ନୂଆଦିଲ୍ଲୀ: ମଣିପୁର ପ୍ରସଙ୍ଗକୁ ନେଇ ସଂସଦରେ ଅଚଳବସ୍ଥା ଜାରି ରହିଛି । ମୌସୁମୀ ଅଧିବେଶନର ଚତୁର୍ଥ ଦିନରେ ମଧ୍ୟ ଗୃହ କାର୍ଯ୍ୟ ଆରମ୍ଭ ହେଉ ହେଉ ବିରୋଧିଙ୍କ ପ୍ରବଳ ହଟ୍ଟଗୋଳ ଦେଖିବାକୁ ମିଳିଛି । ମଣିପୁର ସ୍ଥିତି ସମ୍ପର୍କରେ ଗୃହରେ ପ୍ରଧାନମନ୍ତ୍ରୀଙ୍କ ବିବୃତ୍ତି ଦାବି କରି ହଙ୍ଗମା କରୁଛନ୍ତି ବିରୋଧି ଦଳ । ଲୋକସଭା ବାଚସ୍ପତି ଓମ ବିର୍ଲା ସଦନରେ ପହଞ୍ଚିବା ମାତ୍ରେ ବିରୋଧୀ ସାଂସଦମାନେ ହାତରେ ପ୍ଲାକାର୍ଡ ଧରି ହୋହଲ୍ଲା ଆରମ୍ଭ କରିଥିଲେ । ଯେଉଁ କାରଣରୁ ବାଚସ୍ପତି ଦିନ ୨ଟା ଯାଏଁ ଲୋକସଭା ମୁତଲବୀ ରଖିଛନ୍ତି । ଉଚ୍ଚ ସଦନରେ ମଧ୍ୟ ବିରୋଧୀଙ୍କ ହୋହଲ୍ଲା ଜାରି ରହିଛି ।
ମଣିପୁର ତାତିକୁ ନେଇ ସଂସଦ ଚାଲି ପାରୁନଥିବା ବେଳେ ଏହି ପରିପ୍ରେକ୍ଷୀରେ ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବିଜେପିର ସଂସଦୀୟ ଦଳ ବୈଠକ ବସିଛି । ଏଥିରେ ବିରୋଧୀ ଦଳକୁ କାଉଣ୍ଟର କରିବାକୁ ରଣନୀତି ଉପରେ ଚର୍ଚ୍ଚା କରାଯାଇଛି । ଏହାସହିତ ଚଳିତ ଅଧିବେଶନରେ ଉପସ୍ଥାପନ ହେବାକୁ ଥିବା ଏକାଧିକ ଗୁରୁତ୍ବପୂର୍ଣ୍ଣ ବିଲ୍ ପ୍ରସଙ୍ଗରେ ବିଚାର ବିମର୍ଶ କରାଯାଇଛି । ମଣିପୁର ପ୍ରସଙ୍ଗରେ ମଧ୍ୟ ବିଷଦ୍ ଆଲୋଚନା ହୋଇଛି ।
ବୈଠକରେ ପ୍ରଧାନମନ୍ତ୍ରୀ ମୋଦି କହିଛନ୍ତି, ଆଜି ଯାଏଁ କେବେହେଲେ ସେ ଏଭଳି ଦିଶାହୀନ ବିରୋଧୀ ଦେଖାନାହାନ୍ତି । ବିରୋଧୀ ଦଳ ହତାଶ ହୋଇଯାଇଛନ୍ତି । ଲମ୍ବା ସମୟ ଯାଏଁ କ୍ଷମତାରେ ରହିବାକୁ ସେମାନଙ୍କର ଇଚ୍ଛା ନାହିଁ । ଇଷ୍ଟ ଇଣ୍ଡିଆ କମ୍ପାନୀ ନିଜ ନାଁ ଆଗରେ ଇଣ୍ଡିଆ ଲଗାଇଥିଲା ଏବଂ ଇଣ୍ଡିଆନ ମୁଜାହିଦ୍ଦିନରେ ବି ବ୍ୟବହାର ହୋଇଛି ।
ବିଜେପିର ସଂସଦୀୟ ଦଳ ବୈଠକରେ ଗୃହମନ୍ତ୍ରୀ ଅମିତ ଶାହ, ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ, ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡାଙ୍କ ସମେତ ବଡ଼ ବଡ଼ ନେତା ସାମିଲ ହୋଇଛନ୍ତି । ମୌସୁମୀ ଅଧିବେଶନ ଆରମ୍ଭ ହେବା ପରେ ଏହା ବିଜେପି ସଂସଦୀୟ ଦଳର ପ୍ରଥମ ବୈଠକ । ସଂସଦର ଲାଇବ୍ରେରୀ ବିଲ୍ଡିଂରେ ବୈଠକ ବସିଥିଲା । ଅନ୍ୟପଟେ କଂଗ୍ରେସ ଅଧ୍ୟକ୍ଷ ତଥା ରାଜ୍ୟସଭାର ବିରୋଧୀ ଦଳ ନେତା ମଲ୍ଲିକାର୍ଜୁନ ଖଡଗେଙ୍କ ଅଫିସରେ ମଧ୍ୟ ନବଗଠିତ ବିରୋଧୀ ମେଣ୍ଟ INDIAର ନେତାମାନେ ଏକଜୁଟ ହୋଇଛନ୍ତି ।
