ଚଣ୍ଡିଗଡ: ପଞ୍ଜାବୀ ଗାୟକ ତଥା କଂଗ୍ରେସ ନେତା ସିଦ୍ଧୁ ମୁସେଓ୍ବାଲା ହତ୍ୟା ମାମଲାରେ ଗିରଫ ହୋଇଥିବା ସୁଟର ପ୍ରିୟବ୍ରତ ଫୌଜି ଏବଂ ଅନ୍ୟ ତିନି ଅଭିଯୁକ୍ତଙ୍କୁ ସାତ ଦିନିଆ ରିମାଣ୍ଡରେ ପଠାଇଛନ୍ତି ମାନସା କୋର୍ଟ । ଆଜି ଏହି ଅଭିଯୁକ୍ତଙ୍କୁ ମାନସା କୋର୍ଟରେ ହାଜର କରିଥିଲା ପଞ୍ଜାବ ପୋଲିସ । ଘଟଣାର ତଦନ୍ତ ପାଇଁ ଅଧିକ ଜେରାର ଆବଶ୍ୟକତା ଦର୍ଶାଇ କୋର୍ଟଙ୍କୁ ରିମାଣ୍ଡ ଆବେଦନ କରିଥିଲା ପୋଲିସ । ତେବେ କୋର୍ଟ 4 ଅଭିଯୁକ୍ତଙ୍କୁ 7 ଦିନିଆ ପୋଲିସ ରିମାଣ୍ଡରେ ପଠାଇଛନ୍ତି ।
ଆଜି (ମଙ୍ଗଳବାର) ପୂର୍ବାହ୍ନରେ କଡା ସୁରକ୍ଷା ମଧ୍ୟରେ ଏହି ଗିରଫ ଚାରି ସୁଟରଙ୍କୁ କୋର୍ଟରେ ହାଜର କରିଥିଲା ପଞ୍ଜାବ ପୋଲିସ । ଏହାପୂର୍ବରୁ ଆଜି ସକାଳେ ସେମାନଙ୍କୁ ନୂଆଦିଲ୍ଲୀର ପଟିଆଲା ହାଉସ କୋର୍ଟରୁ ଟ୍ରାଞ୍ଜିଟ୍ ରିମାଣ୍ଡରେ ପଞ୍ଜାବ ପୋଲିସ ଘଟଣା ଘଟିଥିବା ମାନସାକୁ ଆଣିଥିଲା । ଏବେ ରିମାଣ୍ଡ ପାଇବା ପରେ ପଞ୍ଜାବ ପୋଲିସ ଅଭିଯୁକ୍ତଙ୍କ ଠାରୁ ଅନେକ ତଥ୍ୟ ହାସଲ କରିବାକୁ ଚେଷ୍ଟା କରିବ ।
ବ୍ୟୁରୋ ରିପୋର୍ଟ, ଇଟିଭି ଭାରତ
