ମୁମ୍ବାଇ: ଦେଶରେ କୋରୋନା ମହାମାରୀ ନିଜର କାୟା ବିସ୍ତାର କରିବାରେ ଲାଗିଛି । କିଛି ଦିନର ବ୍ୟବଧାନ ପରେ ପୁଣି ଦିନକୁ ଦିନ ସଂକ୍ରମିତ ମାମଲା ବୃଦ୍ଧି ପାଇବାରେ ଲାଗିଛି । ତେବେ ସବୁଠାରୁ ବଡକଥା ହେଉଛି ବର୍ତ୍ତମାନ କୋରୋନା କବଳରେ ମୁମ୍ବାଇ ପୋଲିସ । ଗତ ୨୪ ଘଣ୍ଟା ମଧ୍ୟରେ ମହାରାଷ୍ଟ୍ରରେ ୩୭୦ ଜଣ ପୋଲିସ କୋରୋନା ପଜିଟିଭ ହୋଇଛନ୍ତି । ଯାହାକି ଚିନ୍ତାର ବିଷୟ ପାଲଟିଛି । ଏଥିରେ କନେଷ୍ଟବଳ ପଦବୀରୁ ଇନ୍ସପେକ୍ଟର ପର୍ଯ୍ୟନ୍ତ ଅଧିକାରୀ ସମସ୍ତେ ଅନ୍ତର୍ଭୁକ୍ତ । ସଂକ୍ରମିତ ପୋଲିସଙ୍କ ମଧ୍ୟରୁ ୬୦ଜଣ ଅଧିକାରୀ ହୋଇଥିବା ବେଳେ ୩୧୦ ଜଣ କନେଷ୍ଟବଳ ରହିଛନ୍ତି । ଯାହାକି ଏକ ଚିନ୍ତାର ବିଷୟ ପାଲଟିଛି ।
ବର୍ତ୍ତମାନ ସୁଦ୍ଧା ସମୁଦାୟ ୫୦୪ ଜଣ ଅଧିକାରୀ ଏବଂ ୧ ହଜାର ୬୭୮ ଜଣ କନେଷ୍ଟବଳ କୋରୋନା ସଂକ୍ରମିତ ହୋଇ ଚିକିତ୍ସିତ ହେଉଛନ୍ତି । ମହାମାରୀ ଆରମ୍ଭ ହେବା ପରଠାରୁ ମହାରାଷ୍ଟ୍ର ପୋଲିସର ମୋଟ ୪୮ ହଜାର ୬୧୧ ଜଣ କର୍ମଚାରୀ ସଂକ୍ରମିତ ହୋଇଛନ୍ତି । ସୂଚନାଥାଉକି, ସେଥିମଧ୍ୟରୁ ୬ ହଜାର ୨୦୪ ଜଣ ଅଧିକାରୀ ରହିଥିବା ବେଳେ ୪୨ ହଜାର ୪୦୭ଜଣ କନେଷ୍ଟବଳ ଅଟନ୍ତି । ବିଶ୍ବକୁ କଲବଲ କରୁଥିବା ଏହି କୋରୋନା ମହାମାରୀରେ ୪୬ ଜଣ ଅଧିକାରୀ ଏବଂ ୪୫୮ଜଣ କନେଷ୍ଟବଳଙ୍କର ମୃତ୍ୟୁ ହୋଇଛି । ବୁଧବାର ଦିନ ମହାରାଷ୍ଟ୍ରରେ ୪୬ ହଜାର ୭୨୩ଟି ନୂଆ ସଂକ୍ରମିତ ମାମଲା ସାମ୍ନାକୁ ଆସିଛି ଯାହାକି ପୂର୍ବ ଦିନ ତୁଳନାରେ ୨୭ ପ୍ରତିଶତ ଅଧିକ ଅଟେ ।
