ଭୋପାଲ: ଆଜି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କଂଗ୍ରେସ ନେତା ରାହୁଲ ଗାନ୍ଧୀଙ୍କ ଚାଇନା ଫୋନ ମନ୍ତବ୍ୟକୁ ନିର୍ବାଚନୀ ସଭାମଞ୍ଚରୁ କଟାକ୍ଷ କରିଛନ୍ତି । ରାହୁଲଙ୍କ ନାମ ନନେଇ ପ୍ରଧାନମନ୍ତ୍ରୀ ମୋଦି ତାଙ୍କୁ ମୂର୍ଖମାନଙ୍କ ସର୍ଦ୍ଦାର ବୋଲି କହିଛନ୍ତି । ଦେଶର ବର୍ତ୍ତମାନର ଉପଲବ୍ଧି କଂଗ୍ରେସର ନେତାଙ୍କୁ ଜଣାନଥିବା କହିଛନ୍ତି ପ୍ରଧାନମନ୍ତ୍ରୀ । ଗତକାଲି ମଧ୍ୟ ପ୍ରଦେଶରେ ଏକ ନିର୍ବାଚନୀ ସଭାକୁ ସମ୍ବୋଧିତ କରିବା ବେଳେ ରାହୁଲ କହିଥିଲେ, ଆଜି ଯେକୌଣସି ଜିନିଷ ଦେଖିଲେ, ସେଥିରେ ମେଡ-ଇନ-ଚାଇନା ଲେଖାଯାଇଥିବା ଦେଖିବାକୁ ମିଳିଛି । ଆମେ ମଧ୍ୟ ପ୍ରଦେଶରେ ଏହି ସବୁ ସାମଗ୍ରୀର ନିର୍ମାଣ କରିବାକୁ ସ୍ବପ୍ନ ରଖିଛୁ । କଂଗ୍ରେସ ସରକାର ଶାସନକୁ ଆସିଲେ ମଧ୍ୟ ପ୍ରଦେଶର ଯୁବକଙ୍କୁ ରୋଜଗାର ମିଳିବା । ସେମାନେ କାରଖାନାରେ କାମ କରିବେ । ଏମିତି ଏକ ଦିନ ଆସିବ, ଚୀନର କେହି ଜଣେ ଧରିଥିବା ମୋବାଇଲରେ ମେଡ-ଇନ-ମଧ୍ୟପ୍ରଦେଶ ଲେଖା ହୋଇଥିବା ଦେଖିବାକୁ ମିଳିବ ।
ରାହୁଲଙ୍କ ଏହି ମନ୍ତବ୍ୟକୁ ଆଜି ନିର୍ବାଚନୀ ସଭାମଞ୍ଚରୁ ଟାର୍ଗେଟ କରିଛନ୍ତି ପ୍ରଧାନମନ୍ତ୍ରୀ ମୋଦି । ନାଁ ନନେଇ ମୋଦି କହିଛନ୍ତି,"କାଲି କଂଗ୍ରେସର ଜଣେ ନେତା କହୁଥିଲେ, ଆପଣମାନେ ସମସ୍ତେ ଚାଇନା ଫୋନ ବ୍ୟବହାର କରୁଛନ୍ତି । ଆରେ ମୂର୍ଖଙ୍କ ସର୍ଦ୍ଦାର, କେଉଁ ଦୁନିଆରେ ଏମାନେ ରହୁଛନ୍ତି । ନିଜ ଦେଶର ଉପଲବ୍ଧି ନଦେଖି ପାରିବାର ମାନସିକ ରୋଗରେ କଂଗ୍ରେସ ଆକ୍ରାନ୍ତ ହୋଇ ସାରିଲାଣି । ସେମାନେ କେଉଁ ବିଦେଶୀ ଚଷମା ପିନ୍ଧୁଛନ୍ତି, ସେମାନଙ୍କୁ ସତ ଦେଖାଯାଉନାହିଁ । ଆଜିର ବାସ୍ତବତା ହେଉଛି, ଭାରତ ବିଶ୍ବରେ ଦ୍ବିତୀୟ ବୃହତ୍ତମ ମୋବାଇଲ ନିର୍ମାତା । କଂଗ୍ରେସ ଯେତେବେଳେ ଶାସନରେ ଥିଲା ଭାରତରେ 20 ହଜାର କୋଟିରୁ କମ ଟଙ୍କାର ମୋବାଇଲ ନିର୍ମାଣ କରାଯାଉଥିଲା । ମାତ୍ର ଏବେ ଦେଶରେ ସାଢେ ତିନି ଲକ୍ଷ କୋଟି ମୂଲ୍ୟର ମୋବାଇଲ ନିର୍ମାଣ କରାଯାଉଛି । ପ୍ରାୟ ଏକ ଲକ୍ଷ କୋଟି ଟଙ୍କା ମୂଲ୍ୟର ମୋବାଇଲ ଭାରତ ଅନ୍ୟ ଦେଶକୁ ରପ୍ତାନୀ ମଧ୍ୟ କରୁଛି ।"
ଅନ୍ୟପଟେ ଆଜି ମଧ୍ୟ ପ୍ରଦେଶରେ ଭିଦିସାରେ ଏକ ନିର୍ବାଚନୀ ସଭାକୁ ସମ୍ବୋଧିତ କରି ରାହୁଲ କଂଗ୍ରେସର ବିଜୟ ନିଶ୍ଚିତ ବୋଲି କହିବା ସହ ଭାରତୀୟ ଜନତା ପାର୍ଟିକୁ ଟାର୍ଗେଟ୍ କରିଥିଲେ । ଦଳ 2018ରେ ରାଜ୍ୟବାସୀଙ୍କଠାରୁ ଜନାଦେଶ ପାଇଥିଲା । ହେଲେ ଭାରତୀୟ ଜନତା ପାର୍ଟି କଂଗ୍ରେସର ନିର୍ବାଚିତ ବିଧାୟକଙ୍କୁ କିଣି ନେଇ 2020ରେ ସତ୍ତା ପରିବର୍ତ୍ତନ କରିଥିଲା । ମାତ୍ର ଚଳିତ ଥର ରାଜ୍ୟବାସୀ ବୁଝି ସାରିଛନ୍ତି । ସେମାନେ କଂଗ୍ରେସକୁ 145ରୁ 150 ଆସନରେ ବିଜୟ କରାଇବେ ବୋଲି ରାହୁଲ କହିଥିଲେ ।
ବ୍ୟୁରୋ ରିପୋର୍ଟ, ଇଟିଭି ଭାରତ
