ମୁମ୍ବାଇ: ହନୁମାନ ଚାଳିଶା ବିବାଦରେ ଗିରଫ ହୋଇ ଜେଲରୁ ଫେରିବା ପରେ ପୁଣି ଥରେ କୋର୍ଟଙ୍କ ନୋଟିସର ସାମ୍ନା କରିଛନ୍ତି ଅମରାବତୀ ସାଂସଦ ନବନୀତ ରାଣା ଓ ବିଧାୟକ ପତି ରବି ରାଣା । ମୁମ୍ବାଇ ସେସନ୍ସ କୋର୍ଟ ଆଜି (ସୋମବାର) ସେମାନଙ୍କୁ ଜାମିନ ପ୍ରଦାନ ସମୟରେ ପ୍ରଦତ୍ତ ସର୍ତ୍ତ ଉଲ୍ଲଂଘନ ଅଭିଯୋଗରେ ସେମାନଙ୍କ ବିରୋଧରେ କାହିଁକି ଜାମିନ ବିହୀନ ଗିରଫ ପରଓ୍ବାନା ଜାରି କରାଯିବ ନାହିଁ ବୋଲି ଦର୍ଶାଇବା ପାଇଁ ନୋଟିସରେ ଉଲ୍ଲେଖ କରିଛନ୍ତି ।
ଗତକାଲି ସାଂସଦ ନବନୀତ ରାଣା ହସ୍ପିଟାଲରୁ ଡିସଚାର୍ଜ ହେବା ପରେ ଗଣମାଧ୍ୟମରେ ପ୍ରତିକ୍ରିୟା ରଖି ଉଦ୍ଧବ ଠାକରେଙ୍କୁ ନିର୍ବାଚନ ଲଢିବା ଚ୍ୟାଲେଞ୍ଜ କରିବା ପରେ କୋର୍ଟଙ୍କ ସର୍ତ୍ତାବଳୀ ଖିଲାପ ନେଇ ଅଭିଯୋଗ ଉଠିଥିଲା । ବେଲ ପ୍ରଦାନ ବେଳେ ଏସମ୍ପର୍କିତ ମନ୍ତବ୍ୟ କୌଣସି ଗଣମାଧ୍ୟମରେ ନରଖିବା ପାଇଁ କୋର୍ଟ ସର୍ତ୍ତ ରଖିଥିଲେ ।
ଏପରି ଘଟଣା ପରେ ଉଭୟଙ୍କ ଜାମିନ ଖାରଜ କରିବା ପାଇଁ ମୁମ୍ବାଇ ପୋଲିସ ସେସନ କୋର୍ଟରେ ଏକ ଆବେଦନ କରି ଅଦାଲତ ଅବମାନନା ପାଇଁ ଦମ୍ପତିଙ୍କ ବିରୋଧରେ ଜାମିନ ବିହୀନ ୱାରେଣ୍ଟ ଜାରି କରାଯିବା ଉଚିତ ବୋଲି ପୋଲିସ ଆବେଦନ କରିଥିଲା । ତେବେ କୋର୍ଟ ଦମ୍ପତିଙ୍କୁ ନୋଟିସ ଜାରି କରିବା ସହ ସେମାନଙ୍କ ବିରୋଧରେ କାହିଁକି କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ନାହିଁ ସ୍ପଷ୍ଟୀକରଣ ରଖିବାକୁ ନିର୍ଦ୍ଦେଶ ଦେଇଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
