ନୂଆଦିଲ୍ଲୀ: ଯାହା ଆଶଙ୍କା କରାଯାଉଥିଲା ଶେଷରେ ତାହା ହେଲା । ସଂସଦ ମୌସୁମୀ ଅଧିବେଶନରେ ଲାଗି ରହିଛି ଅଚଳାବସ୍ଥା । ଆଜି ବି ଧୋଇଗଲା ପ୍ରଶ୍ନକାଳ । ଉଭୟ ସଦନ ହେଲା ମୁଲତବୀ ।
ଆଜି ଲୋକସଭା ଆରମ୍ଭ ହେବା ମାତ୍ରେ ବିରୋଧୀ ଲୋକସଭାରେ କ୍ଷୋଭ ପ୍ରକାଶ କରିଥିଲେ ବାଚସ୍ପତି ଓମ ବିର୍ଲା । ଗତକାଲି(ବୁଧବାର)ର ଗୃହରେ ବିରୋଧୀ ସଦସ୍ୟଙ୍କ ଅଶୋଭନୀୟ ଆଚରଣ ପାଇଁ ସାଂସଦ ମାନଙ୍କୁ ପାଠ ପଢାଇଥିଲେ ବାଚସ୍ପତି । ସଂସଦ ହେଉଛି ଭାରତୀୟ ଗଣତନ୍ତ୍ରର ମନ୍ଦିର । ଏହି ମନ୍ଦିରରେ ଦେଶର ଭାଗ୍ୟ ବିଧାତା ନିର୍ଧାରଣ ହୋଇଥାଏ । ଆମେ ବିଶ୍ବର ସର୍ବବୃହତ ଗଣତନ୍ତ୍ରରେ ବସବାସ କରୁଛେ । ଆମର ଆଚରଣ ଉଚ୍ଚାରଣ ସମଗ୍ର ବିଶ୍ବ ଦେଖୁଛି । ସାଂସଦ ମାନେ କୌଣସି ବ୍ୟକ୍ତି ନୁହଁନ୍ତି, ଗୋଟିଏ ଗୋଟିଏ ଅନୁଷ୍ଠାନ । କାରଣ ଲକ୍ଷ ଲକ୍ଷ ଲୋକଙ୍କ ପ୍ରତିନିଧିତ୍ବ ଆପଣ ମାନେ କରୁଛନ୍ତି । ଏହି ଗଣତନ୍ତ୍ର ମନ୍ଦିରର ମର୍ଯ୍ୟାଦା ଅକ୍ଷୁର୍ଣ୍ଣ ରଖିବା ଆମ ସମସ୍ତଙ୍କ ଦାୟିତ୍ବ ବୋଲି ବାଚସ୍ପତି ଓମ ବିର୍ଲା କହିଥିଲେ ।
ସେହିପରି ସମସ୍ତ ସଦସ୍ୟଙ୍କୁ ସମ୍ମାନ ଦେବା ଓ ସୁରକ୍ଷା ଦେବା ମୋର ଦାୟିତ୍ବ । ସମସ୍ତଙ୍କ ସହଯୋଗରେ ଏହା ସମ୍ଭବ । ଏଠି ଗଠନ ମୂଳକ ଆଲୋଚନା, ସମାଲୋଚନା ବିତର୍କ ହୁଏ । କୌଣସି ଅଶୋଭନୀୟ ଆଚରଣ ନୁହେଁ ବୋଲି ବିରୋଧୀଙ୍କୁ କଡା ସନ୍ଦେଶ ଦେଇଥିଲେ । ଏହାବାଦ ଲୋକସଭାରେ ବିଶୃଙ୍ଖଳିତ ଆଚରଣ କଲେ ଆଗକୁ କାର୍ଯ୍ୟାନୁଷ୍ଠାନ ଗ୍ରହଣ କରିବେ ବୋଲି ଚେତାଇ ଦେଇ କ୍ଷୋଭର ସହ ପୂର୍ବାହ୍ନ ୧୧.୩୦ ପର୍ଯ୍ୟନ୍ତ ଲୋକସଭାକୁ ମୁଲତବୀ କରିଛନ୍ତି । ଅନ୍ୟପଟେ ରାଜ୍ୟସଭାରେ ପ୍ରାରମ୍ଭରୁ ହୋହାଲ୍ଲା ହଟ୍ଟଗୋଳ ହେବାରୁ ଅଧ୍ୟକ୍ଷ ମଧ୍ୟାହ୍ନ ୧୨ ଟା ପର୍ଯ୍ୟନ୍ତ ଗୃହକୁ ମୁଲତବୀ ରଖିଛନ୍ତି ।
ବ୍ୟୁରୋ ରିପୋର୍ଟ, ଇଟିଭି ଭାରତ
