ହାଇଦ୍ରାବାଦ: ମାଓ ଲିଙ୍କ ଅଭିଯୋଗରେ ଆନ୍ଧ୍ର ପ୍ରଦେଶ, ତେଲେଙ୍ଗାନା ଓ ଛତିଶଗଡରେ ଏକକାଳୀନ ୧୪ ସ୍ଥାନରେ ଚଢାଉ କରିଛି ଜାତୀୟ ଅନୁସନ୍ଧାନ ଏଜେନ୍ସି (NIA) । ଆଜି NIA ର ପୃଥକ ପୃଥକ ଟିମ ୩ ରାଜ୍ୟର ବିଭିନ୍ନ ଅଞ୍ଚଳରେ ଚଢାଉ ଜାରି ରଖିଥିବା ସୂଚନା ମିଳିଛି ।
ଏହି ୩ ରାଜ୍ୟରେ ବର୍ତ୍ତମାନ ସୁଦ୍ଧା ଦେଶର ସର୍ବାଧିକ ମାଓ ବା ବାମପନ୍ଥୀ ଉଗ୍ରବାଦ ଗତିବିଧି (LWE) ଅଧିକ ରହିଥିବା କାରଣରୁ ଏହି ଚଢାଉ ହୋଇଛି । ହାଇଦ୍ରାବାଦ ସହର ସମେତ ଆନ୍ଧ୍ରପ୍ରଦେଶର ବିଶାଖାପାଟନମ ଜିଲ୍ଲାରେ ମଧ୍ୟ NIA ସର୍ଚ୍ଚ ଜାରି ରହିଛି ।
ନାମ ଗୋପନ ରଖି ଆନ୍ଧ୍ରପ୍ରଦେଶର ଜଣେ ବରିଷ୍ଠ ପୋଲିସ ଅଧିକାରୀ କହିଛନ୍ତି, ନିକଟରେ ମହାରାଷ୍ଟ୍ରରେ ହୋଇଥିବା ଏନକାଉଣ୍ଟରରେ ୨୭ ମାଓବାଦୀ ପ୍ରାଣ ହରାଇଥିବା ବେଳେ ଏମାନଙ୍କ ଗତିବିଧି ଓ ନେଟଓ୍ବାର୍କ ନେଇ କିଛି ନୂଆ ସୂଚନା NIA ହାତରେ ଲାଗିଛି । ଉକ୍ତ ସ୍ଥାନରେ ମାଓ କ୍ୟାମ୍ପ ଓ ଏକାଧିକ ମାଓ ସାମଗ୍ରୀ ଠାବ ହୋଇଥିବାବେଳେ ଏହି ଜବତ ସାମଗ୍ରୀରୁ ହସ୍ତଗତ ହୋଇଥିବା ସୂଚନା ଆଧାରରେ ଏହି ଚଢାଉ ଜାରି ରହିଥିବା ପ୍ରାଥମିକ ଭାବେ କହିଛନ୍ତି ସମ୍ପୃକ୍ତ ପୋଲିସ ଅଧିକାରୀ ।
ଆଜି ଚାଲିଥିବା ଚଢାଉରେ ଆନ୍ଧ୍ରର ଜଣାଶୁଣା ବିପ୍ଳବୀ କବି ଜି କଲ୍ୟାଣ ରାଓଙ୍କ ବାସଭବନ ସମେତ ହାଇଦ୍ରାବାଦସ୍ଥିତ ଓସମାନିଆ ବିଶ୍ବବିଦ୍ୟାଳୟର ଜଣେ ଛାତ୍ରନେତା NIA ସ୍କାନରରେ ରହିଥିବା ମଧ୍ୟ ସୂଚନା ମିଳିଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
