ଭୋପାଲ: ମଧ୍ୟପ୍ରଦେଶରେ ବୃଦ୍ଧି ପାଉଥିବା କୋରୋନା ମାମଲା ମଧ୍ୟରେ ଶିକ୍ଷକଙ୍କୁ ଏକ ସ୍ୱତନ୍ତ୍ର ନିର୍ଦ୍ଦେଶ ଜାରି କରାଯାଇଛି । ସେମାନଙ୍କୁ ବର୍ତ୍ତମାନ ଅନ୍ତିମସଂସ୍କାରରେ ମୃତଦେହ ବ୍ୟବଚ୍ଛେଦ ପାଇଁ ସମ୍ପୂର୍ଣ୍ଣ ତଦାରଖ କରିବାକୁ ପଡିବ । ଶିକ୍ଷକ ଶ୍ମଶାନ ଘାଟ ସହ ଅସ୍ଥି ବିସର୍ଜନ ଘାଟରେ ୨-୨ ସିଫ୍ଟରେ ଡ୍ୟୁଟି କରିବେ। ମଧ୍ୟପ୍ରଦେଶ ଧାର ଜିଲ୍ଲା ଏସଡ଼ିଏମ ଶିକ୍ଷକଙ୍କୁ ଏହି ନୂଆ ଆଦେଶ ଜାରି କରିଛନ୍ତି । ୮ଜଣ ଶିକ୍ଷକଙ୍କୁ ଶ୍ମଶାନ ଘାଟ ଓ ସ୍ନାନ ଘାଟରେ ଡ୍ୟୁଟି ଦିଆଯିବ । ଏମାନେ ଦୁଇଟି ସିଫ୍ଟରେ ଡ୍ୟୁଟି କରିବେ । ପ୍ରଥମ ସିଫ୍ଟରେ ୨ ଜଣ ଶିକ୍ଷକ ସକାଳ ୬ଟାରୁ ଖଲଘାଟରେ ଅପରାହ୍ନ ଗୋଟାଏ ଯାଏଁ ଡ୍ୟୁଟି କରିବେ ଓ ଆଉ ଦୁଇ ଶିକ୍ଷକ ଖଲଘାଟ ସ୍ନାନ ଘାଟରେ ଡ୍ୟୁଟି କରିବେ।
ଦ୍ୱିତୀୟ ସିଫ୍ଟରେ ଏହି ସ୍ଥାନରେ ଅନ୍ୟ ୪ ଜଣ ଶିକ୍ଷକ ଡ୍ୟୁଟି ଅପରାହ୍ନ ଗୋଟାଏରୁ ରାତି ୮ଟା ଯାଏଁ ଅନ୍ତିମ ସଂସ୍କାର ଓ ଅସ୍ଥି ବିସର୍ଜନ ଡ୍ୟୁଟି କରିବେ ବୋଲି ଏସଡ଼ିଏମ ଆଦେଶରେ ଲେଖିଛନ୍ତି । ଆଦେଶରେ ଏହା ମଧ୍ୟ କୁହାଯାଇଛି ଯେ, ଖଲଘାଟ ଓ ଧାମନୋଦ ଘାଟରେ ଅନ୍ତିମ ସଂସ୍କାର କରାଯିବ। ଅନ୍ୟ ଗାଁ କିମ୍ବା ସହରରୁ ଆସିଥିବା ଶବ ଏହି ଦୁଇ ଘାଟରେ ସତ୍କାର କରାଯିବ ନାହିଁ। ବିକାଶଖଣ୍ଡ ଅଞ୍ଚଳର ୮ ଜଣ ଶିକ୍ଷକଙ୍କୁ ଏହି ଦାୟିତ୍ୱ ଦିଆଯାଇଛି ।
ସୂଚନାଯୋଗ୍ୟ ଯେ କୋରୋନା କାଳରେ ଡ୍ୟୁଟିରେ ଥିବା ରାଜ୍ୟର ପାଖାପାଖି ୭୨୬ ଶିକ୍ଷକଙ୍କ ମୃତ୍ୟୁ ହୋଇଛି ଓ ୨୮୪୫ ଶିକ୍ଷକ କରୋନାରେ ସଂକ୍ରମିତ ହୋଇଛନ୍ତି । ଏତେ ସଂଖ୍ୟାରେ ଶିକ୍ଷକଙ୍କ ମୃତ୍ୟୁ ଓ ସଂକ୍ରମିତ ହେବାପରେ ମଧ୍ୟ ସରକାର ଏମାନଙ୍କୁ କୋରୋନା ଯୋଦ୍ଧା କଲ୍ୟାଣ ଯୋଜନାରେ ସାମିଲ କରିନାହାନ୍ତି। କୋରୋନା ସମୟରେ ଶିକ୍ଷକ ଲଗାତାର କୋଭିଡ ୱାର୍ଡରେ ଡ୍ୟୁଟି କରୁଛନ୍ତି। ରୋଗୀଙ୍କୁ ମିଳୁଥିବା ଔଷଧ ଓ ସେମାନଙ୍କ ସ୍ଥିତିର ଡାଟା ପ୍ରସ୍ତୁତ କରୁଛନ୍ତି। ତାଛଡା ଟିକାକରଣକୁ ନେଇ ଲୋକଙ୍କୁ ସଚେତନ କରିବା, ଟିକାକରଣ କେନ୍ଦ୍ର, ଚେକ ପୋଷ୍ଟ, ନମୁନା ସଂଗ୍ରହ, କଣ୍ଟେନମେଣ୍ଟ ଜୋନର ତଦାରଖରେ ମଧ୍ୟ ଶିକ୍ଷକଙ୍କୁ ଦାୟିତ୍ୱ ଦିଆଯାଇଛି ।
