ନୂଆଦିଲ୍ଲୀ: ଲାକ୍ଷାଦ୍ବୀପର ପ୍ରଶାସକ ତଥା ପୂର୍ବତନ ଆଇବି ନିର୍ଦେଶକ ଦୀନେଶ୍ବର ଶର୍ମାଙ୍କ ପରଲୋକ । ଦିନେଶ୍ବରଙ୍କ ଦେହାନ୍ତରେ ଶୋକ ପ୍ରକାଶ କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ।
ପ୍ରଧାନମନ୍ତ୍ରୀ ଟ୍ବିଟ କରି ଲେଖିଛନ୍ତି, ଲାକ୍ଷାଦ୍ବୀପର ପ୍ରଶାସକ ଦୀନେଶ୍ବର ଶର୍ମା ଭାରତୀୟ ପୋଲିସ ଏବଂ ସୁରକ୍ଷାରେ ଦୀର୍ଘସ୍ଥାୟୀ ଅବଦାନ ରଖିଥିଲେ । ସେ ତାଙ୍କ ପୋଲିସ କ୍ୟାରିଅର ସମୟରେ ଅନେକ ସମ୍ବେଦନଶୀଳ ଆତଙ୍କବାଦ ଦମନ ଅପରେସନର ପରିଚାଳନା କରିଥିଲେ । ତାଙ୍କ ଦେହାନ୍ତରେ ଦୁଃଖିତ । ତେବେ ଦୀନେଶ୍ବରଙ୍କ ପରିବାର ପ୍ରତି ସମବେଦନା ପ୍ରକଟ କରିଛନ୍ତି ପ୍ରଧାନମନ୍ତ୍ରୀ ।
କେରଳ କ୍ୟାଡରର ଆଇପିଏସ ଅଧିକାରୀ ଦୀନେଶ୍ବର ଶର୍ମା 1979ରେ ଭାରତୀୟ ପୋଲିସ ସେବାରେ ଯୋଗ ଦେଇଥିଲେ । ସେ ଅନେକ ଚ୍ୟାଲେଞ୍ଜପୂର୍ଣ୍ଣ କାର୍ଯ୍ୟ କରିବା ସହ ଏବଂ ଆତଙ୍କବାଦକୁ ଦମନ ତଥା ମୁକାବିଲା କରିବାରେ ତାଙ୍କର ବେସ ଅଭିଜ୍ଞତା ରହିଥିଲା ।
ଭାରତୀୟ ପୋଲିସ ସେବାରେ ଯୋଗଦେବା ପରେ ଦୀନେଶ୍ବର ଶର୍ମା ପ୍ରଥମେ କେରଳର ପାଲଘାଟରେ ଆସିଷ୍ଟାଣ୍ଟ ସୁପରିଣ୍ଟେଣ୍ଡେଣ୍ଟ ଅଫ୍ ପୋଲିସ (ଏଏସପି) ଭାବରେ ନିଯୁକ୍ତ ହୋଇଥିଲେ । ପରେ, ସେ କାନାନୋରରେ ସହାୟକ ପୋଲିସ ଅଧୀକ୍ଷକ ଏବଂ ୱାୟନାଡ ଓ କାସଗୋଡରେ ଜିଲ୍ଲା ପୋଲିସ ଅଧୀକ୍ଷକ ଭାବରେ କାର୍ଯ୍ୟ କରିଥିଲେ । ତେବେ ସେ ପୋଲିସ ମୁଖ୍ୟାଳୟ ତ୍ରିଭେନ୍ଦ୍ରମଠାରେ ମାଲାବାର ସ୍ପେଶାଲ ପୋଲିସ ବାଟାଲିୟନର କମାଣ୍ଡାଣ୍ଟ ଏବଂ ଇନ୍ସପେକ୍ଟର ଜେନେରାଲ ଭାବେ କାର୍ଯ୍ୟ କରିଥିଲେ ।
