ମୁମ୍ବାଇ: ଶିଳ୍ପପତି ମୁକେଶ ଅମ୍ବାନୀଙ୍କ ଘର ଆଣ୍ଟିଲିଆ ସାମ୍ନାରୁ ବିସ୍ଫୋରକ ଭର୍ତ୍ତି ଗାଡି ଜବତ ଓ ଏଥିରେ ମୁମ୍ବାଇ ପୋଲିସ ଅଧିକାରୀ ସଚିନ ଓ୍ବାଜେ ଗିରଫ ଘଟଣାରେ ନାଟକୀୟ ମୋଡ ଦେଖିବାକୁ ମିଳିଛି । ଏହି ଘଟଣାରେ ମହାରାଷ୍ଟ୍ର ମୁଖ୍ୟମନ୍ତ୍ରୀ ଉଦ୍ଧବ ଠାକରେଙ୍କୁ ଚିଠି ଲେଖିଛନ୍ତି ମୁମ୍ବାଇର ପୂର୍ବତନ ପୋଲିସ କମିଶନର ପରମବୀର ସିଂ । ଏହି ଚିଠିରେ ସେ ସିଧାସଳଖ ମହାରାଷ୍ଟ୍ରର ଗୃହମନ୍ତ୍ରୀ ଅନୀଲ ଦେଶମୁଖଙ୍କୁ ଘଟଣାର ମୁଖ୍ୟ ଷଡଯନ୍ତ୍ରକାରୀ ବୋଲି ଦର୍ଶାଇଥିବା ସୂଚନା ରହିଛି ।
ଚିଠିରେ ପରମବୀର ସିଂ ଲେଖିଛନ୍ତି ଯେ ଏହି ବିସ୍ଫୋରକ ଗାଡି ରଖିବା ଘଟଣାରେ ଅନିଲଙ୍କ ହାତ ଅଛି । ସେ ହିଁ ପୋଲିସ ଅଧିକାରୀ ସଚିନ ଓ୍ବାଜେଙ୍କୁ ନିୟୋଜିତ କରିଥିଲେ । ଏଥିପାଇଁ ସଚିନ ଓ୍ବାଜେଙ୍କୁ 100 କୋଟି ଟଙ୍କାର ପ୍ରଲୋଭନ ଦେଇଥିଲେ ଗୃହମନ୍ତ୍ରୀ ଅନିଲ ଦେଶମୁଖ । ଫଳରେ ଅନିଲଙ୍କ ଇଙ୍ଗିତରେ ଏହି ଷଡଯନ୍ତ୍ରକୁ ସଚିନ ରୂପ ଦେଇଛନ୍ତି ବୋଲି ଚିଠିରେ ଅଭିଯୋଗ କରିଛନ୍ତି ପୋଲିସ କମିଶନର ପରମବୀର ସିଂ ।
ତେବେ ଏପରି ସାଙ୍ଘାତିକ ଅଭିଯୋଗକୁ ଖଣ୍ଡନ କରିଛନ୍ତି ଗୃହମନ୍ତ୍ରୀ ଅନୀଲ ଦେଶମୁଖ । ପରମବୀର ସିଂ ନିଜକୁ ରକ୍ଷା କରିବା ପାଇଁ ଏପରି ଏକ ଷଡଯନ୍ତ୍ର କରୁଥିବା କହିଛନ୍ତି ଅନିଲ ଦେଶମୁଖ । ଏନଆଇଏ ତଦନ୍ତରେ ପରମବୀର ସିଂଙ୍କ ନାମ ସାମ୍ନାକୁ ଆସିବା ପରେ ସେ ମଧ୍ୟ ଜେରାର ସାମ୍ନା କରିବାକୁ ଯାଉଛନ୍ତି । ତେଣୁ ସେ ନିଜକୁ ବଞ୍ଚାଇବା ପାଇଁ ତାଙ୍କ ଉପରେ ମିଥ୍ୟା ଓ ଭିତ୍ତିହୀନ ଅଭିଯୋଗ ଆଣୁଥିବା ଏକ ଟ୍ବିଟରେ କହିଛନ୍ତି ଅନିଲ । ତେବେ ଏହି ଘଟଣା ସାମ୍ନାକୁ ଆସିବା ପରେ ମହାରାଷ୍ଟ୍ର ସରକାରଙ୍କ ଅଡୁଆ ବଢିବାରେ ଲାଗିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
