ଲକ୍ଷ୍ନୌ: ଉତ୍ତରପ୍ରଦେଶ ବିଧାନସଭା ନିର୍ବାଚନର ତୃତୀୟ ପର୍ଯ୍ୟାୟ ମତଦାନ ଚାଲିଛି। ରାଜ୍ୟର 16 ଜିଲ୍ଲାରେ 59 ଆସନ ପାଇଁ ଭୋଟ ଗଣତି ଜାରି ରହିଛି। ଆଜି ସକାଳୁ ଭୋଟିଂ ବୁଥରେ ମତଦାତାଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଥିଲା। ଏହାରି ଭିତରେ ବଧୂବେଶରେ ଜଣେ ଯୁବତୀ ଫିରୋଜାବାଦ ବିଧାନସଭା ନିର୍ବାଚନ ମଣ୍ଡଳୀରେ ଥିବା 305 ମତଦାନ ବୁଥରେ ଭୋଟ ଦେବାପାଇଁ ପହଞ୍ଚିଥିଲେ।
ସୂଚନା ଅନୁଯାୟୀ, ଉକ୍ତ ଯୁବତୀ ଜଣକ ଗତକାଲି ବିବାହ କରିଥିଲେ। ତେଣୁ ଆଜି ସକାଳେ ନିଜ ଶାଶୁଘରକୁ ଯିବା ପୂର୍ବରୁ ନିଜ ସ୍ବାମୀଙ୍କ ସହ ଆସି ଭୋଟ ଦେଇଥିଲେ ନବବଧୂ ଜଣକ। ମତଦାନ ସର୍ବସାଧାରଣଙ୍କ ଏକ ମୌଳିକ ଅଧିକାର। ତେଣୁ ଶାଶୁ ଘରକୁ ଯିବା ପୂର୍ବରୁ ସେ ନିଜର ମତାଧିକାର ସାବ୍ୟସ୍ତ କରିଥିବା ଦେଖିବାକୁ ମିଳିଥିଲା ।
