କୋଲକାତା: ପଶ୍ଚିମବଙ୍ଗରେ ଦଳର ପଞ୍ଚାୟତିରାଜ କାର୍ଯ୍ୟକ୍ରମକୁ ସମ୍ବୋଧନ କରି ରାଜ୍ୟରେ ଆଇନ ଶୃଙ୍ଖଳା ପ୍ରସଙ୍ଗ ଉଠାଇ ମମତା ସରକାରଙ୍କୁ କଡା ସମାଲୋଚନା କରିଥିଲେ ପ୍ରଧାନମନ୍ତ୍ରୀ । ରାଜ୍ୟରେ ପଞ୍ଚାୟତ ନିର୍ବାଚନ ବେଳେ ହିଂସାକାଣ୍ଡକୁ ନେଇ ମମତା ସରକାର ଉପରେ ମୋଦି ବର୍ଷିବା ସହ ରାଜ୍ୟରେ ରକ୍ତର ରାଜନୀତି ଚାଲିଛି ବୋଲି କହିଥିଲେ । ଯାହାର ପାଲଟା ଜବାବ ରଖିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ । ଚିରାଚରିତ ଢଙ୍ଗରେ ସେ ପ୍ରଧାନମନ୍ତ୍ରୀ ମୋଦି ଓ ଭାରତୀୟ ଜନତା ପାର୍ଟି ଉପରେ ବର୍ଷିଛନ୍ତି । ମମତା କହିଛନ୍ତି, ପ୍ରଧାନମନ୍ତ୍ରୀ ପଶ୍ଚିମବଙ୍ଗରେ ହିଂସାର କଥା କହୁଛନ୍ତି, ହେଲେ ମଣିପୁରରେ ହିଂସା ନିୟନ୍ତ୍ରଣ କରିପାରୁ ନାହାନ୍ତି । ସେହିପରି ବିଜେପିରେ ବ୍ୟାପକ ଦୁର୍ନୀତି ଜାରି ରହିଥିବା କଥା ମଧ୍ୟ ମମତା ଉଠାଇ ପ୍ରଧାନମନ୍ତ୍ରୀଙ୍କ ଭୂମିକାକୁ ନେଇ ପ୍ରଶ୍ନ କରିଛନ୍ତି ।
ମମତା କହିଛନ୍ତି, ‘‘ଇଣ୍ଡିଆ ମେଣ୍ଟ ଗଠନ ହେବା ପରେ ପ୍ରଧାନମନ୍ତ୍ରୀ ଭୟଭୀତ ହୋଇପଡିଛନ୍ତି । ତେଣୁ ଏହି ପ୍ରସଙ୍ଗରେ ସେ ଏପରି ମନ୍ତବ୍ୟ ଦେଉଛନ୍ତି । କୌଣସି ସୂଚନା ବା ତଥ୍ୟ ବିନା ସେ ଭିତ୍ତିହୀନ ଅଭିଯୋଗ କରୁଛନ୍ତି । ସାଧାରଣ ଗରିବ ଲୋକଙ୍କ ମୃତ୍ୟୁ ହେଉ, ଏହା ପ୍ରଧାନମନ୍ତ୍ରୀ ଚାହାନ୍ତି । ସାଧାରଣ ଲୋକଙ୍କର ମୃତ୍ୟୁ ହେଉ ପଛେ ହେଲେ ଭାରତୀୟ ଜନତା ପାର୍ଟି କ୍ଷମତା ବଜାୟ ରଖୁ ବୋଲି ପ୍ରଧାନମନ୍ତ୍ରୀଙ୍କ ଇଚ୍ଛା ।’’
ସେହିପରି ମମତା କେବଳ ମଣିପୁର ହିଂସା ନିୟନ୍ତ୍ରଣରେ ବିଫଳତା ପ୍ରସଙ୍ଗ ନୁହେଁ ବରଂ ଭାରତୀୟ ଜନତା ପାର୍ଟି ସରକାରରେ ବ୍ୟାପକ ଦୁର୍ନୀତି ଜାରି ରହିଥିବା ମଧ୍ୟ ଅଭିଯୋଗ କରିଛନ୍ତି । ପ୍ରଧାନମନ୍ତ୍ରୀ ନିଜ ସରକାର ଓ ଦଳର ଦୁର୍ନୀତିରେ ଘେରି ରହିଛନ୍ତି । ଏକାଧିକ ଯୋଜନା ଓ ସରକାରୀ କାର୍ଯ୍ୟକ୍ରମରେ ଦୁର୍ନୀତି ହୋଇଛି । ପ୍ରଧାନମନ୍ତ୍ରୀ କେୟାର ଫଣ୍ଡ ସମେତ ରାଫେଲ ଜେଟ ଡିଲ୍ ଓ ପ୍ରତିରକ୍ଷା ସାମଗ୍ରୀ କ୍ରୟ ଡିଲରେ ମଧ୍ୟ ବ୍ୟାପକ ଦୁର୍ନୀତି ହୋଇଛି ।
ଏପରିକି ବିଭିନ୍ନ ସରକାରୀ ସଂସ୍ଥାକୁ ଘରୋଇକରଣ କରାଯିବାର ଉଦ୍ଦେଶ୍ୟ କ’ଣ ତାହା ମଧ୍ୟ ଲୋକେ ଜାଣନ୍ତି । 2000 ଟଙ୍କିଆ ନୋଟକୁ ବଜାରରୁ ବାଦ ଦେବା ନିଷ୍ପତ୍ତି ମଧ୍ୟ ଦେଶ ପାଇଁ ନୁହେଁ ବରଂ ଦଳ ପାଇଁ ମମତା କହିଛନ୍ତି । ପଶ୍ଚିମବଙ୍ଗରେ ପଞ୍ଚାୟତ ନିର୍ବାଚନ ସମୟରେ ହୋଇଥିବା ହିଂସାରେ ଭାରତୀୟ ଜନତା ପାର୍ଟିର କାର୍ଯ୍ୟକର୍ତ୍ତାଙ୍କ ହାତ ରହିଛି ବୋଲି ମଧ୍ୟ ମମତା କହିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
