ନୂଆଦିଲ୍ଲୀ: ବର୍ଷ ଆରମ୍ଭ ହେଉ ହେଉ କୋରୋନା ମହାମାରୀ ଆକ୍ରାତ୍ମକ ଭାବରେ ମାଡିଲାଣି । ଗତ ୨୪ ଘଣ୍ଟାରେ ୨୫ ହଜାର ପାଖାପାଖି ନୂଆ ସଂକ୍ରମଣ ମାମଲା ସାମ୍ନାକୁ ଆସିଲାଣି । ଯାହା ପୂର୍ବବର୍ଷ ତୁଳନାରେ ୩୫ ପ୍ରତିଶତ ଅଧିକ ବଢିଛି। ଏ ନେଇ କେନ୍ଦ୍ର ସରକାର ପୁଣି ସବୁ ରାଜ୍ୟଗୁଡିକୁ ଚିଠି ଲେଖି ସତର୍କ କରାଇଛନ୍ତି (moniter patients in home isolation set up makeshift hospital centre tells states) । ସଂକ୍ରମିତଙ୍କ ପାଇଁ ଅସ୍ଥାୟୀ ହସ୍ପିଟାଲ ଖୋଲିବା ସହ ଆଇସୋଲେସନରେ ଥିବା ଆକ୍ରାନ୍ତଙ୍କ ଉପରେ ଅଧିକ ଦୃଷ୍ଟି ଦେବାକୁ ପରାମର୍ଶ ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟ ସଚିବ ରାଜେଶ ଭୂଷଣ ।
ସେ ଚିଠିରେ ଆହୁରି ଲେଖିଛନ୍ତି ପ୍ରତି ରାଜ୍ୟରେ ଜିଲ୍ଲା ଓ ଉପଜିଲ୍ଲା ସ୍ତରରେ କଣ୍ଟ୍ରୋଲ ରୁମ ନିର୍ମାଣ କରିବା ପାଇଁ ନିର୍ଦ୍ଦେଶ ହୋଇଛି । ସଂକ୍ରମିତ ରୋଗୀଙ୍କ ସଂଖ୍ୟା ବୃଦ୍ଧିକୁ ଦୃଷ୍ଟିରେ ରଖି ଅସ୍ଥାୟୀ ହସ୍ପିଟାଲ ସ୍ଥାପନ ସହ ଗୃହ ସଙ୍ଗରୋଧରେ ଥିବା ରୋଗୀଙ୍କ ତଦାରଖ ପାଇଁ ସ୍ବତନ୍ତ୍ର ଟିମ ଗଠନ କରିବା ଲାଗି ଚିଠିରେ ଲେଖାଯାଇଛି । ସମ୍ଭାବ୍ୟ କୋଭିଡ ମାମଲା ବୃଦ୍ଧିକୁ ଦେଖି ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ଏହାର ମୁକାବିଲା ପାଇଁ ଆବଶ୍ୟକୀୟ ପଦକ୍ଷେପ ନେବା ଆବଶ୍ୟକ । ଏହା ସହିତ କୋଭିଡ ପାଇଁ ସ୍ବାସ୍ଥ୍ୟ ଭିତ୍ତିଭୂମିକୁ ବ୍ୟବସ୍ଥିତ କର ରଖିବା ଆବଶ୍ୟକ ବୋଲି ଚିଠିରେ ନିର୍ଦ୍ଦେଶ ହୋଇଛି ।
ଏହା ପୂର୍ବରୁ ସ୍ବାସ୍ଥ୍ୟ ସଚିବ ରାଜେଶ ଭୂଷଣ ଓ ଆଇସିଏମଆର ମହାନିର୍ଦ୍ଦେଶକ ଡା. ବଳରାମ ଭାର୍ବବ ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରୁ ଚିଠି ଲେଖି ୨୪ ଘଣ୍ଟିଆ ରାପିଡ ଆଣ୍ଟିଜେନ ଟେଷ୍ଟ ବୁଥ ଖୋଲି ସେଠାରେ ସ୍ବାସ୍ଥ୍ୟକର୍ମୀ ଓ ପାରାମେଡିକାଲ କର୍ମଚାରୀଙ୍କୁ ନିୟୋଜିତ କରିବା ପାଇଁ କୁହାଯାଇଥିଲା । ସେହିପରି ଲକ୍ଷଣ ଥିବା ଲୋକଙ୍କୁ ହୋମ ଟେଷ୍ଟ କିଟ ବ୍ୟବହାର ଲାଗି ଉତ୍ସାହିତ କରିବାକୁ କୁହାଯାଇଥିଲା । ଗ୍ରାମାଞ୍ଚଳଗୁଡିକୁ ଅଧିକ ଫୋକସରେ ରଖିବାକୁ କୁହାଯାଇଛି । ଲକ୍ଷଣ ଦେଖାଗଲେ ସେମାନଙ୍କୁ ତୁରନ୍ତ କୋଭିଡ ପରୀକ୍ଷା ସହିତ ସଙ୍ଗରୋଧରେ ରହିବାକୁ କୁହାଯିବା ଦରକାର ବୋଲି ସମସ୍ତ ରାଜ୍ୟ ସ୍ବାସ୍ଥ୍ୟ ସଚିବଙ୍କୁ ଚିଠିରେ ଲେଖାଯାଇଛି ।
ସଂକ୍ରମଣ ଧାରା ଯଦି ଏହିପରି ଜାରି ରୁହେ ତେବେ ଆସନ୍ତା ୭ ଦିନ ଭିତରେ ଦୈନିକ ମାମଲା ୧ ଲକ୍ଷ ପାର କରିବ । ପ୍ରତ୍ୟେକ ଦିନ ସଂକ୍ରମଣ ମାମଲା ୨୫ ପ୍ରତିଶତ ବଢୁଥିବାରୁ ଦିନକୁ ଲକ୍ଷେ ପାର ହେବା କିଛି ଅସମ୍ଭବ ନୁହେଁ ବୋଲି କହିଛନ୍ତି ସ୍ବାସ୍ଥ୍ୟ ବିଶେଷଜ୍ଞ । ଶେଷ ଥର ପାଇଁ ଗତ ନଭେମ୍ବର ୩୦ରେ ଏକ ଲକ୍ଷ ସକ୍ରିୟ ରୋଗୀ ରହିଥିଲେ । ଗତକାଲି ଦେଶରେ ଦିନକରେ ୨୨,୭୭୫ ସଂକ୍ରମିତ ଚିହ୍ନଟ ହୋଇଛନ୍ତି । ଯାହା ଅକ୍ଟୋବର ପରଠୁ ସର୍ବାଧିକ । ତେଣୁ ସ୍ବାସ୍ଥ୍ୟ ଭିତ୍ତିଭୂମି ସଜାଡିବାକୁ ନିର୍ଦ୍ଦେଶ ଦେଇଛନ୍ତି କେନ୍ଦ୍ର ସ୍ବାସ୍ଥ୍ୟ ସଚିବ ।
