ଚଣ୍ଡିଗଡ: ଅମୃତସର ସ୍ବର୍ଣ୍ଣ ମନ୍ଦିର ଅଘଟଣ ପରେ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନି ଆଜି (ରବିବାର) ଦିନ ଅମୃତସରର ସ୍ବର୍ଣ୍ଣ ମନ୍ଦିର ପରିଦର୍ଶନ କରିଛନ୍ତି । ମନ୍ଦିର ପରିଦର୍ଶନ କରି ଗତକାଲି ଘଟିଥିବା ଅଘଟଣ ସମ୍ପର୍କରେ ସମୀକ୍ଷା କରିଛନ୍ତି ମୁଖ୍ୟମନ୍ତ୍ରୀ ଚନ୍ନୀ ।
ମନ୍ଦିରରେ ପ୍ରାର୍ଥନା କରିବା ପରେ ସ୍ଥିତି ସମୀକ୍ଷା ସହ ଗଣମାଧ୍ୟମକୁ ସୂଚନା ଦେଇ ମୁଖ୍ୟମନ୍ତ୍ରୀ ଚନ୍ନି କହିଛନ୍ତି, ଆମେ ସମସ୍ତ ଧର୍ମର ଧାର୍ମିକ କେନ୍ଦ୍ରକୁ ସମ୍ମାନ ଏବଂ ସୁରକ୍ଷା ଦେବା ଆବଶ୍ୟକ । ସାମ୍ପ୍ରଦାୟିକ ସୌହାର୍ଦ୍ଧ୍ୟ ରକ୍ଷା କରିବା ପାଇଁ ରାଜ୍ୟବାସୀଙ୍କୁ ନିବେଦନ କରୁଛୁ । ବିଧାନସଭା ନିର୍ବାଚନ ପାଖେଇ ଆସୁଥିବାରୁ ଏପରି ଅଭାବନୀୟ ଘଟଣା ପଞ୍ଜାବ ଉପରେ କୁପ୍ରଭାବ ପକାଇବା ସହ ସ୍ଥିରତା ନଷ୍ଟ ମଧ୍ୟ କରିପାରେ ।
ଘଟଣାର ତଦନ୍ତ ଆରମ୍ଭ ହୋଇସାରିଥିବା ବେଳେ ମୁଖ୍ୟମନ୍ତ୍ରୀ ଚନ୍ନି ପଞ୍ଜାବ ବରିଷ୍ଠ ପୋଲିସ ଏବଂ ପ୍ରଶାସନିକ ଅଧିକାରୀଙ୍କ ସହ ବୈଠକ କରିପାରନ୍ତି ବୋଲି ମଧ୍ୟ ଆଶା କରାଯାଉଛି । ଏହାପୂର୍ବରୁ ପଞ୍ଜାବର ଉପ ମୁଖ୍ୟମନ୍ତ୍ରୀ ସୁଖଜିନ୍ଦର ସିଂ ରାନ୍ଧୱା ମଧ୍ୟ ରାଜ୍ୟର ବରିଷ୍ଠ ପୋଲିସ ଅଧିକାରୀଙ୍କ ବୈଠକ କରିବା ସହ ଘଟଣା ସମ୍ପର୍କରେ କେନ୍ଦ୍ରକୁ ଜଣାଇବେ ବୋଲି କହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
