ନୂଆଦିଲ୍ଲୀ: ବଢିଲା ପ୍ଲାଟଫର୍ମ ଟିକେଟ । କୋଭିଡ ମହାମାରୀ ଭିତରେ ଅଧିକ ଗହଳିକୁ ଏଡାଇବା ପାଇଁ ଭାରତୀୟ ରେଲୱେ ପକ୍ଷରୁ ପ୍ଲାଟଫର୍ମ ଟିକେଟ ଶୁଳ୍କକୁ ବୃଦ୍ଧି କରାଯାଇଛି ।
ସାରା ଦେଶରେ କୋରୋନା ଭାଇରସ ସଂକ୍ରମଣ ଦେଇ ଗତି କରୁଛି । ଆଉ ଏହାରି ଭିତରେ ଅତ୍ୟଧିକ ଭିଡକୁ ରୋକିବା ଉର୍ଦ୍ଦେଶ୍ୟରେ ପ୍ରମୁଖ ରେଳ ଷ୍ଟେସନରେ ପ୍ଲାଟଫର୍ମ ଟିକେଟ ମୂଲ୍ୟ ବୃଦ୍ଧି ଘୋଷଣା କରାଯାଇଛି ।
ବିଭିନ୍ନ ଷ୍ଟେସନରେ ପ୍ଲାଟଫର୍ମ ଟିକେଟ୍ ମୂଲ୍ୟ 3 ରୁ 5 ଗୁଣ ବୃଦ୍ଧି କରାଯାଇଛି। କେତେକ ଷ୍ଟେସନରେ ଟିକେଟ ଭଡା 10 ଟଙ୍କାରୁ 30 ଟଙ୍କାକୁ ବୃଦ୍ଧି କରାଯାଇଥିବାବେଳେ ମୁମ୍ବାଇ ମହାନଗର ନିଗମ (ଏମଏମଆର) ର କେତେକ ପ୍ରମୁଖ ଷ୍ଟେସନରେ ପ୍ଲାଟଫର୍ମ ଟିକେଟର ମୂଲ୍ୟ 5 ଗୁଣା ବୃଦ୍ଧି କରାଯାଇ 50 ଟଙ୍କା କରାଯାଇଛି ।
ରେଳ ମନ୍ତ୍ରଣାଳୟର ବିବୃତ୍ତି ଅନୁଯାୟୀ, କୁହାଯାଇଛି ଯେ ଷ୍ଟେସନରେ ଭିଡ଼ ନିୟନ୍ତ୍ରଣ କରିବା ଡିଭିଜନାଲ ରେଳ ପରିଚାଳକ (ଡିଆରଏମ)ଙ୍କ ଦାୟିତ୍ବ । ତେଣୁ ଏହା ରେଳ ପ୍ରଶାସନ ଦ୍ବାରା ନିଆଯାଇଥିବା ଏକ ସାମୟିକ ପଦକ୍ଷେପ, ଯାହା ଯାତ୍ରୀମାନଙ୍କ ସୁରକ୍ଷା ଏବଂ ଷ୍ଟେସନରେ ଅତ୍ୟଧିକ ଗହଳି ରୋକିବା ପାଇଁ ନିଆଯାଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
