ହାଇଦ୍ରାବାଦ: କୁକୁଡା ଗୋଡରେ ପଡିଛି ହାତକଡି । ତେଲେଙ୍ଗାନାରେ ଏକ କୁକୁଡାକୁ ଗିରଫ କରାଯାଇଥିବା ନେଇ ସାମ୍ନାକୁ ଆସିଛି ଅଜବ ଘଟଣା । ଜଣେ ବ୍ୟକ୍ତିଙ୍କ ହତ୍ୟା ଘଟଣାରେ ଏକ କୁକୁଡାକୁ ଗିରଫ କରିଛି ତେଲେଙ୍ଗାନା ପୋଲିସ । ତେବେ ଏହି ଘଟଣାରେ କୁକୁଡାକୁ ଜାମିନ ମିଳିଛି ।
ତେଲେଙ୍ଗାନାର ଜଗତିଆଲ ଜିଲ୍ଲା ଲୋଥୁନୁରରେ ଘଟିଛି ଏହି ଘଟଣା । ପୋଲିସ କୁକୁଡାକୁ ଗିରଫ କରି ଗୋଲାପଲ୍ଲି ପୋଲିସ ଷ୍ଟେସନ ହାଜତରେ ରଖାଯାଇଥିଲା ।
ଲୋଥୁନୁର ନିବାସୀ ତନୁଗୁଲୁ ଶତୀଶ ଏକ ବେଆଇନ ଗଞ୍ଜା ଲଢେଇର ଆୟୋଜନ କରିଥିଲେ । ଶତୀଶ ଯେତେବେଳେ ଗଞ୍ଜା ଗୋଡରେ ଛୁରୀ ବାନ୍ଧୁଥିଲେ ସେତେବେଳେ ଏହା ଅସାବଧାନତା ବଶତଃ ତାଙ୍କ ଗୁପ୍ତାଙ୍ଗରେ ବାଜିଥିଲା । ତେବେ ସଙ୍ଗେସଙ୍ଗେ ସ୍ଥାନୀୟ ବାସିନ୍ଦା ତାଙ୍କୁ ଜଗତିଆଲ ହସ୍ପିଟାଲରେ ଭର୍ତ୍ତି କରିଥିଲେ । ହେଲେ ଡାକ୍ତର ଏଠାରେ ଶତୀଶଙ୍କୁ ମୃତ ଘୋଷଣା କରିଛନ୍ତି ।
