ନୂଆଦିଲ୍ଲୀ: କୋଟିଆ ବିବାଦ ପ୍ରସଙ୍ଗରେ ସୁପ୍ରିମକୋର୍ଟରେ ଶୁଣାଣି ହୋଇଛି । ଆନ୍ଧ୍ର ପ୍ରଦେଶର ସତ୍ୟପାଠର ପ୍ରତି ଜବାବ ରଖିବାକୁ ଓଡିଶାକୁ 4 ସପ୍ତାହ ସମୟ ଦେଇଛନ୍ତି ସର୍ବୋଚ୍ଚ ଅଦାଲତ ।
ଆନ୍ଧ୍ରପ୍ରଦେଶ ଅଦାଲତ ଅବମାନନା କରିଥିବା ଅଭିଯୋଗରେ ସୁପ୍ରିମକୋର୍ଟ ଯାଇଥିଲା ଓଡିଶା । ଯାହାର ଶୁଣାଣି କରି ଆନ୍ଧ୍ରକୁ ଜବାବ ଦାଖଲ କରିବାକୁ କହିଥିଲେ ସୁପ୍ରିମକୋର୍ଟ । ତେବେ ଆନ୍ଧ୍ର ଜବାବ ଦାଖଲ କରିଥିବାବେଳେ ଆଜି ଏହାର ଶୁଣାଣି କରି ଓଡିଶାକୁ ପ୍ରତିଜବାବ ଦେବାକୁ 4 ସପ୍ତାହ ସମୟ ଦେଇଛନ୍ତି ନ୍ୟାୟାଳୟ ।
ଆନ୍ଧ୍ରପ୍ରଦେଶ ପକ୍ଷରୁ ପୂର୍ବରୁ ବିଜୟନଗରମ ଜିଲ୍ଲାପାଳ ସୁପ୍ରିମକୋର୍ଟରେ ସତ୍ୟପାଠ ଦାଖଲ କରିଥିଲେ । ଏଥିରେ ସମ୍ପୃକ୍ତ ତିନୋଟି ଗାଁ ଗଞ୍ଜୟବଦ୍ରା, ପଟ୍ଟୁଚେନ୍ନୁରୁ ଏବଂ ପଗୁଲ୍ଲୁଚେନ୍ନୁରୁ ଆନ୍ଧ୍ରପ୍ରଦେଶର ଆରାକୁ ସଂସଦୀୟ ନିର୍ବାଚନମଣ୍ଡଳୀ ଏବଂ ସାଲୁରୁ ବିଧାନସଭା ନିର୍ବାଚନମଣ୍ଡଳୀ ଅଧୀନରେ ରହିଛି ବୋଲି ଦର୍ଶାଇଥିଲେ ।
ସେ ଆହୁରି ମଧ୍ୟ କହିଥିଲେ ଯେ, 1952 ମସିହାରୁ ଆନ୍ଧ୍ରପ୍ରଦେଶ ଗାଁରେ ଲୋକସଭା ଓ ବିଧାନସଭା ନିର୍ବାଚନ ଚାଲିଆସୁଥିବାବେଳେ 2006 ଏବଂ 2013 ମସିହାରେ ଏହି ଗାଁଗୁଡିକରେ ପଞ୍ଚାୟତ ନିର୍ବାଚନ ଅନୁଷ୍ଠିତ ହୋଇଥିଲା । ଯାହା ଉପରେ ପ୍ରତିଜବାବ ରଖିବାକୁ ସୁପ୍ରିକୋର୍ଟ ଓଡିଶାକୁ 4 ସପ୍ତାହ ସମୟ ଦେଇଛନ୍ତି ।
