ନୂଆଦିଲ୍ଲୀ: ସଂସଦର ଶୀତ ଅଧିବେଶନ ଚାଲିଥିବା ବେଳେ, ନିଲମ୍ବିତ ବିରୋଧୀ ସାଂସଦମାନେ ଜାରି ରଖିଛନ୍ତି ବିରୋଧ ପ୍ରଦର୍ଶନ । ସଂସଦ ଭିତରେ ଏବଂ ବାହାରେ ପ୍ରତିବାଦ କରୁଛନ୍ତି ଉଭୟ ଗୃହରୁ ନିଲମ୍ବିତ 92 ବିରୋଧୀ ସାଂସଦ । ଏହାରି ଭିତରେ ଏକ ଅଭାବନୀୟ ଘଟଣା ଘଟିଛି । ସଂସଦ ବାହାରେ ବିରୋଧ ପ୍ରଦର୍ଶନ ସମୟରେ ତୃଣମୂଳ କଂଗ୍ରେସ ସାଂସଦ କଲ୍ୟାଣ ବାନାର୍ଜୀ, ରାଜ୍ୟସଭା ଅଧ୍ୟକ୍ଷ ଜଗଦୀପ ଧନକଡ଼ଙ୍କୁ ନେଇ ମିମିକ୍ରି କରିଛନ୍ତି । ଆଉ ଏହାର ଭିଡିଓ ସୁଟ୍ କରିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧି । ଟିଏମସି ସାଂସଦଙ୍କ ଏଭଳି ଆଚରଣକୁ ନିନ୍ଦା କରିଛନ୍ତି ଧନକଡ଼ । ସେ କହିଛନ୍ତି ଯେ ଏହା ଦୁର୍ଭାଗ୍ୟଜନକ ଘଟଣା ।
ସଂସଦରେ ସୁରକ୍ଷା ଭଙ୍ଗ ଏବଂ ବିରୋଧୀ ସାଂସମାନଙ୍କୁ ସସପେଣ୍ଟ ପ୍ରତିବାଦରେ ଆଜି ମଧ୍ୟ ଗୃହ କାର୍ଯ୍ୟ ବାଧାପ୍ରାପ୍ତ ହୋଇଛି । ବିରୋଧୀଙ୍କ ହଙ୍ଗାମା ଯୋଗୁଁ ଉଭୟ ଲୋକସଭା ଏବଂ ରାଜ୍ୟସଭା ମୁଲତବୀ ରହିଥିଲା । ଏପଟେ ସସପେଣ୍ଡ ସାଂସଦମାନେ ସଂସଦ ଦ୍ବାର ଆଗରେ ବିରୋଧ ପ୍ରଦର୍ଶନ କରିଛନ୍ତି । ଏହି ସମୟରେ ତୃଣମୂଳ କଂଗ୍ରେସ ସାଂସଦ କଲ୍ୟାଣ ବାନାର୍ଜୀ, ରାଜ୍ୟସଭା ଅଧ୍ୟକ୍ଷ ଜଗଦୀପ ଧନକଡ଼ଙ୍କୁ ନେଇ ମିମିକ୍ରି କରିଥିଲେ । ରାଜ୍ୟସଭାରେ ଧନକଡ଼ କିପରି କଥାବାର୍ତ୍ତା କରନ୍ତି, ତାର ନକଲ କରିଥିଲେ କଲ୍ୟାଣ ବାନାର୍ଜୀ । ସବୁଠୁ ଗୁରୁତ୍ବପୂର୍ଣ୍ଣ ହେଲା, ଯେତେବେଳେ କଲ୍ୟାଣ ମିମିକ୍ରି କରୁଥିଲେ, ସେତେବେଳେ ଉପସ୍ଥିତ ଥିଲେ କଂଗ୍ରେସ ସାଂସଦ ରାହୁଲ ଗାନ୍ଧି । ରାହୁଲ କେବଳ ଉପସ୍ଥିତ ନିଥିଲେ, ବରଂ ମିମିକ୍ରିର ଭିଡିଓ ସୁଟ୍ କରୁଥିବା ଦେଖିବାକୁ ମିଳିଥିଲା । ଏହି ଦୃଶ୍ୟ ସୋସିଆଲ ମିଡିଆରେ ଭାଇରାଲ ହେବା ପରେ ରାଜନୀତି ମହଲରେ ପ୍ରତିକ୍ରିୟା ପ୍ରକାଶ ପାଇଛି ।
ଟିଏମସି ସାଂସଦ କଲ୍ୟାଣଙ୍କ ଆଚରଣ ଏବଂ ଉଚ୍ଚାରଣକୁ କଡ଼ା ନିନ୍ଦା କରିଛନ୍ତି ରାଜ୍ୟସଭା ଅଧ୍ୟକ୍ଷ ଧନକଡ଼ । ସେ କହିଛନ୍ତି ଯେ, ଏହା ଦୁର୍ଭାଗ୍ୟଜନକ ଘଟଣା । ସେପଟେ ରାହୁଲଙ୍କ ଭିଡିଓ ସୁଟ୍ କୁ ନେଇ ମଧ୍ୟ ଭିନ୍ନ ଭିନ୍ନ ମତ ପ୍ରକାଶ ପାଇଛି । ସଂସଦରେ ସୁରକ୍ଷା ଭଙ୍ଗ ପ୍ରସଙ୍ଗକୁ ନେଇ ଗତ 13 ତାରିଖରୁ ସଂସଦକୁ ଚଲାଇ ଦେଉନାହାନ୍ତି ବିରୋଧୀ । ସଂସଦ ଭିତରେ ଅଶୋଭନୀୟ ଆଚରଣ ପାଇଁ 92ରୁ ଅଧିକ ସାଂସଦଙ୍କୁ ସସପେଣ୍ଡ କରାଯାଇଛି। ଗତକାଲି ଗୋଟିଏ ଦିନରେ 78 ଜଣ ବିରୋଧୀ ସାଂସଦ ନିଲମ୍ବିତ ହୋଇଥିଲେ । ତେବେ ଏଭଳି ଘଟଣା ପ୍ରଥମ ଥର ଘଟିନାହିଁ। 1989 ମସିହାରେ ରାଜୀବ ଗାନ୍ଧି ପ୍ରଧାନମନ୍ତ୍ରୀ ଥିବା ସମୟରେ ଗୋଟିଏ ଦିନରେ 63 ଜଣ ସାଂସଦ ସସପେଣ୍ଡ ହୋଇଥିଲେ।
ବ୍ୟୁରୋ ରିପୋର୍ଟ , ଇଟିଭି ଭାରତ