ଦୀନେଶ୍ବର ଶର୍ମା ଜାନୁଆରୀ 1991ରେ ସହାୟକ ନିର୍ଦ୍ଦେଶକ ଭାବରେ ଇଣ୍ଟେଲିଜେନ୍ସ ବ୍ୟୁରୋ(IB)ରେ ଯୋଗ ଦେଇଥିଲେ । ତାଙ୍କର ସେବା ସମୟରେ ସେ ଭାରତର ଜମ୍ମୁ କାଶ୍ମୀର ଏବଂ ପୂର୍ବୋତ୍ତର ରାଜ୍ୟରେ ଆତଙ୍କବାଦ ବିରୋଧୀ ଅପରେସନ ସହ ସହିତ ଅନେକ ସମ୍ବେଦନଶୀଳ ଅପରେସନର ପରିଚାଳନା କରିଛନ୍ତି । ପରେ 31 ଡିସେମ୍ବର 2014ରେ ଦୀନେଶ୍ବର ଇଣ୍ଟେଲିଜେନ୍ସ ବ୍ୟୁରୋର 25 ତମ ନିର୍ଦ୍ଦେଶକ ଭାବରେ ଦାୟିତ୍ବ ଗ୍ରହଣ କରିଥିଲେ ।
30 ମେ 2017ରେ ପୂର୍ବୋତ୍ତର ରାଜ୍ୟର ବିଭିନ୍ନ ଗୋଷ୍ଠୀ ସହ ଶାନ୍ତି ଆଲୋଚନା ପାଇଁ ଦୀନେଶ୍ବର ଶର୍ମାଙ୍କୁ ସେଠାରେ GoIR ଭାବେ ନିଯୁକ୍ତ କରାଯାଇଥିଲା । ଏହା ପରେ 25 ଅକ୍ଟୋବର 2017ରେ ସେ ନିର୍ବାଚିତ ପ୍ରତିନିଧୀ, ବିଭିନ୍ନ ସଂଗଠନ ଏବଂ ସମ୍ବାଦ ପାଇଁ ଭାରତ ସରକାରଙ୍କ ପ୍ରତିନିଧୀ ଭାବରେ ନିଯୁକ୍ତି ପାଇଥିଲେ । ଏହା ସହ ସେ 2017ରେ ଜମ୍ମୁ କାଶ୍ମୀର ପାଇଁ ଜଣେ ବାର୍ତ୍ତାକାର ଭାବରେ ନିଯୁକ୍ତ ହୋଇଥିଲେ । ଏହି ଦାୟିତ୍ବରେ ସେ ଜମ୍ମୁ କାଶ୍ମୀରରେ ନିର୍ବାଚିତ ପ୍ରତିନିଧୀ, ବିଭିନ୍ନ ସଂଗଠନ ସହ ବିଭିନ୍ନ ସମୟରେ ଅନେକ ଗୁରୁତ୍ବପୂର୍ଣ୍ଣ ବିଷୟ ଉପରେ ଆଲୋଚନା କରିଥିଲେ ।
1997ରେ ନିଜ ସେବା ପାଇଁ ଦୀନେଶ୍ବର ଶର୍ମାଙ୍କୁ ସମ୍ମାନଜନକ ଭାରତୀୟ ପୋଲିସ ପଦକ ଏବଂ 2003 ରେ ରାଷ୍ଟ୍ରପତି ପୋଲିସ ପଦକ ପାଇଁ ବିଶିଷ୍ଟ ସେବା ପଦକ ପ୍ରଦାନ କରାଯାଇଥିଲା । ଶର୍ମା ବିହାରର ବୋଧ ଗୟା, ମଗଧ ବିଶ୍ବବିଦ୍ୟାଳୟରୁ ସ୍ନାତକ ହାସଲ କରିଥିଲେ ।
ବ୍ୟୁରୋ ରୋପୋର୍ଟ, ଇଟିଭି ଭାରତ
