ବେଙ୍ଗାଲୁରୁ: ମଝି ଆକାଶରେ ଉଡୁଥିଲା ଆକାଶ ଏୟାର ବିମାନ । ଶୌଚାଳୟରେ ବିଡି ଟାଣିଲେ ଯାତ୍ରୀ । ଅଭିଯୋଗ ପରେ 56 ବର୍ଷୀୟ ବ୍ୟକ୍ତିଙ୍କୁ ଗିରଫ କଲା ପୋଲିସ । କେମ୍ପେଗୋଡା ଅନ୍ତର୍ଜାତୀୟ ବିମାନ ବନ୍ଦରରୁ ବ୍ୟକ୍ତି ଜଣଙ୍କୁ ଗିରଫ କରାଯାଇଛି । ଯାତ୍ରୀଙ୍କ ଜୀବନ ପ୍ରତି ବିପଦ ଥିବା ଦର୍ଶାଇ କେଆଇଏ ପୋଲିସ ନିକଟରେ ଏୟାରଲାଇନ୍ସର ଡ୍ୟୁଟି ମ୍ୟାନେଜର ଅଭିଯୋଗ କରିଥିଲେ । ଗିରଫ ବ୍ୟକ୍ତି ଜଣଙ୍କ ରାଜସ୍ଥାନ ମାରଓ୍ବାର ଅଞ୍ଚଳର ପ୍ରବୀଣ କୁମାର ।
ଗତ ମଙ୍ଗଳବାର ଦିନ ଆକାଶ ଏୟାର ବିମାନ QP1326 ଅହମ୍ମଦାବାଦରୁ ବେଙ୍ଗାଲୁରୁ ଅଭିମୁଖେ ଉଡାଣ ଆରମ୍ଭ କରିଥିଲା । ବିମାନଟି ମଝି ଆକାଶରେ ଉଡୁଥିବା ବେଳେ ପ୍ରବୀଣ କୁମାର ନାମକ ଯାତ୍ରୀ ଶୌଚାଳୟରେ ବିଡି ଟାଣୁଥିଲେ । ଏହାପରେ ବିମାନରେ ଥିବା କ୍ରୁମେମ୍ବର ଯାତ୍ରୀ ଜଣଙ୍କୁ ତାଗିତ୍ କରିଥିଲେ । କେମ୍ପେଗୋଡା ଅନ୍ତର୍ଜାତୀୟ ବିମାନ ବନ୍ଦରରେ ବିମାନଟି ଅବତରଣ କରିବା ପରେ ସ୍ଥାନୀୟ ପୋଲିସ ତାଙ୍କୁ ଗିରଫ କରିଥିଲା । ଏହି ଘଟଣାର ତଦନ୍ତ ଅଧିକ ତଦନ୍ତ ପାଇଁ ଆମେ ଅଧିକାରୀମାନଙ୍କୁ ସହଯୋଗ କରୁଛୁ ବୋଲି ଆକାଶ ଏୟାର ଏକ ବିବୃତ୍ତି ଜାରି କରି କହିଛି । ଗିରଫ ଯାତ୍ରୀ ଜଣଙ୍କ କହିଛନ୍ତି, ''ମୁଁ ନିୟମିତ ଭାବେ ଟ୍ରେନରେ ଯାତ୍ରା କରେ । ଯାତ୍ରା ସମୟରେ ଟ୍ରେନ ଶୌଚାଳୟରେ ଧୂମପାନ କରେ । ତେଣୁ ବିମାନରେ ମଧ୍ୟ ମୁଁ ଧୂମପାନ କରିଥିଲି। ''
ଏହା ମଧ୍ୟ ପଢନ୍ତୁ-ଫସଫେଟ ଓ ପଟାସ ଉପରେ ପୋଷକ ତତ୍ତ୍ବ ଆଧାରିତ ସବସିଡି ସଂଶୋଧନକୁ କ୍ୟାବିନେଟ ମଞ୍ଜୁରୀ
ଗତ ମାର୍ଚ୍ଚ ମାସରେ ଇଣ୍ଡିଗୋ ବିମାନରେ ଜଣେ ଯାତ୍ରୀ ଧୂମପାନ କରିଥିବା ଖବର ସାମ୍ନାକୁ ଆସିଥିଲା । ମୁମ୍ବାଇରୁ ଗୋରଖପୁରକୁ ଉଡ଼ାଣ ଭରୁଥିବା ଇଣ୍ଡିଗୋ ବିମାନରେ ଯାତ୍ରୀ ଜଣକ ଧୂମପାନ କରୁଥିବା ନେଇ ଇଣ୍ଡିଗୋ ବିମାନ କର୍ତ୍ତୃପକ୍ଷ ସୂଚନା ଦେଇଥିଲେ । ଧୂଆଁ ହେବାରୁ ବିମାନରେ ଫାୟାର ଆଲାର୍ମ ବାଜିଥିଲା । ଏହାପରେ ବିମାନ କର୍ମଚାରୀଙ୍କୁ ତାଗିଦ କରିଥିଲେ । ପରେ ଉକ୍ତ ଯୁବକଙ୍କ ବିରୋଧରେ ମାମଲା ରୁଜୁ କରାଯିବା ପରେ ତାଙ୍କୁ ଗିରଫ କରିଥିଲା ପୋଲିସ ।
ବିମାନରେ ଧୂମପାନ କରୁଥିବା ଯୁବକ ଜଣଙ୍କ ବିହାର ଗୋପାଳଗଞ୍ଜ ଜିଲ୍ଲାର ମହେଶପୁରର କ୍ରୀଷ୍ଣା କୁମାର ମିଶ୍ରା । ଏହା ପୂର୍ବରୁ ବିମାନରେ ଜଣେ 24 ବର୍ଷର ଯୁବତୀ ଧୂମପାନ କରି ଗିରଫ ହୋଇଥିଲେ । ବିମାନରେ ଏଭଳି ଅନେକ ବିରଳ ଘଟଣା କ୍ରମଶଃ ଭାବେ ସାମ୍ନାକୁ ଆସିବାରେ ଲାଗି ଛି। ପୂର୍ବରୁ ଜଣେ ଯୁବକ ବିମାନରେ ଯାତ୍ରା ସମୟରେ ତାଙ୍କ ସହଯାତ୍ରୀଙ୍କ ଉପରେ ପରିସ୍ରା କରିଥିବା ଖବର ସାମ୍ନାକୁ ଆସିଥିଲା । ଏହାପରେ ତାଙ୍କୁ ଗିରଫ କରାଯାଇ ଦଣ୍ଡିତ ମଧ୍ୟ କରାଯାଇଥିଲା ।
