ମୁମ୍ବାଇ : ମହାରାଷ୍ଟ୍ରର ବିଧାନସଭାରେ ବିରୋଧୀଦଳର ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନାଭିସ୍ ଏବଂ ତାଙ୍କ ପରିବାର ସୁରକ୍ଷା ବ୍ୟବସ୍ଥାକୁ ହ୍ରାସ କରିଛନ୍ତି ମହାରାଷ୍ଟ୍ର ସରକାର । କେବଳ ଦେବେନ୍ଦ୍ର ଫଡନାଭିସ ନୁହନ୍ତି ରାଜ୍ୟର ବିଭିନ୍ନ ବିଶିଷ୍ଟ ବ୍ୟକ୍ତି ବିଶେଷଙ୍କ ପାଇଁ ଯୋଗାଯାଉଥିବା ସୁରକ୍ଷା ବ୍ୟବସ୍ଥାକୁ ପ୍ରତ୍ୟାହାର କରିନେଇଛନ୍ତି ମହାରାଷ୍ଟ୍ର ସରକାର । ସରକାରଙ୍କ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତି ଅନୁଯାୟୀ 2 ଜଣଙ୍କ ସୁରକ୍ଷାକୁ ନବୀକରଣ କରାଯାଇଛି, 11 ଜଣଙ୍କ ସୁରକ୍ଷାକୁ ହ୍ରାସ କରାଯାଇଛି । ସେହିପରି 16 ଜଣଙ୍କ ସୁରକ୍ଷା ବ୍ୟବସ୍ଥାକୁ ପ୍ରତ୍ୟାହାର କରାଯାଇଥିବା ବେଳେ 13 ଜଣଙ୍କୁ ସୁରକ୍ଷା କଭର ମିଳିଛି।
ପୂର୍ବତନ ୟୁପି ରାଜ୍ୟପାଳ ରାମ ନାୟକ ଏବଂ ଏମଏନଏସ ସଭାପତି ରାଜ ଠାକରେଙ୍କ ସୁରକ୍ଷା ହ୍ରାସ କରାଯାଇଛି । ରାଜ୍ୟ ବିଜେପି ମୁଖ୍ୟ ଚନ୍ଦ୍ରକାନ୍ତ ପାଟିଲଙ୍କ ସୁରକ୍ଷା କଭର ପ୍ରତ୍ୟାହାର କରିଛନ୍ତି ମହାରାଷ୍ଟ୍ର ସରକାର ।
ରାଜ୍ୟ ସରକାରଙ୍କ ଏପରି ପଦକ୍ଷେପ ପରେ ମହାରାଷ୍ଟ୍ର ବିଜେପି ମୁଖପାତ୍ର କେଶବ ଉପାଧ୍ୟାୟ ଏହାକୁ ମହାରାଷ୍ଟ୍ର ସରକାରଙ୍କ 'ଭେଣ୍ଡେଟା ରାଜନୀତି' ବୋଲି କହିଛନ୍ତି । ସେହିପରି ପୂର୍ବତନ ମୁଖ୍ୟମନ୍ତ୍ରୀ ଫଡନାଭିସ୍ କହିଛନ୍ତି ଯେ ଏହା ତାଙ୍କର ଯାତ୍ରା ଏବଂ ଲୋକଙ୍କୁ ଭେଟିବା ଯୋଜନା ଉପରେ ପ୍ରଭାବ ପକାଇ ପାରିବ ନାହିଁ।
ଜାନୁୟାରୀ 8 ରେ ଜାରି କରାଯାଇଥିବା ସରକାରୀ ବିଜ୍ଞପ୍ତି ଅନୁଯାୟୀ, ଫଡନାଭିସ୍ ବର୍ତ୍ତମାନ z- ପ୍ଲସ୍' କଭର ବଦଳରେ y + ଏସକର୍ଟ ସୁରକ୍ଷା ପାଇବେ। ତାଙ୍କ ପତ୍ନୀ ଅମୃତା ଫଡନାଭିସ୍ ଏବଂ ଝିଅ ଡିଭିଜାଙ୍କ ସୁରକ୍ଷାକୁ y+ ଏସକର୍ଟରୁ x ଶ୍ରେଣୀକୁ ହ୍ରାସ କରାଯାଇଛି।
ଉତ୍ତରପ୍ରଦେଶର ପୂର୍ବତନ ରାଜ୍ୟପାଳ ରାମ ନାୟକ ବର୍ତ୍ତମାନ Y+ ବଦଳରେ Y କଭର ପାଇବେ । ଏମଏନସ ମୁଖ୍ୟ ରାଜ ଠାକରେଙ୍କ ସୁରକ୍ଷା କଭରକୁ Z ରୁ Y + ଏସକର୍ଟକୁ ହ୍ରାସ କରାଯାଇଛି । ବିଜେପି ନେତା ତଥା ପୂର୍ବତନ ମୁଖ୍ୟମନ୍ତ୍ରୀ ନାରାୟଣ ରାଣେ ପୁର୍ବରୁ z-ପ୍ଲସ୍ 'ସୁରକ୍ଷାରେ ଥିଲାବେଳେ ଏବେ y+ ସୁରକ୍ଷା ପାଇବେ । ଏହା ବ୍ୟତୀତ ରାଜ୍ୟ ଲୋକାୟୁକ୍ତ ଏମ ଲ ତାହିଲି ଆନିହାଙ୍କ ସୁରକ୍ଷା ବ୍ୟବସ୍ଥାକୁ z ରୁ y କୁ ହ୍ରାସ କରାଯାଇଛି |
ବ୍ୟୁରୋ ରିପୋର୍ଟ, ଇଟିଭି ଭାରତ
