ପାନାଜୀ: ଏବେ କଂଗ୍ରେସ ଜାରି ରଖିଥିବା ‘ଭାରତ ଯୋଡୋ ଯାତ୍ରା’ ବନ୍ଦ କରି ରାହୁଲ ଗାନ୍ଧୀ ବିଧାନସଭା ନିର୍ବାଚନ ଥିବା ଗୁଜରାଟ ଓ ହିମାଚଳ ପ୍ରଦେଶ ଯାଆନ୍ତୁ । ରାହୁଲ ଗାନ୍ଧୀଙ୍କୁ ଏମିତି କିଛି ପରାମର୍ଶ ଦେଇଛନ୍ତି ଦଳର ସାସଂଦ ତଥା ଗୋଆ ପୂର୍ବତନ ମୁଖ୍ୟମନ୍ତ୍ରୀ ଫ୍ରାନ୍ସିକୋ ସାରଦିନା (Francisco Sardinha on Bharat Jodo yatra )। ଏବେ ଗୁଜୁରାଟ ଓ ହିମାଚଳ ପ୍ରଦେଶରେ ବିଧାନସଭା ନିର୍ବାଚନ ହେଉଥିବା ବେଳେ, ଏପରି ସମୟରେ ରାହୁଲ ଯାତ୍ରା ବନ୍ଦ କରି ସେଠାକୁ ଯାଆନ୍ତୁ ବୋଲି ସେ ପରାମର୍ଶ ଦେଇଛନ୍ତି ।
ସେ କହିଛନ୍ତି, କଂଗ୍ରେସ ହେଉଛି ଗୋଟିଏ ଦଳ ଯାହା ଭାରତୀୟ ଜନତା ପାର୍ଟିକୁ ପରାଜିତ କରିପାରିବାର କ୍ଷମତା ରଖିଛି । କଂଗ୍ରେସ ବର୍ତ୍ତମାନ ୨୦୨୪ ସାଧାରଣ ନିର୍ବାଚନକୁ ଦୃଷ୍ଟିରେ ରଖି ଭାରତ ଯୋଡୋ ଯାତ୍ରାର ଆୟୋଜନ କରିଛି । କନ୍ୟାକୁମାରୀରୁ ଆରମ୍ଭ ହୋଇଥିବା ଏହି ଯାତ୍ରା କାଶ୍ମୀରରେ ଶେଷ ହେବାକୁ ଯାଉଛି । ଏହି ଯାତ୍ରା ୧୫୦ ଦିନରେ 3,570 କିମି ଅତିକ୍ରମ କରି ଶେଷରେ କାଶ୍ମୀରରେ ଶେଷ ହେବାକୁ ଥିବା ବେଳେ ଯାତ୍ରାର ନେତୃତ୍ବ ନେଉଛନ୍ତି ରାହୁଲ ଗାନ୍ଧୀ ।
ସାରଦିନା କହିଛନ୍ତି, ଦଳ ପକ୍ଷରୁ ଆରମ୍ଭ ହୋଇଥିବା ‘ଭାରତ ଯୋଡୋ ଯାତ୍ରା’ ବେଶ ଫଳପ୍ରଦ ହେବାକୁ ଯାଉଛି । ରାହୁଲ ମଧ୍ୟ ଯାତ୍ରାର ପ୍ରଭାବୀ ନେତୃତ୍ବ ନେବାରେ ଲାଗିଛନ୍ତି । ବର୍ତ୍ତମାନ କିନ୍ତୁ ସେ ସେ ଯାତ୍ରାରୁ ସାମୟିକ ବିରତି ନେଇ ବିଧାନସଭା ନିର୍ବାଚନ ସନ୍ନିକଟ ଗୁଜୁରାଟ ଓ ହିମାଚଳ ପ୍ରଦେଶ ଉପରେ ଗୁରୁତ୍ବ ଦିଅନ୍ତୁ । କାରଣ କଂଗ୍ରେସ ହେଉଛି ଏକ ମାତ୍ର ଦଳ ଯାହାକି ବର୍ତ୍ତମାନ ପରିସ୍ଥିତିରେ ଭାରତୀୟ ଜନତା ପାର୍ଟିକୁ ପରାଜିତ କରିପାରିବ । ଆଜି ଦଳୀୟ ହାଇକମାଣ୍ଡ ନିର୍ବାଚନରେ ମତଦାନ କରିବା ଅବସରରେ ଗଣମାଧ୍ୟମ ପ୍ରତିନିଧିଙ୍କ ପ୍ରଶ୍ନରେ ଏପରି ଉତ୍ତର ରଖିଥିଲେ ସାରଦିନା ।
ହିମାଚଳ ପ୍ରଦେଶରେ ନଭେମ୍ବର ୧୨ ରେ ନିର୍ବାଚନ ହେବାକୁ ଥିବା ବେଳେ ଡିସେମ୍ବର ୮ ତାରିଖରେ ଗଣତି ଓ ଫଳାଫଳ ପ୍ରକାଶନ ହେବାର କାର୍ଯ୍ୟସୂଚୀ ସ୍ଥିରକୃତ ହୋଇଛି । ସେହିପରି ଚଳିତ ବର୍ଷ ଡିସେମ୍ବରେ ଗୁଜୁରାଟରେ ମଧ୍ୟ ନିର୍ବାଚନ ହେବାକୁ ଯାଉଛି । ଏହି ଦୁଇ ରାଜ୍ୟରେ ନିର୍ବାଚନ ଥିଲେ ସୁଦ୍ଧା ବିଧାନସଭା ନିର୍ବାଚନ ପରିବର୍ତ୍ତେ ୨୦୨୪ ସାଧାରଣ ନିର୍ବାଚନକୁ କଂଗ୍ରେସ ଅଧିକ ଗୁରୁତ୍ବ ଦେବା ପରି ଅନୁଭବ ହେଉଛି । ରାହୁଲ ଗାନ୍ଧୀ ମଧ୍ୟ ଦଳୀୟ ହାଇକମାଣ୍ଡ ନିର୍ବାଚନରେ କୌଣସି ଆଗ୍ରହ ନଦେଖାଇ ଭାରତ ଯୋଡୋ ଯାତ୍ରାରେ ବ୍ୟସ୍ତ ରହିଛନ୍ତି । ରାହୁଲଙ୍କ ନେତୃତ୍ବରେ ଏହି ଯାତ୍ରା ଏବେ ଦକ୍ଷିଣର ୩ ରାଜ୍ୟ ପରିକ୍ରମା ଶେଷ କରିବାକୁ ବସିଲାଣି । ତାମିଲନାଡୁର କନ୍ୟାକୁମାରୀରୁ ଆରମ୍ଭ ହୋଇଥିବା ଏହି ଯାତ୍ରା କେରଳ ଅତିକ୍ରାନ୍ତ କରି କର୍ଣ୍ଣାଟକରେ ଜାରି ରହିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
