କୋଲକାତା: ପଶ୍ଚିମବଙ୍ଗ ବିଧାନସଭା ନିର୍ବାଚନ ମଧ୍ୟରେ ତୃଣମୂଳ କଂଗ୍ରେସ ନେତା ତଥା ମାଓ ସମର୍ଥକ ଛତ୍ରଧର ମହତୋ ଗିରଫ । ଛତ୍ରଧରଙ୍କୁ ଝାରଗ୍ରାମରୁ ଗିରଫ କରିଛି ଏନଆଇଏ । ଛତ୍ରଧର ମହତୋଙ୍କୁ 2009ରେ ସିପିଆଇ ନେତା ପ୍ରବୀର ମହତୋଙ୍କ ହତ୍ୟା ମାମଲାରେ ଗିରଫ କରାଯାଇଥିଲା ।
ନିକଟରେ ଟିଏମସି ନେତା ଛତ୍ରଧର ମହତୋଙ୍କୁ ହାଜର ହେବାକୁ ସମନ ପଠାଇଥିଲା ଏନଆଇଏ । ତେବେ ଅସୁସ୍ଥତା କାରଣରୁ ଏଜେନ୍ସି ସାମ୍ନାରେ ହାଜର ହେବାକୁ ମନା କରିଦେଇଥିଲେ ଛତ୍ରଧର । ଏହାପରେ ଏନଆଇଏ ଏହି ମାମଲାରେ ହାଇକୋର୍ଟଙ୍କ ଦ୍ବାରସ୍ଥ ହୋଇଥିଲା । ତେବେ କୋର୍ଟ ତୁରନ୍ତ ଛତ୍ରଧରଙ୍କୁ ଗିରଫ କରିବାକୁ ଆଦେଶ ଦେଇଥିଲେ ।
ନିକଟରେ ଟିଏମସି ନେତା ଛତ୍ରଧର ମହତୋଙ୍କୁ ଝାରଗ୍ରାମରେ ହୋଇଥିବା ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ରାଲିରେ ଦେଖିବାକୁ ମିଳିଥିଲା । ଛତ୍ରଧର ମମତା ବାନାର୍ଜୀଙ୍କ ବେଶ ନିକଟତର ବୋଲି କୁହାଯାଇପାରେ । ଲୋକସଭା ନିର୍ବାଚନରେ ଖରାପ ପ୍ରଦର୍ଶନ ପରେ ଏଥର ବିଧାନସଭା ନିର୍ବାଚନରେ ଛତ୍ରଧର ମହତୋଙ୍କ ଉପରେ ଟିଏମସି ସପକ୍ଷରେ ଭୋଟରଙ୍କୁ ଆକୃଷ୍ଠ କରାଇବାର ବଡ ଦାୟିତ୍ବ ଥିଲା ।
