସମ୍ପର୍କ ଛିନ୍ନ କରିଛନ୍ତି । ପଞ୍ଜାବରେ ବର୍ତ୍ତମାନ ଶିରୋମଣି ଅକାଳି ଦଳ ବିଏସପି ସହ ମେଣ୍ଟ କରି ଆଗାମୀ ବିଧାନସଭା ନିର୍ବାଚନରେ ଅବତୀର୍ଣ୍ଣ ହେବ ।
ସେହିପରି ଆଗାମୀ 2024 ଲୋକସଭା ନିର୍ବାଚନକୁ ନେଇ ମଧ୍ୟ ମତ ରଖିଛନ୍ତି ସୁଖବୀର ସିଂ ବାଦଲ । ଆଞ୍ଚଳିକ ଦଳ ଗୁଡିକ 2024 ଲୋକସଭା ନିର୍ବାଚନରେ ବିଜେପି ବିରୋଧରେ ଲଢିବା ପାଇଁ ଏକତ୍ର ହୋଇ ଲଢିବାର ଆବଶ୍ୟକତା ରହିଛି । ଆଞ୍ଚଳିକ ଦଳ ଗୁଡିକ ନିମ୍ନ ସ୍ତରର ଲୋକଙ୍କ ସହିତ ଜଡିତ ରହିଛନ୍ତି ଲୋକଙ୍କ ସମସ୍ୟାକୁ ନେଇ ଅବଗତ ରହିଛନ୍ତି । ଆମେ ବଭିନ୍ନ ଦଳ ସହିତ କଥାବାର୍ତ୍ତା କରୁଛୁ ଏବଂ ଆଗାମୀ ଲୋକସଭା ନିର୍ବାଚନ ପୂ୍ର୍ବରୁ ଏକ ନୂତନ ମୋର୍ଚ୍ଚାର ଆବଶ୍ୟକତା ରହିଛି ଯାହା ବିଜେପି ବିରୋଧି ଲଢେଇରେ ନିର୍ଣ୍ଣାୟକ ସାବ୍ୟସ୍ତ ହେବ ବୋଲି କହିଛନ୍ତି ।
ସେହିପରି ପେଗାସସ୍ ସ୍ପାଏୱେୟାର ମାଧ୍ୟମରେ ରାଜନେତା, କାର୍ଯ୍ୟକର୍ତ୍ତା ଏବଂ ସାମ୍ବାଦିକଙ୍କ ଗୁପ୍ତଚର ଅଭିଯୋଗ ସମ୍ପର୍କରେ ପଚରାଯିବାରୁ ବାଦଲ ଏହାକୁ ଗଣତନ୍ତ୍ର ଉପରେ ଆକ୍ରମଣ ବୋଲି କହିଛନ୍ତି । ଏହି ଘଟଣାର ଯାଞ୍ଚ ପାଇଁ ବିରୋଧୀଦଳଙ୍କ ନେତୃତ୍ୱରେ ମିଳିତ ସଂସଦୀୟ କମିଟି (ଜେପିସି) ଆହ୍ବାନ କରିଛନ୍ତି ।
ବାଦଲ କହିଛନ୍ତି ଯେ, ଏହି ଗୁପ୍ତଚର ଘଟଣା ସମ୍ବିଧାନ, ଗଣତନ୍ତ୍ର ଏବଂ ଲୋକଙ୍କ ଅଧିକାର ଉପରେ ଆକ୍ରମଣ। ଏହା ସଂପୂର୍ଣ୍ଣ ଅନୈତିକ ଏବଂ ଏହାର ଯାଞ୍ଚ ପାଇଁ ବିରୋଧୀ ସାଂସଦଙ୍କ ନେତୃତ୍ୱରେ ଏକ ଜେପିସି ଗଠନ କରାଯିବା ଉଚିତ ।
