ଡେରାଡୁନ: ଉତ୍ତରାଖଣ୍ଡ ବିଧାନସଭା ନିର୍ବାଚନ ପାଇଁ ଆଜି ଉତ୍ତରକାଶୀରେ ପ୍ରଚାର ଆରମ୍ଭ କରିଛନ୍ତି ବିଜେପି ରାଷ୍ଟ୍ରୀୟ ଅଧ୍ୟକ୍ଷ ଜେପି ନଡ୍ଡା । ନଡ୍ଡା ଏକ ଜନସଭାକୁ ସମ୍ବୋଧିତ କରିବା ଅବସରରେ କହିଛନ୍ତି, କେବଳ ଭାରତୀୟ ସେନା ପ୍ରତି ମୋଦି ସରକାରଙ୍କର ହିଁ ସମ୍ବେଦନଶୀଳତା ରହିଛି । ସେନାରେ ଓ୍ବାନ ର୍ୟାଙ୍କ ଓ୍ବାନ ପେନସନ (OROP) ମୋଦି ସରକାରଙ୍କ ଦ୍ବାରା କାର୍ଯ୍ୟକାରୀ ହୋଇଛି । ସେହିପରି ମୋଦି ସରକାରଙ୍କ ନେତୃତ୍ବରେ ଉତ୍ତରାଖଣ୍ଡରେ ମିଲିଟାରୀ ଧାମର ନିର୍ମାଣ ଜାରି ରହିଛି ବୋଲି ନଡ୍ଡା କହିଛନ୍ତି ।
ନଡ୍ଡା କହିଛନ୍ତି ବିଜେପି ସୁରକ୍ଷା ବଳ ପାଇଁ ଦେଇଥିବା ପ୍ରତିଶ୍ରୁତି ପାଳନ କରିଛି । ଦୀର୍ଘଦିନ ଧରି ପଡିରହିଥିବା ଓ୍ବାନ ରାଙ୍କ ଓ୍ବାନ ପେନସନ (OROP) ଦାବି 1971-72 ରୁ ଆରମ୍ଭ ହୋଇଥିଲା । ତେବେ ଦେଶରେ ପୂର୍ବରୁ ଶାସନରେ ଥିବା କୌଣସି ସରକାର ଏହି ଦାବିକୁ ପୂରଣ କରିବା ପାଇଁ ଆଗ୍ରହ ଦେଖାଇନଥିବା ବେଳେ ମୋଦିଙ୍କ ନେତୃତ୍ବାଧୀନ ସରକାରରେ ତାହା ପୂରଣ ହୋଇଛି । ଏହି (OROP) ଯୋଜନା ବାବଦକୁ ପ୍ରଧାନମନ୍ତ୍ରୀ ମୋଦି 42,000 କୋଟି ଟଙ୍କାର ଅର୍ଥରାଶି ପ୍ରଦାନ କରିଛନ୍ତି । ଏହି ଯୋଜନା ଅନ୍ତର୍ଗତ ଉତ୍ତରାଖଣ୍ଡର ୧.୧୬ ଲକ୍ଷ ସୈନିକ ଲାଭାନ୍ବିତ ହୋଇଥିବା କହିଛନ୍ତି ନଡ୍ଡା ।
ବିଜେପି ମୁଖ୍ୟ ଏହା ମଧ୍ୟ କହିଛନ୍ତି, ମୋଦିଙ୍କ ଶାସନରେ ଶହୀଦଙ୍କ ଅନୁକମ୍ପା ରାଶି 10 ଲକ୍ଷରୁ 15 ଲକ୍ଷକୁ ବୃଦ୍ଧି କରିଛି । ପାର୍ବତ୍ୟାଞ୍ଚଳ ରାଜ୍ୟମାନଙ୍କ ଭିତ୍ତିଭୂମିର ବିକାଶ ପାଇଁ ଚଳିତ ସାଧାରଣ ବଜେଟରେ ସ୍ବତନ୍ତ୍ର ଅନୁଦାନ ବ୍ୟବସ୍ଥା ମଧ୍ୟ କରାଯାଇଛି, ଯାହା ପୂର୍ବରୁ କେବେ ହୋଇନଥିଲା ବୋଲି କହିଛନ୍ତି ନଡ୍ଡା । କେବଳ ମୋଦି ୨୦୧୪ ରେ କ୍ଷମତାକୁ ଆସିବା ପରେ ଏସବୁରେ ସୁଧାର ଆସିଛି ବୋଲି ନଡ୍ଡା କହିଛନ୍ତି ।
ବ୍ଯୁରୋ ରିପୋର୍ଟ, ଇଟିଭି ଭାରତ
