ସମ୍ପର୍କରେ କଳଙ୍କ: ଝିଅକୁ ଦୁଷ୍କର୍ମ କରି ବାପା ଗିରଫ

୧୧ ବର୍ଷୀୟା ଝିଅ ସହ ଦୁଷ୍କର୍ମ ଅଭିଯୋଗରେ ବାପା ଗିରଫ । ଅଧିକ ପଢନ୍ତୁ

ଚଣ୍ଡିଗଡ: କଳଙ୍କିତ ହେଲା ରକ୍ତସମ୍ପର୍କ । ୧୧ ବର୍ଷୀୟା ଝିଅକୁ ଦୁଷ୍କର୍ମ କଲା ବାପା । ପଞ୍ଜାବର ଲୁଧିଆନାରେ ଜଣେ ବାପା ନିଜର ଜନ୍ମକଲା ଝିଅକୁ ଦୁଷ୍କର୍ମ କରିଛି । ପ୍ରାୟ ବର୍ଷେ ହେବ ନାବାଳିକା ନିଜ ବାପାର ପାଶବିତାର ଶିକାର ହେଉଥିଲା । ଏନେଇ ଅଭିଯୋଗ ପରେ ପୋଲିସ ଅଭିଯୁକ୍ତକୁ ଗିରଫ କରିଥିବା ସୂଚନା ମିଳିଛି (Man arrested for raping 11 yr old daughter) ।

ଅଭିଯୋଗ ମୁତାବକ, ଲୁଧିଆନା ଜିଲ୍ଲା ଅନ୍ତର୍ଗତ ଗୁରୁ ଅମରଦାସ ନଗର ଅଞ୍ଚଳରୁ ଏହି ଲଜ୍ଜାଜନକ ଘଟଣା ସାମ୍ନାକୁ ଆସିଛି । ବାପା ନିଜ ପିଲାର ସୁରକ୍ଷା କବଚ ହୋଇଥିବା ବେଳେ ସେହି ଜନ୍ମଦାତା କାମାନ୍ଧ ହୋଇ ହିଁ ନିଜର ଝିଅକୁ ଦୁଷ୍କର୍ମ କରିଛି । ଅଭିଯୁକ୍ତ ଜଣକ ବର୍ଷେ ହେଲା ନିଜର ନାବାଳିକା ଝିଅ ସହ ଦୁଷ୍କର୍ମ କରିଆସୁଥିଲା । ଏକଥା ତାଙ୍କର ପରିବାରର ଅନ୍ୟ ସଦସ୍ୟ ମଧ୍ୟ ଜାଣିଥିଲେ । ହେଲେ କାହାକୁ କିଛି ନଜଣାଇବାକୁ ପୀଡିତାଙ୍କ ଉପରେ ଚାପ ପକାଉଥିଲେ । ଥରେ ଏ ସମ୍ପର୍କରେ ତାଙ୍କର ପଡୋଶୀ ଜାଣିପାରିଥିଲେ ଏବଂ ସେମାନେ ଥାନାରେ ଅଭିଯୋଗ କରିଥିଲେ ।

ଏନେଇ ପୋଲିସ କହିଛି, ଏହି ଦୁଷ୍କର୍ମ ଘଟଣା ସାମ୍ନାକୁ ଆସିବା ପରେ ମାମଲା ରୁଜୁ କରାଯାଇ ଅଭିଯୁକ୍ତ ବାପାକୁ ଗିରଫ କରାଯାଇଛି । ଅଭିଯୁକ୍ତର ନାମ ମୁକେଶ କୁମାର । ପୀଡିତାଙ୍କୁ ଚିକିତ୍ସା ପାଇଁ ମେଡିକାଲରେ ଭର୍ତ୍ତି କରାଯାଇଛି । ତେବେ ଘରର ମହିଳାମାନେ ସବୁ ଜାଣି ଝିଅକୁ ଚୁପ୍ କରିବାକୁ ଚେଷ୍ଟା କରିଥିବାରୁ ସେମାନଙ୍କ ବିରୁଦ୍ଧରେ ମଧ୍ୟ କଡା କାର୍ଯ୍ୟାନୁଷ୍ଠାନ ନେବା ପାଇଁ ମନଦୀପ କୌର ନାମକ ଜଣେ ସାମାଜିକ କର୍ମୀ ଦାବି କରିଛନ୍ତି ।