କେବାଡିଆ: ଗୁଜୁରାଟର କେବାଡିଆରେ ପହଞ୍ଚିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । ସେଠାରେ ଆଜି ମିଳିତ କମାଣ୍ଡରସ୍ତରୀୟ କନଫରେନ୍ସିର ତୃତୀୟ ତଥା ଅନ୍ତିମ ଦିନର କାର୍ଯ୍ୟକ୍ରମକୁ ଉଦବୋଧନ କରିବେ ମୋଦି । ଷ୍ଟାଚ୍ୟୁ ଅଫ ୟୁନିଟ ନିକଟରେ ବରିଷ୍ଠ ସେନା ଅଧିକାରୀଙ୍କ କାର୍ଯ୍ୟକ୍ରମ ଅନୁଷ୍ଠିତ ହୋଇଛି । ଯୁଦ୍ଧ ରଣନୀତି ଉପରେ ଆଲୋଚନା କରିପାରନ୍ତି ମୋଦି ।
ଆଜି ସକାଳରେ ଅହମ୍ମଦାବାଦର ବିମାନ ବନ୍ଦରରେ ପହଞ୍ଚିବା ପରେ କେବାଡିଆକୁ ଗସ୍ତ କରିଛନ୍ତି ପ୍ରଧାନମନ୍ତ୍ରୀ । କେବାଡିଆ ରାଜଧାନୀ ଠାରୁ 200 କିମି ଦୂର । ଏହି ସମୟରେ ପ୍ରଧାନମନ୍ତ୍ରୀଙ୍କୁ ପାଛୋଟି ନେବାକୁ ରାଜ୍ୟପାଳ ଆଚାର୍ଯ୍ୟ ଦେବବ୍ରତ, ମୁଖ୍ୟମନ୍ତ୍ରୀ ବିଜୟ ରୂପାଣୀ ଏବଂ ଉପମୁଖ୍ୟ ନିତିନ ପଟେଲ ଉପସ୍ଥିତ ଥିଲେ ।
ମୋଦିଙ୍କ ଦ୍ବିତୀୟ ପାଳିରେ ପ୍ରଥମ ଥର ପାଇଁ ବରିଷ୍ଠ ସୈନ୍ୟ ଅଧିକାରୀଙ୍କୁ ନେଇ ସମ୍ମିଳନୀ କରାଯାଇଛି । ଏହି କାର୍ଯ୍ୟକ୍ରମରେ ତିନି ସେନାର ପ୍ରମୁଖ ନିଜ ନିଜ କ୍ଷେତ୍ରରେ ନେଇଥିବା ପ୍ରକଳ୍ପ ଉପରେ ଆଲୋଚନା କରିବେ । ଏହି କାର୍ଯ୍ୟକ୍ରମରେ ସିଡିଏସ ମୁଖ୍ୟ ସାମିଲ ରହିଛନ୍ତି । ତେବେ ଏହି ସମ୍ମିଳନୀରେ ଯବାନମାନେ ଯୋଗ ଦେଇଛନ୍ତି ।
ଏହି ସମ୍ମିଳନୀରେ ପ୍ରତିରକ୍ଷା ଅଧ୍ୟକ୍ଷ ଜେନେରାଲ ବିପିନ ରାୱତ, ସେନା ମୁଖ୍ୟ ଏମଏମ ନରୱାଣେ, ବାୟୁସେନା ମୁଖ୍ୟ ଆରକେଏସ ଭଦୋରିଆ, ନୌସେନା ପ୍ରମୁଖ ଆଡମିରାଲ କରମବୀର ସିଂ ଏବଂ ପ୍ରତିରକ୍ଷା ଏବଂ ସଶସ୍ତ୍ର ବାହିନୀର ବରିଷ୍ଠ ଅଧିକାରୀମାନେ ଯୋଗ ଦେଇଛନ୍ତି । ଗତକାଲି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ କେବାଡିଆର ପହଞ୍ଚି କାର୍ଯ୍ୟକ୍ରମରେ ସାମିଲ ହୋଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
