ପାଟନା: ପୁଣି ରାମଚରିତ ମାନସକୁ ନେଇ ବିବାଦୀୟ ମନ୍ତବ୍ୟ ଦେଇଛନ୍ତି ବିହାର ଶିକ୍ଷା ମନ୍ତ୍ରୀ ଚନ୍ଦ୍ରଶେଖର । ହିନ୍ଦୀ ଦିବସ ଅବସରରେ ମନ୍ତ୍ରୀ ଚନ୍ଦ୍ରଶେଖର ବିହାର ହିନ୍ଦୀ ଗ୍ରନ୍ଥ ଏକାଡେମୀ କାର୍ଯ୍ୟକ୍ରମରେ ଯୋଗ ଦେଇ ରାମଚରିତ ମାନସରେ ପୋଟାସିୟମ ସିଆଇନାଇଡ ରହିଛି ବୋଲି କହିଥିଲେ । ଯାହାକୁ ଆଜି ରାଜ୍ୟ ବିଜେପି ପକ୍ଷରୁ କଡ଼ା ସମାଲୋଚନା କରାଯାଇଛି । ଏକ ଭିଡିଓ ବାର୍ତ୍ତା ମାଧ୍ୟମରେ ରାଜ୍ୟ ବିଜେପି ମୁଖପାତ୍ର ଅରବିନ୍ଦ ସିଂ ଶିକ୍ଷାମନ୍ତ୍ରୀଙ୍କ ଏହି ଧର୍ମବିରୋଧୀ ମନ୍ତବ୍ୟକୁ ଦୃଢ ନିନ୍ଦା କରିଛନ୍ତି ।
ସେ ବିହାର ହିନ୍ଦୀ ଗ୍ରନ୍ଥ ଏକାଡେମୀ କାର୍ଯ୍ୟକ୍ରମରେ ଯୋଗ ଦେଇ କହିଥିଲେ, "ରାମଚରିତ ମାନସରେ ପୋଟାସିୟମ ସିଆନାଇଡ ରହିଛି । ଯେତେବେଳେ ପର୍ଯ୍ୟନ୍ତ ଏହା ରହିବ ସେତେବେଳ ପର୍ଯ୍ୟନ୍ତ ଏହାକୁ ବିରୋଧ କରାଯିବ ।" ରାମଚରିତ ମାନସର ଅରଣ୍ୟକାଣ୍ଡରେ ବର୍ଣ୍ଣିତ ଶ୍ଳୋକ 'ପୁଜାହି ବିପ୍ର ସକଳ ଗୁଣା ହିନା, ଶୁଦ୍ର ନ ପୁଜହୁ ବେଦ ପ୍ରବୀଣା' ଦୋହରାଇ ଏହା ଉପରେ ପ୍ରଶ୍ନ ଉଠାଇଥିଲେ । ଏଭଳି ମନ୍ତବ୍ୟ ଦେଇ ଧାର୍ମିକ ଭାବନାକୁ ରାଜ୍ୟ ଶିକ୍ଷା ମନ୍ତ୍ରୀ ଆଘାତ ଦେଇଥିବା ଅଭିଯୋଗ କରି ବର୍ଷିଛି ବିଜେପି ।
ଶିକ୍ଷା ମନ୍ତ୍ରୀ ଚନ୍ଦ୍ରଶେଖର ଅରଣ୍ୟକାଣ୍ଡର ଏକ ଶ୍ଳୋକକୁ ନେଇ କହିଥିଲେ, " ଏଥିରେ ଜାତି ବିଷୟରେ କିଛି ଭୁଲ୍ କୁହାଯାଇ ନାହିଁ କି ? ଗତ ଥର ରାମଚରିତମାନସର ସୁନ୍ଦର କାଣ୍ଡଙ୍କ ଉପରେ ଦେଇଥିବ ମନ୍ତବ୍ୟ ଲାଗି ଜିଭ କାଟିବା ଲାଗି ୧୦ କୋଟି ଟଙ୍କା ପୁରସ୍କାର ରାଶି ଧାର୍ଯ୍ୟ କରାଯାଇଥିଲା । ତେବେ ଏଥର ମୋ ବେକ କାଟିବା ଲାଗି ପୁରସ୍କାର ରାଶି କ'ଣ ରହିବ ?" ଶିକ୍ଷାମନ୍ତ୍ରୀଙ୍କ ଏହି ବିବୃତ୍ତି ଉପରେ ବିଜେପି ମୁଖପାତ୍ର ଅରବିନ୍ଦ ସିଂ କହିଛନ୍ତି ଯେ ଶିକ୍ଷାମନ୍ତ୍ରୀ ନିଜେ ହେଉଛନ୍ତି ଜଣେ ସାମାଜିକ ସିଆନାଇଡ୍ ।
ଏନେଇ ବିଜେପି ମୁଖପାତ୍ର ଅରବିନ୍ଦ ସିଂ କହିଛନ୍ତି, "ସମାଜରେ ବିଷ ଭରିବା ଲାଗି ଶିକ୍ଷା ମନ୍ତ୍ରୀ ବ୍ୟାକୁଳ ଅଛନ୍ତି । ଆରଜେଡି ବିହାର ପାଇଁ ସିଆନାଇଡ୍ ଅଟେ । RJD ହେଉଛି ସାମାଜିକ ସିଆନାଇଡ୍, ହତ୍ୟା, ଅପରାଧ, ଜାତିଗତ ବିବାଦ ଏବଂ ଧାର୍ମିକ ଘୃଣା ବିସ୍ତାର କରୁଛି । ଶିକ୍ଷାମନ୍ତ୍ରୀ ଶିକ୍ଷା ପାଇଁ ସିଆନାଇଡ୍ । ସେଥିପାଇଁ ସେମାନେ ରାମଚରିତମାନସ ବିଷୟରେ ଏପରି ଆପତ୍ତିଜନକ ମନ୍ତବ୍ୟ ଦେଉଛନ୍ତି । ରାମଚରିତ ମାନସକୁ ଆରଜେଡିର କୌଣସି ନେତା ଭଲ ଭାବେ ପଢ଼ିନାହାନ୍ତି । ଏଥିଲାଗି ଏପରି ବୟାନବାଜି କରୁଛନ୍ତି ।"
ବ୍ୟୁରୋ ରିପୋର୍ଟ, ଇଟିଭି ଭାରତ
