ନୂଆଦିଲ୍ଲୀ: ହନୁମାନ ଚାଳିଶା ପଠନ ବିବାଦରେ ଗିରଫ ହୋଇ ଜେଲରେ ଥିବା ଅମରାବତୀ ସାଂସଦ ନବନୀତ ରାଣା ଗତକାଲି ପୋଲିସ ବିରୋଧରେ ସଙ୍ଗୀନ ଅଭିଯୋଗ ଆଣି ଲୋକସଭା ବାଚସ୍ପତିଙ୍କୁ ଚିଠି ଲେଖିବା ପରେ ଘଟଣାକୁ ଗମ୍ଭୀରତାର ସହ ନେଇଛି କେନ୍ଦ୍ର ଗୃହ ମନ୍ତ୍ରଣାଳୟ । ଆଜି ଅଭିଯୋଗ ସମ୍ପର୍କରେ ସବିଶେଷ ରିପୋର୍ଟ ଦାଖଲ କରିବାକୁ ମହାରାଷ୍ଟ୍ରର ଉଦ୍ଧବ ଠାକରେ ସରକାରଙ୍କୁ କେନ୍ଦ୍ର ନିର୍ଦ୍ଦେଶ ଦେଇଛି । ଗିରଫଦାରୀ ପରେ ଥାନାରେ ରାଣା ଦମ୍ପତିଙ୍କ ସହ ପୋଲିସ ଅମାନବୀୟ ବ୍ୟବହାର କରିଥିବା ଅଭିଯୋଗ କରିଥିଲେ ସାଂସଦ ନବନୀତ ରାଣା ।
ଲୋକସଭା ବାଚସ୍ପତିଙ୍କୁ ଚିଠି ଲେଖିବା ପରେ ଲୋକସଭା ସ୍ବାଧୀକାର କମିଟି ଓ ନୀତି କମିଟି (Privilege and Ethics Committee) ପକ୍ଷରୁ ଘଟଣାରେ ହସ୍ତକ୍ଷେପ କରିବା ପାଇଁ କେନ୍ଦ୍ର ଗୃହ ମନ୍ତ୍ରଣାଳୟକୁ ନିବେଦନ କରାଯାଇଥିଲା । ନିବେଦନ ଆଧାରରେ ମହାରାଷ୍ଟ୍ର ସରକାରଙ୍କୁ ଘଟଣାର ସମ୍ପୂର୍ଣ୍ଣ ତଥ୍ୟ ଦାଖଲ କରିବା ପାଇଁ କେନ୍ଦ୍ର ଗୃହ ମନ୍ତ୍ରଣାଳୟ ନିର୍ଦ୍ଦେଶ ଜାରି କରିଛି । ତେବେ ନିର୍ଦ୍ଦେଶ ଅନୁସାରେ, 24 ଘଣ୍ଟା ମଧ୍ୟରେ ମହାରାଷ୍ଟ୍ର ସରକାର ସମ୍ପୂର୍ଣ୍ଣ ରିପୋର୍ଟ କେନ୍ଦ୍ର ନିକଟରେ ଦାଖଲ କରିବ ।
ଅନ୍ୟପଟେ ଏହି ଅଭିଯୋଗ ଘଟଣାରେ ଭିନ୍ନ ଏକ ଚିତ୍ର ମଧ୍ୟ ସାମ୍ନାକୁ ଆସିଛି । ରାଣାଙ୍କ ଅମାନବୀୟ ବ୍ୟବହାର ଅଭିଯୋଗକୁ ମୁମ୍ବାଇ ପୋଲିସ ଖଣ୍ଡନ କରିବା ସହ ଗିରଫଦାରୀ ଦିନର ଥାନା ପରିସରର ଏକ ଭିଡିଓ ମଧ୍ୟ ଟ୍ବିଟ କରିଛନ୍ତି ମୁମ୍ବାଇ ପୋଲିସ କମିଶନର ସଞ୍ଜୟ ପାଣ୍ଡେ । ଥାନା ପରିସରରେ ରାଣା ଦମ୍ପତି ଚା’ ପିଉଥିବାର ଦୃଶ୍ୟ ମଧ୍ୟ କ୍ୟାମେରାରେ କଏଦ ହୋଇଛି ।
ବ୍ୟୁରୋ ରିପୋର୍ଟ, ଇଟିଭି ଭାରତ
