ନୂଆଦିଲ୍ଲୀ: ଭାରତରେ କୃଷି ସଂସ୍କାର ଉପରେ ବ୍ରିଟେନ ସଂସଦରେ ଅବାଞ୍ଛିତ ଆଲୋଚନା ବିରୋଧରେ ଭାରତର କଡା ଆଭିମୁଖ୍ୟ । ଏନେଇ ବ୍ରିଟେନ ହାଇ କମିଶନରଙ୍କୁ ସମନ ପଠାଇଛି ଭାରତ ।
ବୈଦେଶିକ ବ୍ୟାପାର ମନ୍ତ୍ରଣାଳୟ ପକ୍ଷରୁ କୁହାଯାଇଛି ଯେ ବୈଦେଶିକ ସଚିବ ହର୍ଷ ଶୃଙ୍ଗଲା ବ୍ରିଟିଶ ହାଇ କମିଶନରଙ୍କୁ ସମନ ପଠାଇ ବ୍ରିଟିଶ ସଂସଦରେ ଭାରତର କୃଷି ଆଇନ ଉପରେ ଅଯଥା ତଥା ପ୍ରବୃତ୍ତିମୂଳକ ଆଲୋଚନାକୁ ଦୃଢ ବିରୋଧ କରିଛନ୍ତି । ବୈଦେଶିକ ସଚିବ ସ୍ପଷ୍ଟ କରିଛନ୍ତି ଯେ ଏହା ଅନ୍ୟ ଗଣତାନ୍ତ୍ରିକ ଦେଶର ରାଜନୀତିରେ ଚରମ ହସ୍ତକ୍ଷେପକୁ ଦର୍ଶାଉଛି । ସେ କହିଛନ୍ତି, ବ୍ରିଟିଶ ସାଂସଦମାନେ ଘଟଣାର ଭୁଲ ତଥ୍ୟ ଉପସ୍ଥାପନ କରି ଭୋଟ ବ୍ୟାଙ୍କ ରାଜନୀତି ଅଭ୍ୟାସରୁ ନିବୃତ୍ତ ହେବା ଉଚିତ ।
ଭାରତର କୃଷି ଆଇନ ବ୍ରିଟିଶ ସଂସଦରେ ଚର୍ଚ୍ଚାର ବିଷୟ ପାଲଟିଛି ଯେତେବେଳେ ବ୍ରିଟେନ ପ୍ରଧାନମନ୍ତ୍ରୀ ବୋରିସ ଜନସନ ନୂଆଦିଲ୍ଲୀ ଗସ୍ତ କରୁଛନ୍ତି । ବ୍ରିଟେନରେ G7 ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନିମନ୍ତ୍ରଣ କରାଯାଇଛି ।
ଏହାପୂର୍ବରୁ ବ୍ରିଟେନରେ ଥିବା ଭାରତୀୟ ମିଶନ କଡା ବିବୃତ୍ତି ଜାରି କରି ବ୍ରିଟେନର ବାକ୍ ସ୍ୱାଧୀନତା ତଥା ଚାଷୀ ଆନ୍ଦୋଳନକୁ ଏକପାଖିଆ ଏବଂ ମିଥ୍ୟା ଧାରଣା ଉପରେ ପ୍ରତିକ୍ରିୟା ଦେଇଥିଲେ ।
