ଶ୍ରୀନଗର: ଜମ୍ମୁ କାଶ୍ମୀର ସାମ୍ବା ଜିଲ୍ଲାରେ ଥିବା ଅନ୍ତର୍ଜାତୀୟ ସୀମା ନିକଟରୁ ଏକ ପାକିସ୍ତାନ ନାଗରିକକୁ ଗିରଫ କରାଯାଇଛି । ତେବେ ଉକ୍ତ ବ୍ୟକ୍ତି ସୀମା ଉଲ୍ଲଘଂନ କରି ଭାରତକୁ ପ୍ରବେଶ କରୁଥିବାରୁ ତାକୁ ଗିରଫ କରାଯାଇଥିବା ବିଏସଏଫ ଯବାନ ରବିବାର ସୂଚନା ଦେଇଛନ୍ତି ।
ତେବେ ଉକ୍ତ ପାକିସ୍ତାନୀ ଶନିବାର ବିଳମ୍ବିତ ରାତିରେ ଭାରତର ସୀମା ମଧ୍ୟକୁ ପ୍ରବେଶ କରିବାକୁ ଉଦ୍ୟମ କରୁଥିଲା । ସୀମା ନିକଟରେ ଏକ ବ୍ୟକ୍ତିର ଏଭଳି ସନ୍ଦେହ ଗତିବିଧିକୁ ବିଏସଏଫ ଯବାନମାନେ ଲକ୍ଷ୍ୟ କରିଥିଲେ । ଉକ୍ତ ପାକିସ୍ତାନ ନାଗରିକ ଜଣକ ଅନ୍ତର୍ଜାତୀୟ ସୀମାକୁ ପାର କରିବା ମାତ୍ରେ ବିଏସଏଫ ଯବାନମାନେ ତାକୁ ଗିରଫ କରିଥିଲେ ବୋଲି ବିଏସଏଫ ମୁଖପାତ୍ର ସୂଚନା ଦେଇଛନ୍ତି ।
ପୂର୍ବରୁ ଗତ ମାର୍ଚ୍ଚ 16 ତାରିଖରେ ମଧ୍ୟ ଜଣେ ପାକିସ୍ତାନ ନାଗରିକ ଭାରତର ସୀମା ମଧ୍ୟକୁ ପ୍ରବେଶ କରୁଥିଲା । ଯବାନଙ୍କ ବାରମ୍ବାର ବାରଣ ସତ୍ତ୍ବେ ଉକ୍ତ ପାକିସ୍ତାନ ନାଗରିକ ଜଣକ ଯବାନଙ୍କ ବାରଣକୁ ନ ମାନି ପ୍ରବେଶ କରିବାରୁ ବିଏସଏଫ ଯବାନମାନେ ତାଙ୍କୁ ଗୁଳି କରି ହତ୍ୟା କରିଥିଲେ । ଏହି ଘଟଣା ସାମ୍ବା ଜିଲ୍ଲାର ରାମଗଡଠାରେ ଘଟିଥିବା ଦେଖିବାକୁ ମିଳିଥିଲା ।
ବ୍ୟୁରୋ ରିପୋର୍ଟ, ଇଟିଭି ଭାରତ
